தினகரன் செய்திகள்

 

நீலகிரியில் பள்ளியின் பழுதடைந்த ஓடுகளை மாணவர்களை அகற்ற கூறிய ஆசிரியர்கள்

Tuesday October 24th, 2017 12:47:00 PM
கோத்தகிரி: பள்ளியில் பழுதடைந்த ஓடுகளை மாணவர்களை கொண்டு சரி செய்த சம்பவத்திற்கு பெற்றோர்கள் கடும் எதிர்ப்பு தெரிவித்துள்ளனர். நீலகிரி மாவட்டம் கோத்தகிரி அருகே உள்ள பெட்டட்டி கிராமத்தில் ஊராட்சி ஒன்றிய நடுநிலைப்பள்ளி செயல்பட்டு வருகிறது. பழமையான கட்டிடத்தில் இயங்கி வரும் இந்த பள்ளியின் ஓடுகள் உடைந்து காணப்பட்டது. இதனால் மழைகாலங்களில் பள்ளிக்கூடத்திற்குள் தண்ணீர் தேங்கி மாணவர், ஆசிரியர்கள் சிரமம் அடைகின்றனர். இந்நிலையில் மாணவர்கள் சிலர் பள்ளியின் மேற்கூரையில் ஏறி சேதம் அடைந்த ஓடுகளை மாற்றி சரி செய்தனர். இதைப்பார்த்து பொது மக்கள் அதிர்ச்சியடைந்தனர்.பாதுகாப்பற்ற முறையில் மாணவர்களை வேலைக்கு அமர்த்தியது குறித்து பெற்றோர்கள் பள்ளியின் தலைமை ஆசிரியரை சந்தித்து கண்டனம் தெரிவித்தனர். பெற்றோர்களின் எதிர்ப்பையடுத்து மாணவர்கள் கீழே இறக்கி விடப்பட்டனர். ஓடுகளை மாற்றுவது முறையான பணியாளர்களை கொண்டு செய்ய வேண்டும் என்று கூறினர். இதில் மாணவர்களை ஈடுபடுத்தியது கண்டிக்கத்தக்கது. இது குறித்து மாவட்ட நிர்வாகம் நடவடிக்கை எடுத்து பள்ளியை சீரமைக்க வேண்டும் என்றனர்.

மதுரை அருகே மின்கம்பம் முறிந்து விழுந்து ஊழியர் உயிரிழப்பு

Tuesday October 24th, 2017 12:46:00 PM
மதுரை: மதுரை மாவட்டம் மாங்குளம் கிராமத்தில் மின்கம்பம் முறிந்து விழுந்தது. இந்த விபத்தில் மின்வாரிய ஊழியர் பூமிநாதன் உயிரிழந்தார். பழுது நீக்க ஏறியபோது மின்கம்பம் உடைந்து விழுந்ததில் ஊழியர் பூமிநாதன் பரிதாபமாக உயிரிழந்தார்.

குமரி - திருவனந்தபுரம் தேசிய நெடுஞ்சாலைக்காக வெட்டி அழிக்கப்படும் லட்சக்கணக்கான மரங்கள்

Tuesday October 24th, 2017 12:42:00 PM
குமரி: கன்னியாகுமரி மாவட்டத்தில் தேசிய நெடுஞ்சாலை பணிக்காக லட்சக்கணக்கான மரங்கள் அழிக்கப்பட்டுள்ளதால், அம்மாவட்டமே பாலைவனமாகி வருவதாக புகார் எழுந்துள்ளது. கன்னியாகுமரியிலிருந்து திருவனந்தபுரம் வரையில் தேசிய நெடுஞ்சாலை பணிகள் நடைபெற்று வருகின்றன. இந்த பணிக்காக கன்னியாகுமரியிலிருந்து களியக்காவிளை வரை சாலையின் இருபுறமும் இருந்த லட்சக்கணக்கான மரங்கள் வெட்டப்பட்டுள்ளன. குமரி மாவட்டத்தில் மழையளவு குறைந்து வரும் நிலையில் மரங்கள் அடியோடு அழிக்கப்படுவதால் மேலும் பாதிப்பு ஏற்படும் என்பது சமூக ஆர்லவர்களின் குற்றச்சாட்டு. தேசிய நெடுஞ்சாலைக்காக வெட்டப்படும் மரங்கள் குறித்து 2 மாதங்களுக்குள் வெள்ளை அறிக்கை வெளியிட வேண்டும் என குமரி மாவட்ட ஆட்சியரிடம் இயற்கை ஆர்வலர்கள் மனு அளித்துள்ளனர். தவறினால் மக்களை திரட்டி போராட்டம் நடத்துவோம் என எச்சரித்துள்ளனர். குமரி முதல் தமிழக எல்லையான களியக்காவிளை வரை சுமார் 65 கி.மீ தூரத்திற்கு நடைபெற்று வரும் நெடுஞ்சாலைப் பணிகள் அடுத்த ஆண்டுக்குள் முடியும் என எதிர்பார்க்கப்படுகிறது.    

ஆம்பூரில் காலனி ஆலைக்கு ரூ. 1.50 லட்சம் அபராதம்

Tuesday October 24th, 2017 12:21:00 PM
ஆம்பூர்: ஆம்பூரில் டெங்கு கொசு வளர ஏதுவாக தண்ணீர் தேக்கிய காலனி ஆலைக்கு ரூ. 1.50 லட்சம் அபராதம் விதிக்கப்பட்டுள்ளது. மொஹீப்ஷூஸ், ஃப்லாரன்ஸ் ஷூஸ் நிறுவனத்துக்கு சார் ஆட்சியர் வளர்மதி அபராதம் விதித்தார்.  

பல்லடம் அருகே அதிகாலையில் மதுவிற்பனை : டாஸ்மாக் கடை சூறை

Tuesday October 24th, 2017 11:47:00 AM
திருப்பூர் மாவட்டம் பல்லடம் அருகே கொடுவாய் பகுதியில் அதிகாலையில் மதுவிற்பனை செய்த டாஸ்மாக் கடையை பொதுமக்கள் சூறையாடினர். கடையில் இருந்த மதுப்பாட்டில்களை உடைத்து பொதுமக்கள் பேராட்டத்தில் ஈடுபட்டுள்ளனர். இதனால் போலீசார் குவிக்கப்பட்டுள்ளனர்.

தீக்குளித்து இறந்த 3 பேர் உடல்கள் உறவினரிடம் ஒப்படைப்பு

Tuesday October 24th, 2017 11:41:00 AM
நெல்லை: நெல்லை ஆட்சியர் அலுவலகத்தில் தீக்குளித்து இறந்த தாய், 2 மகள்கள் உடல் உறவினரிடம் ஒப்படைக்கப்பட்டது. கந்துவட்டி கொடுமையால் மனமுடைந்த இசக்கிமுத்து என்பவர் நேற்று குடும்பத்துடன் தீக்குளித்தார். இசைக்கிமுத்து மனைவி சுப்புலட்சுமி, குழைந்தைகள் சரண்யா(5), ஒன்றை வயது அட்சயா இறந்தனர். உயிருக்கு ஆபத்தான நிலையில் இசக்கிமுத்து மருத்துவமனையில் சிகிச்சை பெற்று வருகிறார்.

கரூரில் பாஜக மற்றும் விடுதலை சிறுத்தைகள் கட்சியைச் சேர்ந்தவர்கள் இடையே மோதல்

Tuesday October 24th, 2017 11:35:00 AM
கரூர்: கரூரில் பாஜக மற்றும் விடுதலை சிறுத்தைகள் கட்சியைச் சேர்ந்தவர்கள் இடையே மோதல் ஏற்பட்டது. கரூரில் பாஜக பொதுக்குழு, செயற்குழு கூட்டம் நடைபெறும் மண்டபத்தின் முன்பு வி.சி.கவினர் கோஷமிட்டனர். தமிழிசையை கண்டித்து வி.சி.கவினர் கோஷமிட்டதால் இரு கட்சியினரிடையே தள்ளுமுள்ளு ஏற்பட்டது.

குமரியில் அம்மா உணவக சாம்பாரில் பல்லி : சாப்பிட்ட பெண் ஒருவர் பாதிப்பு

Tuesday October 24th, 2017 11:34:00 AM
குமரி: கன்னியாகுமரி மாவட்டத்தில் ஆசாரிப்பள்ளம் பகுதியில் உள்ள அம்மா உணவகத்தில் சாம்பாரில் பல்லி இருந்ததாக புகார் எழுந்துள்ளது. அரசு மருத்துவக்கல்லூரி மருத்துவமனை வளாகத்தில் உள்ள அம்மா உணவகத்தில் சாம்பாரில் பல்லி விழுந்துள்ளது. அம்மா உணவகத்தில் உணவுசாப்பிட்ட பெண் ஒருவருக்கு உடல்நிலை பாதிக்கப்பட்டுள்ளது.

கந்துவட்டிக்கு பதில் கிட்னியை கேட்கும் கொடுமை...! : கணவனை மீட்டு தர கோரும் மனைவி

Tuesday October 24th, 2017 11:01:00 AM
ஈரோடு: ஈரோட்டில் வாங்கிய கடன் தொகையை திருப்பி செலுத்தாதவரின் கிட்னியை கடன் கொடுத்தவர்கள் கேட்பதாக எழுந்துள்ள புகார் பெரும் அதிர்வலைகளை ஏற்படுத்தியுள்ளது. கந்து வட்டி கொடுமைக்கு நெல்லை ஆட்சியர் அலுவலகத்தில் ஒரு குடும்பமே நேற்று தீக்குளித்த சோகமும், அதிர்ச்சியும் மறைவதற்குள் மற்றொரு அதிர்ச்சி புகார் கூறப்பட்டுள்ளது. நேற்று கந்து வட்டி கொடுமையால் பாதிக்கப்பட்ட கூலி தொழிலாளி நெல்லை கலெக்டர் அலுவலகத்தில் குடும்பத்துடன் தீக்குளித்தார். உடல் முழுவதும் தீப்பற்றி எரிந்தபடி பொதுமக்கள் முன்னிலையில் அவர்கள் கதறி துடித்தது பெரும் அதிர்வலையை ஏற்படுத்தியது. இதில் அவரது மனைவி, 2 குழந்தைகள் கருகி பலியாகினர். இந்நிலையில் கந்துவட்டிக்காக நெசவுத் தொழிலாளியின் கிட்னியை விற்க முயற்சிப்பதாக கூறப்படும் புகார் பரபரப்பை ஏற்படுத்துள்ளது. சூரம்பட்டியை சேர்ந்த ரவி என்பவரது மனைவி சம்பூரணம் ஈரோடு ஆட்சியரிடம் மனு அளித்துள்ளார். அதில் வாங்கிய கடனை திருப்பி செலுத்த முடியாத காரணத்தால் தனது கணவரின் கிட்னியை விற்க நிர்பந்தப்படுத்தப்படுவதாக கூறியுள்ளார். தனது கணவர் ரவியின் கிட்னியை  விற்பதற்காக இடைத்தரகர்கள் சிலர் கேரளாவிற்கு அவரை கட்டாயப்படுத்தி அழைத்து சென்றுள்ளதாக குறிப்பிட்டுள்ளார். இந்த கந்துவட்டி கொடுமையிலிருந்தும், கிட்னிக்காக அழைத்து செல்லப்பட்டுள்ள தனது கணவர் ரவியை காப்பாற்றி மீட்டுத்தருமாறும் கோரிக்கை விடுத்துள்ளார். இந்நிலையில் கிட்னியை எடுக்க நெசவுத் தொழிலாளியை அழைத்துச் சென்றது தொடர்பாக உரிய நடவடிக்கை எடுக்கப்படும் என்றும், கந்துவட்டி கொடுமை பற்றி 0424- 2260211 மற்றும் 7806917007 என்ற எண்ணில் புகார் அளிக்கலாம் என்றும் ஈரோடு மாவட்ட ஆட்சியர் அறிவித்துள்ளார்.    

டெங்கு கொசு ஆய்வுக்குச் சென்ற வேலூர் மாவட்ட ஆட்சித் தலைவர் விரட்டியடிப்பு

Tuesday October 24th, 2017 10:59:00 AM
வேலூர்: டெங்கு கொசு ஆய்வுக்குச் சென்ற வேலூர் மாவட்ட ஆட்சித் தலைவர் ராமன் விரட்டியடிக்கப்பட்டார். வேலூர் சி.எம்.சி காலனியில் அனுமதியின்றி ஒரு வீட்டில் மாவட்ட ஆட்சித்தலைவர் நுழைந்தார். வீட்டில் இருந்த பெண் டாக்டர் ஒருவர் மாவட்ட ஆட்சித் தலைவருக்கு கடும் எதிர்ப்பு தெரிவித்தார். அனுமதியின்றி என் வீட்டில் எப்படி நுழையலாம் என்று மாவட்ட ஆட்சியருக்கு பெண் டாக்டர் கேள்வி எழுப்பினார். பெண் டாக்டரின் எதிர்ப்பால் அவரின் வீட்டை சோதனை செய்யாமல் ஆட்சியர் ராமன் திரும்பிச் சென்றார்.

மதுராந்தகம் அரசு மருத்துவமனையில் 4 டாக்டர்கள் பணியில் இல்லை

Tuesday October 24th, 2017 10:54:00 AM
மதுராந்தகம்: மதுராந்தகம் அரசு மருத்துவமனையில் மாவட்ட ஆட்சியர் ஆய்வின்போது 4 டாக்டர்கள் பணியில் இல்லை. பணியில் இல்லாத 4 டாக்டர்களுக்கு மெமோ அளிக்க மருத்துவமனை இணை இயக்குனருக்கு உத்தரவிடப்பட்டுள்ளது.

சம்பா சாகுபடி பணிகள் தீவிரம் : விதைநெல் கிடைக்காமல் விவசாயிகள் அவதி

Tuesday October 24th, 2017 10:46:00 AM
வேதாரண்யம்: வேதாரண்யம் தாலுகாவில் சம்பா சாகுபடி பணிகள் தீவிரமாக நடந்து வருகிறது. இதற்கு விதைநெல் கிடைக்காமல் விவசாயிகள் அவதிப்படுகிறார்கள். வேதாரண்யம் தாலுகாவில் தலைஞாயிறு, கரியாப்பட்டினம், வடமழை, மணக்காடு, தாணிக்கோட்டகம், பிராந்தியங்கரை, மூலக்கரை உள்ளிட்ட 25க்கு மேற்பட்ட கிராமங்களில் சுமார் 14 ஆயிரம் ஹெக்டேரில் சாகுபடி நடைபெற்று வருகிறது. ஆற்றுப்பாசன பகுதியான இந்த கடைமடை பகுதிக்கு காவிரி தண்ணீர் சிறிதளவு வந்துள்ளது. காவிரியில் இருந்து வரும் மேட்டூர் அணை தண்ணீர் தற்போது வந்த நிலையில் தலைஞாயிறு, கரியாப்பட்டினம் பகுதிகளில் சம்பா சாகுபடிக்கான பணிகள் முழுவீச்சில் துவங்கி நடைபெற்று வருகிறது. பல்வேறு பகுதிகளில் நேரடி நெல்விதைப்பு சில பகுதிகளில் நடவு பணிகள் தீவிரமாக நடைபெறுகிறது. ஒருசில இடங்களில் முளைத்த பயிர்கள் தண்ணீரின்றி கருகியும், வெட்டுக்கிளி தாக்குதலாலும் பாதிப்படைந்துள்ளது. தெளித்த பல இடங்களில் நெல் முளைக்காமலே போய்விட்டது. மேலும் கிளை வாய்க்கால்கள் தூர்வாராததால் வயல்களுக்கு தண்ணீர் வரவில்லை. வாய்மேடு, தலைஞாயிறு, கரியாப்பட்டினம், வேதாரண்யம் உள்ளிட்ட வேளாண்மைதுறை அலுவலகங்களில் குறுகியகால ரகங்கள் நெல் இருப்பு இல்லை. தனியார் கடைகளிலும் குறுகியகால நெல் ரகங்கள் தற்போது கிடைப்பதில்லை. ஏற்கனவே தெளித்து முளைக்காமல் போன வயல்களுக்கு குறுகியகால நெல்ரகவிதைகள் கிடைக்காமல் விவசாயிகள் அவதிப்படுகின்றனர். எனவே போர்க்கால அடிப்படையில் விவசாயிகளுக்கு விதைநெல் கிடைக்க நடவடிக்கை எடுக்க வேண்டும் என விவசாயிகள் கோரிக்கை விடுத்துள்ளனர்.

வேலூர் மாவட்ட அரசு மருத்துவமனைகளில் ஒரே நாளில் 155 பேர் காய்ச்சல் பிரிவில் அனுமதி

Tuesday October 24th, 2017 10:45:00 AM
வேலூர்: வேலூர் மாவட்ட அரசு மருத்துவமனைகளில் ஒரே நாளில் 155 பேர் காய்ச்சல் பிரிவில் அனுமதிக்கப்பட்டனர். இவர்களில் 40 பேருக்கு டெங்கு அறிகுறிகள் தெரியவந்துள்ளது. மேலும் தனியார் மருத்துவமனைகளில் காய்ச்சல் பாதிப்பால் ஆயிரக்கணக்கானோர் படையெடுக்க தொடங்கியுள்ளனர். இதனால், மக்கள் பீதியடைந்து உள்ளனர். தமிழகம் முழுவதும் டெங்கு மற்றும் மர்ம காய்ச்சல் வேகமாக பரவி வருகிறது. இதில் குழந்தைகள் உட்பட பலர் உயிரிழந்துள்ளனர். டெங்கு காய்ச்சல் பரவுவதை தடுக்க தமிழகம் முழுவதும் தீவிர நடவடிக்கை எடுக்கப்பட்டு வருகிறது. இருப்பினும் டெங்கு காய்ச்சலுக்கு பலி எண்ணிக்கை நாளுக்கு நாள் அதிகரித்து வருகிறது.இந்நிலையில் வேலூர் அரசு மருத்துவமனைகளில் காய்ச்சலால் பாதிக்கப்பட்ட 356 பேருக்கு சிகிச்சை அளிக்கப்பட்டு வருகிறது. இவர்களில் நேற்று முன்தினம் ஒரே நாளில் 155 பேர் அனுமதிக்கப்பட்டுள்ளனர். இதுகுறித்து மருத்துவ அதிகாரிகள் கூறியதாவது: வேலூர் மாவட்டத்தில் உள்ள அரசு மருத்துவமனைகளில் காய்ச்சல் பிரிவுகள் தொடங்கப்பட்டு தீவிர சிகிச்சை அளிக்கப்பட்டு வருகிறது. டெங்குவால் பாதிக்கப்பட்டவர்கள் மற்றும் சாதாரண காய்ச்சலால் பாதிக்கப்பட்டவர்கள் என 124 பேர் முழுவதுமாக குணமடைந்து நேற்று முன்தினம் அரசு மருத்துவமனைகளில் இருந்து வீட்டிற்கு அனுப்பி வைக்கப்பட்டுள்ளனர். இந்நிலையில், நேற்று முன்தினம் ஒரே நாளில் 155 பேர் காய்ச்சல் பாதிப்பால் அரசு மருத்துவமனைகளில் அனுமதிக்கப்பட்டிருப்பது குறிப்பிடத்தக்கது. தற்போதைய நிலவரப்படி வேலூர் அரசு மருத்துவக்கல்லூரி மருத்துவமனையில் மட்டும் 30 குழந்தைகள் உட்பட 185 பேர், பெண்ட்லென்ட் அரசு மருத்துவமனையில் ஒரு குழந்தை உட்பட 8 பேர் என மாவட்டம் முழுவதும் உள்ள அரசு மருத்துவமனைகளில் மொத்தம் 356 பேர் காய்ச்சல் பிரிவில் சிகிச்சை பெற்று வருகின்றனர். காய்ச்சல் பாதிப்புக்குள்ளானவர்களில் வாலாஜாவில் 2 குழந்தைகளுக்கு டெங்கு பாதிப்பு ஏற்பட்டிருப்பது உறுதி செய்யப்பட்டுள்ளது. இதுதவிர மாவட்டம் முழுவதும் அரசு மருத்துவமனைகளில் 40 பேருக்கு டெங்கு அறிகுறிகள் இருப்பதால், தீவிர பரிசோதனைகளுடன் மருத்துவமனைகளில் சிகிச்சைக்கு அனுமதித்து தீவிரமாக கண்காணித்து வருகிறோம்.மேலும் காய்ச்சலால் பாதிக்கப்பட்டவர்களுக்கு உடனடியாக சிகிச்சை அளிக்க போதிய மருந்துகள் இருப்பு வைக்கப்பட்டுள்ளது. அதோடு, நிலவேம்பு கசாயம் பற்றாக்குறையின்றி வழங்கப்பட்டு வருகிறது. இவ்வாறு அவர்கள் தெரிவித்தனர். மாவட்டத்தில் உள்ள அரசு மருத்துவமனைகளில் தற்போது 356 பேர் காய்ச்சல் பாதிப்பால் அனுமதிக்கப்பட்டு உள்ள நிலையில், கடந்த 2 நாட்களாக மாலை நேரங்களில் தனியார் மருத்துவமனைகளுக்கு காய்ச்சல் பாதிப்புக்கு சிகிச்சை பெற வரும் நோயாளிகள் கூட்டம் நிரம்பி வழிகிறது. தொடர்ந்து மாவட்டத்தின் பல்வேறு இடங்களில் காய்ச்சல் வேகமாக பரவுவதால், பொதுமக்கள் பீதியடைந்து உள்ளனர்.

தொடர்ந்து கொட்டப்படுவதால் காவிரி கரையில் குப்பை மலை : உரம் தயாரிக்க மாநகராட்சி திட்டம்

Tuesday October 24th, 2017 10:44:00 AM
ஈரோடு: ஈரோடு மாநகராட்சிக்குட்பட்ட பகுதிகளில் சேகரிக்கப்படும் குப்பைகள் வைராபாளையம் காவிரி ஆற்றங்கரையிலும், வெண்டிபாளையம் மாநகராட்சி குப்பைக்கிடங்கிலும் சேகரிக்கப்படுகிறது. இதில் வைராபாளையம் காவிரி ஆற்றங்கரையில் கொட்டி வைக்கப்படும் குப்பைமேடுக்கு அருகிலேயே மாநகராட்சியின் குடிநீர் பம்பிங் ஸ்டேசனும் உள்ளது. ஏற்கனவே சுண்ணாம்பு ஓடை, பிச்சைக்காரன்பள்ளம் ஓடையின் கழிவுநீரும் இந்த இடத்திற்கு சற்று முன்பு தான் காவிரி ஆற்றில் கலக்கிறது. சாய, தோல் மற்றும் சாக்கடை கழிவுநீரும், குப்பையும் கலந்து வரும் நீரையே மாநகராட்சி மக்களின் ஒரு பிரிவினருக்கு சப்ளை செய்யப்படுகிறது. எனவே வைராபாளையம் காவிரி ஆற்றங்கரையில் கொட்டும் குப்பையால் காவிரி ஆறு மாசுபடுவதை தடுக்க முந்தைய திமுக ஆட்சியில் அப்போதைய வீரப்பன்சத்திரம் 3ம் நிலை நகராட்சி சார்பில் காவிரி ஆற்றங்கரையில் 9 ஏக்கர் நிலம் வாங்கி சுற்றிலும் பல லட்சம் செலவில் சுற்றுச்சுவர் கட்டப்பட்டு, குப்பை லாரிகள் சென்று வர வசதியாக ரூ. 1 கோடி செலவில் பிச்சைக்காரன்பள்ளம் ஓடையின் குறுக்கே பாலமும் கட்டப்பட்டது. குப்பை கொட்டுவதற்கு ஏதுவாக குப்பை சேகரிக்கும் தளமும் அமைக்கப்பட்ட நிலையில், ஆட்சிமாற்றம் ஏற்பட்டதால் இத்திட்டம் பாதியில் நிறுத்தப்பட்டு விட்டது. இந்த குப்பை சேகரிப்பு தளம் வீணாக யாருக்கும் பயன் இன்றி தற்போது கிரிக்கெட் விளையாடும் இடமாக மாறி விட்டது. அதேசமயம் காவிரி ஆற்றங்கரையில் தொடர்ந்து குப்பையை கொட்டி வந்ததால் அப்பகுதி மக்கள் குப்பை லாரிகளை சிறைபிடித்து போராட்டம் நடத்தினர். இருப்பினும் தொடர்ந்து காவிரி கரையில் குப்பை கொட்டுவது தொடர்ந்து வருகிறது. 9 ஏக்கர் பரப்பளவில் மாநகராட்சிக்கு சொந்தமான குப்பை சேகரிக்கும் தளம் யாருக்கும் பயனின்றி உள்ளது. இதுகுறித்து மாநகர் மாவட்ட காங்கிரஸ் தலைவர் ஈ.பி.ரவி கூறும்போது, மாநகராட்சிக்கு சொந்தமான குப்பை சேகரிக்கும் தளம் 9 ஏக்கர் பரப்பளவில் யாருக்கும் பயனின்றி உள்ளது. இதில் குப்பைகளை கொட்டியும், காவிரி கரையில் உள்ள  குப்பைகளை அப்புறப்படுத்தி இங்கு மாற்றினாலே காவிரி கரை தூய்மை அடையும். ஆனால் மாநகராட்சி அலட்சிய போக்குடன் செயல்படுகிறது என்றார். இப்பிரச்னை குறித்து மாநகராட்சி ஆணையாளர் சீனிஅஜ்மல்கான் கூறியதாவது: வைராபாளையத்தில் 9 ஏக்கரில் அமைந்துள்ள குப்பை சேகரிக்கும் தளத்தில் விரைவில் குப்பையில் இருந்து உரம் தயாரிக்கும் திட்டத்தை தனியார் மூலம் செயல்படுத்தப்பட உள்ளது. அப்போது காவிரி கரையில் உள்ள குப்பையை எடுத்து உரம் தயாரிக்க பயன்படுத்தப்படும். குப்பையை தரம் பிரித்து உரம் தயாரித்தது போக மீதமுள்ள குப்பையை எரிபொருளாக பயன்படுத்தி கொள்ளவும் திட்டமிடப்பட்டுள்ளது. இதற்கு தேவையான இயந்திரங்களை மாநகராட்சி நிர்வாகம் வாங்கி தனியாரிடம் ஒப்படைத்து, அவர்கள் மூலம் குப்பையை உரமாக தயாரிக்கும் திட்டம் செயல்படுத்தப்படும். இந்த இயந்திரங்கள் வாங்க ரூ.7 முதல் 8 கோடி வரை செலவாகும். இன்னும் 3 மாதங்களில் இப்பணி துவங்கி ஒரு ஆண்டுக்குள் நிறைவு பெற்று விடும். இவ்வாறு ஆணையாளர் தெரிவித்தார்.

குளித்தலை முசிறி பாலத்தில் நீடிக்கும் எல்லை பிரச்னை : மின்விளக்கின்றி இருண்டு கிடக்கும் பாதி பாலம்

Tuesday October 24th, 2017 10:43:00 AM
குளித்தலை: குளித்தலை முசிறி பாலத்தில் போலீஸ் எல்லை பிரச்னை நீடித்துவரும் நிலையில் பாலத்தில் குளித்தலை எல்லை பகுதி மின்விளக்குகள் இன்றி இருண்டு கிடப்பது குறித்து நடவடிக்கை எடுக்க சமூக ஆர்வலர்கள் கோரிக்கை விடுக்கின்றனர். குளித்தலை - முசிறியை இணைக்கும் வகையில் காவிரியில் 3கி.மீ தொலைவிற்கு 36 தூண்கள் கொண்ட பெரியார் பாலம் உள்ளது. இந்த பாலத்தின் வழியாக பல்வேறு மாவட்டத்தில் இருந்தும் வெளி மாநிலங்களில் இருந்தும் வரும் வாகனங்கள் கடந்து செல்கின்றன. பொதுமக்கள் இப்பாலத்தின் வழியாக  நடந்தே இரவு நேரங்களிலும் அச்சமின்றி சென்று வந்தனர். அப்போது பாலத்தில் மின் விளக்குகள் போடப்பட்டு இருந்தது.சமீபத்தில் பொதுமக்கள் கோரிக்கையை ஏற்று குளித்தலை நகர எல்லை வரை மின்விளக்கு வசதி செய்யப்பட்டுள்ளது. ஆனால் முசிறி எல்லையில் மின்விளக்கு வசதியே இல்லாத நிலை இருந்துவருகிறது. எனவே பொதுமக்கள் அச்சத்துடன் இருப்பதால் நடந்து செல்வதில்லை. மேலும் இந்த பாலத்தில் முசிறியில் இருந்து 1 முதல் 36 தூண்கள் இருக்கிறது. 1 முதல் 18 தூண்கள் முசிறி காவல் நிலைய எல்லையாகவும், 19வது தூண் முதல்  38வது தூண் வரை குளித்தலை காவல்நிலைய எல்லைகளாகவும் ஒதுக்கப்பட்டுள்ளது. இருப்பினும் பாலத்தில் விபத்து ஏற்பட்டால் அவசர நேரத்தில் குளித்தலை, முசிறி காவல் நிலையங்களுக்கு பொதுமக்கள் தகவல் தெரிவித்து வருகின்றனர். போலீசார் வந்து பார்த்துவிட்டு இது எங்கள் எல்லை இல்லை என்று கூறி செல்லும் நிலை உள்ளது. மேலும் காவிரியாற்றில் வரும் இறந்தவர்கள் உடல்களை மீட்பதிலும் இதே எல்லை பிரச்னை நீடிக்கிறது. இந்நிலையில் தற்போது முசிறி காவல்நிலையம் சார்பில் பாலத்தில் முசிறி பகுதி எல்லையில்  காவல்நிலைய தொலைபேசி எண்ணுடன் அறிவிப்பு பலகை வைக்கப்பட்டுள்ளது. இதே போல் குளித்தலை காவல்நிலையம் சார்பில் அறிவிப்பு பலகையை தொலைபேசி எண்ணுடன் வைக்க வேண்டும் என்று பொதுமக்கள் எதிர்பார்க்கின்றனர். மேலும் பாலத்தில் அச்சமின்றி செல்வதற்கு முசிறியில் இருந்து குளித்தலை எல்லைவரை மின்விளக்கு வசதி செய்துதர மாவட்ட நிர்வாகமும், காவல் துறையும் நடவடிக்கை எடுக்கவேண்டும் என சமூக ஆர்வலர்கள் கோரிக்கை விடுக்கின்றனர்.

வேதாரண்யத்தில் கடல் சீற்றம்: மீனவர்கள் முடக்கம்

Tuesday October 24th, 2017 10:39:00 AM
வேதாரண்யம்: நாகை மாவட்டம், கோடியக்கரையில் அக்டோபர் முதல் மார்ச் வரை மீன்பிடி சீசன் காலம்  என்பதால் இங்கு நாகை, திருவாரூர், காரைக்கால், தஞ்சை, கடலூர் உள்பட பல்வேறு மாவட்ட மீனவர்கள் தங்கி மீன்பிடித்து வருகின்றனர். தினமும் 500க்கும் மேற்பட்ட விசைபடகுகளில் மீனவர்கள் கடலுக்கு சென்று வருகின்றனர். இங்கு பிடிக்கப்படும் மீன்கள் ஆந்திரா, கர்நாடகா மற்றும் கேரள மாநிலங்களுக்கு அனுப்பப்படுகிறது. கடலில் சூறைகாற்று வீசுவதால் கடல் சீற்றமாக காணப்படுகிறது. இதனால் மீனவர்கள் நேற்று கடலுக்கு செல்லவில்லை. இதனால் 500க்கும் மேற்பட்ட விசைபடகுகள் கோடியக்கரை கடற்கரையில் நிறுத்தப்பட்டுள்ளது. ஓய்வில் உள்ள மீனவர்கள் வலைகளை  சரிசெய்யும் பணியில் ஈடுபட்டுள்ளனர். மீனவர்கள் கூறுகையில், வடகிழக்கு பருவமழை துவங்கினால் தான் கடலில் தற்போது வீசி வரும் தென்றல்  காற்று வாடை காற்றாக மாறி மீன்பிடிக்க ஏதுவாக இருக்கும். தற்போது கடல்  சீற்றத்தால் மீன்பிடிக்க செல்லவில்லை என்றனர்.

தொடரும் கந்துவட்டி கொடுமை : ஈரோட்டில் கடனை திருப்பி செலுத்தாததால் கிட்னியை விற்க முயற்சி

Tuesday October 24th, 2017 10:37:00 AM
ஈரோடு: ஈரோட்டில் கடன்தொகையை திருப்பி செலுத்தாததால் நெசவுத் தொழிலாளியின் கிட்னியை விற்க முயற்சித்த சம்பவம் பரபரப்பை ஏற்படுத்துள்ளது. சூரம்பட்டியை சேர்ந்த ரவி என்பவரது மனைவி சம்பூரணம் ஈரோடு ஆட்சியரிடம் மனு அளித்துள்ளார். கிட்னி விற்பதற்காக அழைத்து செல்லப்பட்ட கணவரை மீட்டுத்தர கோரிக்கை விடுத்துள்ளார். நெசவுத் தொழிலாளர் ரவியை இடைத்தரகர் கேரளாவுக்கு அழைத்துச்சென்றதாக கூறப்படுகிறது. ரூ.5 லட்சத்துக்கு கிட்னி விற்கப்படுவதாக ஆட்சியரிடம் மனைவி சம்பூரணம் புகார் தெரிவித்துள்ளார்.

பெரியாறு ஆயக்கட்டு 45 ஆயிரம் ஏக்கர் பாசனத்துக்கு தண்ணீர் திறப்பதில் விதிமீறல்

Tuesday October 24th, 2017 10:34:00 AM
மதுரை:  பெரியாறு ஆயக்கட்டு 45 ஆயிரம் ஏக்கர் பாசனத்துக்கு வைகை அணையில் போதுமான தண்ணீர் இருப்பு இருந்தும், திறக்காமல் அதிகாரிகள் விதியை மீறி அலட்சியம் காட்டுவதாக விவசாயிகள் புகார் தெரிவித்துள்ளனர். இதனால் சாகுபடி தாமதமாகி மகசூல் பாதிக்கும் என்றும் அச்சம் அடைந்துள்ளனர்.முல்லை பெரியாறு அணை பாசன இருபோக ஆயக்கட்டு, மதுரை மாவட்டத்தில் 43 ஆயிரத்து 244 ஏக்கரும், திண்டுக்கல் மாவட்டத்தில் 1,797 ஏக்கரும் உள்ளன. இந்த பகுதிகளில் பாசனத்துக்கு செப்டம்பர் இறுதி அல்லது அக்டோபர் முதல் வாரம் திறக்க வேண்டிய  தண்ணீர் இதுவரை திறக்கப்படவில்லை. பெரியாறு அணை ஒதுக்கீட்டு நீர் 4 ஆயிரம் மில்லியன் கனஅடிக்கு மேல் இருந்தால், இந்த பகுதிகளின் பாசனத்துக்கு தண்ணீர் திறக்கலாம் என்பது விதிமுறையாகும். நேற்றைய நிலவரப்படி பெரியாறு அணை நீர்மட்டம் 121.70 அடி, வைகையில் 53.38 அடி உள்ளது.இரு அணைகளிலும் சேர்த்து பெரியாறு அணை ஒதுக்கீட்டு நீர் 4,220 மில்லியன் கன அடிக்கு மேல் இருப்பு உள்ளது. விதிமுறைப்படி பேரணை முதல் கள்ளந்திரி மதகு வரையிலான பாசனத்துக்கு உடனடியாக தண்ணீர் திறக்க முடியும். ஆனால் மாவட்ட கலெக்டரும், பொதுப்பணித்துறையினரும், வைகை அணையில் இருந்து தண்ணீர் திறக்கும் தேதி முடிவு செய்யாமல், இழுத்தடிப்பதாக புகார் எழுந்துள்ளது. இதுகுறித்து பாசன விவசாயிகள் கூறியதாவது: கடந்த ஆண்டு முழுவதும் வறட்சி வாட்டியது. இந்த ஆண்டும் இருபோகத்தில் முதல் போகம் பொய்த்து போனது. அணைகளில் இருந்து பாசனத்துக்கு தண்ணீர் திறக்க விதிமுறைகள் உள்ளன. அதன்படி தற்போது 45 ஆயிரம் ஏக்கர் பாசனத்துக்கு தண்ணீர் திறக்க முடியும். ஆனால், திறக்காமல் அதிகாரிகள் அலட்சியம் காட்டுவது வேதனை அளிக்கிறது. ஏனென்றால், ஏற்கனவே சாகுபடி தாமதமாகி விட்டது. ஒரு ஏக்கர் சாகுபடி செய்ய ரூ. 25 ஆயிரம் செலவாகும். கடன் வாங்கி தான் சாகுபடி செய்ய வேண்டும். இந்த நிலையில் தண்ணீர் திறப்பது தாமதித்தால், பயிர் மகசூல் பாதிக்கும்” என்றனர்.இதுகுறித்து அதிகாரிகள் தரப்பில் கேட்டதற்கு, “இருபோக ஆயக்கட்டு பகுதிக்கு தான் தண்ணீர் திறக்க முடியும். அதே நாளில் மேலூர் பகுதியிலுள்ள ஒருபோக ஆயக்கட்டு மற்றும் திருமங்கலம் கால்வாய் பாசனத்திற்கும் தண்ணீர் திறக்க அங்குள்ள விவசாயிகள் கோருகிறார்கள். அதன்படி திறக்க 6 ஆயிரம் மில்லியன் கனஅடி தண்ணீர் தேவைப்படும். அந்த அளவுக்கு தண்ணீர் இல்லை. 2 நாளில் வடகிழக்கு பருவமழை ஆரம்பமாகி விடும் என வானிலை தகவல் வெளியாகி உள்ளது. அதை எதிர்பார்த்து காத்திருக்கிறோம். இது தொடர்பாக 25ம் தேதி (நாளை) விவசாயிகளுடன் பேசப்படும். அதன்பிறகு தண்ணீர் திறக்கும் தேதி முடிவு செய்து, அரசுக்கு பரிந்துரைக்கப்படும். அரசு உத்தரவிட்டதும் தண்ணீர் திறக்கப்படும்.” என்றனர். நவம்பர் 1ம் தேதி வைகை அணையில் இருந்து பாசனத்துக்கு தண்ணீர் திறக்க அதிகாரிகள் திட்டமிட்டுள்ளதாக தெரிகிறது.

துறையூர் அருகே மக்களே தூர்வாரிய ஏரியில் நீர்வரத்து

Tuesday October 24th, 2017 10:33:00 AM
துறையூர்: துறையூர் அருகே பொதுமக்கள், இளைஞர்கள், நாட்டு நலப்பணித்திட்ட மாணவர்கள் ஒன்றிணைந்து தூர்வாரிய ஏரியில் நீர்வரத்து அதிகரிப்பால்  பொது மக்கள் மகிழ்ச்சியடைந்தனர். திருச்சி மாவட்டம் துறையூரை அடுத்துள்ளது திண்ணனூர். இங்குள்ள ஏரி 74 ஏக்கர் பரப்பளவு கொண்டதாகும். 300 ஏக்கருக்கும் மேல் பாசனபரப்பளவு உள்ளது. கடந்த பல ஆண்டுகளாக ஏரி தூர் வாரப்படாததாலும், நீர் ஆதாரத்திற்கான வரத்து வாய்க்கால்கள் தூர்ந்து போய் ஏரிக்கு நீர் வரத்தின்றி இருந்தது. இதையடுத்து கிராமமக்கள் ஒன்றுசேர்ந்து ஏரியை  தூர்வார முடிவு செய்தனர். இளைஞர்கள் ராஜராஜசோழன் சதாநந்தம், அமரஜோதி, நகுலேஷ் ராஜா, யோகேஸ்வரன் ஆகியோர் தலைமையில் குழுக்கள் அமைக்கப்பட்டு மாவட்ட கலெக்டருக்கு தகவல் தெரிவித்தனர். அக்டோபர் 1ம் தேதி முசிறி ஆர்டிஓ, ஏரி தூர்வாரும் பணியை தொடங்கி வைத்தார். பொதுமக்களுடன் நாட்டு நலப்பணி திட்ட மாணவர்களும் சேர்ந்து ஏரியை தூர் வாரினர். பின்னர் ஏரிக்கு வரும் நீர்வரத்து வாய்க்கால்களை பல இடங்களில் ஒன்றிணைத்து சுமார் 6 கிமீ தூரத்திற்கு தூர்வாரி சீரமைத்தனர். தற்போது பெய்தமழையில் ஏரிக்கு நீர்வரத்து ஏற்பட்டுள்ளது கண்டு திண்ணனூர் மக்கள் மகிழ்சியடைந்துள்ளனர். இதுபற்றி ராஜராஜசோழன் கூறுகையில், எங்கள் ஊர்ஏரி வரத்து வாய்க்கால்கள் தூர்ந்து ஏரிக்கு நீர் வரத்து இல்லாமல் நீர்மட்டம் குறைந்துவிட்டது. குடிநீர் தட்டுப்பாடும் ஏற்பட்டுள்ளது. இதனால் அரசை எதிர்பார்க்காமல் ஏரியை தூர்வார முடிவெடுத்து இளைஞர்கள் ஒன்று சேர்ந்து பொதுமக்களின் ஒத்துழைப்பையும் பெற்றோம். இதற்காக சிலர் முன்வந்து தங்களால் இயன்ற தொகையை வழங்கி வருகின்றனர். இதுவரை ரூ.1.50 லட்சம் வரை செலவு செய்து பணிகளை மேற்கொண்டோம். தற்போது ஏரிக்கு நீர்வந்துள்ளது மகிழ்ச்சியாக உள்ளது. அக்டோபர் 2ம்தேதி நடைபெற்ற கிராமசபை கூட்டத்தில் ஏரிக்கு தூர்வார ரூ.5லட்சம் ஒன்றிய நிதியில் ஒதுக்கீடு செய்ய நடவடிக்கை எடுக்கப்படும் என ஒன்றிய அலுவலர் தெரிவித்தார். அதை வழங்கினால் இன்னும் பணி நன்றாக நடைபெறும். 77 ஏக்கர் ஏரியில் தற்போது 55 ஏக்கர் தான் உள்ளது. மாவட்ட கலெக்டர் நடவடிக்கை எடுத்து ஆக்கிரமிப்புகளை அகற்றி தரவேண்டும் என்றார்.ரூ.1.50 லட்சம் செலவுஅரசின் தாய் 2 திட்டத்தில் குட்டைக்கு ரூ.25லட்சம் வரை ஒதுக்கீடு செய்யப்பட்டு குளம், குட்டைகள் தூர்வாரும் பணி நடை பெறுகிறது. அந்த குட்டைகளில் ரூ.1லட்சம் கூட செலவு செய்யாமல் மண்ணை மட்டும் அள்ளி கரையில் கொட்டி கணக்கு காட்டிவிட்டு செல்லும் நிலையில் அரசை எதிர்பாராமல் வெறும் ரூ.1.50லட்சம் செலவில் ஏரியை தூர் வாரியது ஆச்சர்யத்தை ஏற்படுத்தியுள்ளது.

புதுச்சேரி சட்டப்பேரவை முன் போராட்டம்

Tuesday October 24th, 2017 10:32:00 AM
புதுச்சேரி: புதுச்சேரி சட்டப்பேரவை முன் அனைத்து இந்திய இளைஞர் பெருமன்றத்தினர் போராட்டத்தில் ஈடுபட்டுள்ளனர். 201 அரசு தொடக்கப் பள்ளி ஆசிரியர் பணியிடங்கள் ரத்து செய்யப்பட்டதற்கு கண்டனம் தெரிவித்துள்ளனர்.


வர்த்தக தொடக்கத்தில் சென்செக்ஸ் 156 புள்ளிகள் உயர்வு

Tuesday October 24th, 2017 10:50:00 AM
மும்பை: இன்று காலை வர்த்தக தொடக்கத்தில் சென்செக்ஸ் 156 புள்ளிகள் உயர்ந்து காணப்பட்டது. கடந்த வர்த்தகத்தில் குறியீடு 116.76 புள்ளிகளாக உயர்ந்துள்ளதை அடுத்து, இன்று மும்பை பங்குச்சந்தை குறியீட்டு எண் சென்செக்ஸ் 156.24 புள்ளிகள் உயர்ந்து 32,662.96 புள்ளிகளாக உள்ளது. எண்ணெய் & எரிவாயு, ரியல் எஸ்டேட், பொதுத்துறை மற்றும் உலோகம் போன்ற முன்னணி நிறுவன பங்குகள் விலை அதிகரித்து காணப்பட்டது. தேசிய பங்குச்சந்தை குறியீட்டு எண் நிஃப்டி 34.25 புள்ளிகள் அதிகரித்து 10,219.10 புள்ளிகளாக உள்ளது. ஓஎன்ஜிசி, என்டிபிசி, டாடா ஸ்டீல், இந்துஸ்தான் யூனிலீவர், ஆக்ஸிஸ் வங்கி, ஆசிய பெயிண்ட், ஐசிஐசிஐ வங்கி, கோல் இந்தியா, எஸ்பிஐ, மாருதி சுசூகி, விப்ரோ மற்றும் பவர் கிரிட், போன்ற நிறுவன பங்குகள் விலை 2.42% வரை அதிகரித்திருந்தது.ஆசியாவின் இதர பங்குச்சந்தையான, சீனாவின் ஹாங்காங்கின் ஹாங் செங் 0.12%, ஷாங்காய் கூட்டுக் குறியீடு 0.09% மற்றும் ஜப்பான் நாட்டின் நிக்கேய் 0.17% உயர்ந்து காணப்பட்டது. கடந்த வர்த்தகத்தில் அமெரிக்க டவ் ஜோன்ஸ் தொழில்துறை சராசரியாக 0.23% வரை குறைந்திருந்தது குறிப்பிடத்தக்கது.

டாலருக்கு எதிரான இந்திய ரூபாயின் மதிப்பு 11 காசுகள் உயர்வு

Tuesday October 24th, 2017 10:44:00 AM
மும்பை: இன்றைய வர்த்தகநேர துவக்கத்தில் அந்நிய செலாவணி சந்தையில், அமெரிக்க டாலருக்கு எதிரான இந்திய ரூபாயின் மதிப்பு 11 காசுகள் உயர்ந்து ரூ.64.91 காசுகளாக உள்ளது. வங்கிகள் மற்றும் ஏற்றுமதியாளர்களிடையே அமெரிக்க டாலரின் தேவை குறைந்துள்ளது, உலகளவில் மற்ற நாணயங்களுக்கு எதிரான டாலரின் பலவீனம் மற்றும் உள்நாட்டு பங்குச்சந்தையில் காணப்படும் உயர்வு போன்ற காரணங்களால் இந்திய ரூபாயின் மதிப்பில் உயர்வு காணப்படுவதாக அந்நிய செலாவணி விநியோகஸ்தர் தெரிவித்துள்ளார். கடந்த வர்த்தகத்தில் டாலருக்கு எதிரான இந்திய ரூபாயின் மதிப்பு 2 காசுகள் அதிகரித்து ரூ.65.02 காசுகளாக இருந்தது குறிப்பிடத்தக்கது.

இந்தியன் ஓவர்சீஸ் வங்கி கடன் வட்டி குறைப்பு

Tuesday October 24th, 2017 12:43:00 AM
சென்னை: வங்கிகள் கடன் வட்டி விகிதங்களை எம்சிஎல்ஆர் முறைப்படி நிர்ணயித்து வருகின்றன. இந்த வகையில் இந்தியன் ஓவர்சீஸ் வங்கி (ஐஓபி), மூன்று மாதம் வரையிலான எம்சிஎல்ஆர் விகிதத்தை 35 அடிப்படை புள்ளிகளும், 6 மாதங்களுக்கு 30 அடிப்படை புள்ளிகளும், ஓராண்டு முதல் மூன்று ஆண்டு வரை 15 அடிப்படை புள்ளிகளும் குறைத்துள்ளது. அதாவது, ஓராண்டுக்கான எம்சிஎல்ஆர் வட்டி 8.55 சதவீதத்தில் இருந்து 8.40 சதவீதமாக குறைக்கப்பட்டுள்ளது. 3 மற்றும் 6 மாதங்களுக்கான எம்சிஎல்ஆர் வட்டி முறையே 8.10 சதவீதம், 8.20 சதவீதம் என இருக்கும். இதன்படி புதிய வீட்டுக்கடன் வட்டி ₹30 லட்சம் வரை 8.40 சதவீதமாக வசூலிக்கப்படும். செப்டம்பரை விட இது 15 அடிப்படை புள்ளிகள் குறைவாகும். புதிய வட்டி விகிதம் இந்த மாதம் 10ம் தேதி முதல் நடைமுறைக்கு வந்துள்ளது என இந்தியன் ஓவர்சீஸ் வங்கி அறிக்கையில் கூறப்பட்டுள்ளது. இது தவிர, சுப கிரஹா திட்டம், என்ஆர்ஐ வீட்டு கடன், வீடு புதுப்பித்தல் மற்றும் அழகுபடுத்தும் திட்டங்களின் கீழ் வீட்டு கடன்கள் மற்றும் வாகன கடன்களுக்கான செயல்பாட்டு கட்டணங்களை விழாக்கால சலுகையாக 3.10.2017 முதல் 31.1.2018 வரை ரத்து செய்து இந்த வங்கி அறிவிப்பு வெளியிட்டுள்ளது.

ஆந்திர மலை வெங்காயத்துக்கு திடீர் மவுசு சின்ன வெங்காயம் கிலோ 120 வரை அதிகரிப்பு

Tuesday October 24th, 2017 12:43:00 AM
நெல்லை: அன்றாடம்  சமையலுக்கு பயன்படுத்தப்படும் சின்ன வெங்காயம் விலை நெல்லையில் கிலோ ரூ.120 ஆனதால்  ஆந்திராவின் மலை வெங்காயத்திற்கு திடீர் மவுசு ஏற்பட்டுள்ளது. கடந்த  ஒரு வருடமாக தமிழகத்தில் பருவமழை சீராக பெய்யாததால் நெல் சாகுபடி  மட்டுமின்றி காய்கனி உள்ளிட்ட பிற தானியங்களின் விளைச்சலும்  பாதிக்கப்பட்டுள்ளது. இதில் அன்றாடம் சமையலுக்கு அத்தியாவசிய பயன்பாடாக  உள்ள சின்னவெங்காயம் மற்றும் பல்லாரி விளைச்சலும் கடுமையாக  பாதிப்படைந்துள்ளது.  இதன் காரணமாக கடந்த 6 மாதத்திற்கு முன் கிலோ 20க்கு விற்ற சின்னவெங்காயம் ெதாடர்ந்து படிப்படியாக உயர்ந்து வருகிறது.  கடந்த வாரம் முதல் தரம் சின்னவெங்காயம் கிலோ 80 முதல் 90 வரை  விற்பனையானது. நேற்று நெல்லை நயினார்குளம் மார்க்கெட்டில் கிலோ 110 ஆக  உயர்ந்துள்ளது. சில்லரை விற்பனை கடைகளில் 120 வரை விற்பனை  செய்யப்படுகிறது. இதேபோல் கடந்த 2 வாரங்களுக்கு முன் பல்லாரி கிலோ 20 முதல் 25 வரை விற்பனையானது. தற்போது 20 உயர்ந்து 45 ஆக விற்பனை  செய்யப்படுகிறது. இதனால் கிலோ 25க்கு விற்பனை செய்யப்படும் ஆந்திரா  வெங்காயத்திற்கு திடீர் மவுசு ஏற்பட்டுள்ளது. ஆந்திரா, கர்நாடகாவில் மழை எதிரொலியால் வேலூர் மார்க்கெட்டுக்கு வெங்காயம் வரத்து 70 சதவீதம் குறைந்துள்ளது. இதனால் இதனால் 30க்கு விற்பனை செய்யப்பட்ட வெங்காயம் 40, 45 என்று விலை அதிகரித்துள்ளது. சேலத்தில் கடந்த மாதம் கிலோ 40 முதல் 50க்கு  விற்ற ஒரு கிலோ சின்ன வெங்காயம், படிப்படியாக விலை அதிகரித்து, கிலோ 80க்கு விற்கப்பட்டது.  பெரிய வெங்காயம் விலையும் அதிகரித்துள்ளது. கடந்த ஒன்றரை மாதத்திற்கு  முன்பு 4 கிலோ 50க்கு விற்ற பெரிய வெங்காயம், நேற்று 2 கிலோ  100க்கு  விற்கப்பட்டது. வியாபாரிகள் கூறுகையில், தமிழகத்தில் நடப்பாண்டு சிறிய  வெங்காயம் சாகுபடி குறைந்து வரத்து சரிந்துள்ளது. தற்போது திருமண சீசன்  தொடங்கியிருப்பதால் தேவை அதிகரித்துள்ளது.ஆந்திரா, கர்நாடகாவில் மழை பெய்து வருவதால் காய்கறிகள் விளைச்சல் பாதித்துள்ளது. வழக்கமாக வேலூர் மார்க்கெட்டிற்கு வெங்காயம் லாரிகளில் 10 லோடு கொண்டுவரப்படும், மழையால் 70 சதவீதம் வரத்து குறைந்து 2 முதல் 3 லோடு வெங்காயம் மட்டுமே வருகிறது. இதனால் ஒரு கிலோ 30க்கு விற்பனை செய்த வெங்காயம் 40, 45 என்று விற்பனை செய்யப்படுகிறது. பொங்கல் பண்டிகை வரை விலை குறைய வாய்ப்பில்லை’ என்றனர்.சென்னை கோயம்பேடு மார்க்கெட்டில் 15 லாரிகளில் சின்ன வெங்காயம் வரத்து இருந்தது. அப்போது கிலோ 30க்கு விற்கப்பட்டது. தற்போது 7 லாரிகளில் மட்டுமே வருவதால் கிலோ 100 ஆக உயர்ந்துள்ளது.

ஆந்திராவில் அரபு நிறுவனங்கள் 48,750 கோடி முதலீடு

Tuesday October 24th, 2017 12:43:00 AM
அமராவதி: துபாயை தலைமையிடமாக கொண்டு இயங்கும் 2 நிறுவனங்கள் ஆந்திராவில் 48,750 கோடி முதலீடு செய்ய உள்ளன. துபாயை சேர்ந்த ஏவியேஷன் சிட்டி நிறுவனம் ஆந்திராவை விமான பயன்பாட்டு மையமாக மேம்படுத்த 550 கோடி டாலர் (35,750 கோடி) முதலீடு செய்ய முடிவு செய்துள்ளது. இதுபோல், பின் ஜயீத் குழுமம் ஆந்திராவில் பல்வேறு உள்கட்டமைப்பு திட்டங்களில் 200 கோடி டாலர் (13,000 கோடி) முதலீடு செய்ய உள்ளது. இதற்கான ஒப்பந்தங்கள் இந்த நிறுவனங்களுக்கும் ஆந்திர பொருளாதார மேம்பாட்டு வாரியத்துக்கும் இடையே நேற்று கையெழுத்தாகின. இதன்மூலம் நேரடியாகவும், மறைமுகமாகவும் 20,000 பேருக்கு வேலை கிடைக்கும் என எதிர்பார்க்கப்படுகிறது. ஆந்திர முதல்வர் சந்திரபாபு நாயுடு ஐக்கிய அரபு எமிரேட் செல்ல உள்ள நிலையில் இந்த ஒப்பந்தங்கள் கையெழுத்தாகியுள்ளன.

எட்டு நாடுகளில் எடுக்கப்பட்ட ஆய்வில் தகவல் 64% இந்தியர்கள் வங்கிச்சேவையை பயன்படுத்துகின்றனர்

Tuesday October 24th, 2017 12:43:00 AM
புதுடெல்லி: இந்தியர்கள் 64 சதவீதம் பேர் வங்கியை பயன்படுத்துகின்றனர் என ஆய்வு ஒன்றில் தெரிய வந்துள்ளது. மக்களிடையே வங்கி கணக்கு பயன்பாடு தொடர்பாக இந்தியா, வங்கதேசம், கென்யா, நைஜீரியா, பாகிஸ்தான், தான்சானியா மற்றும் உகாண்டாவில் ஆய்வு ஒன்று நடத்தப்பட்டது. 2016ம் ஆண்டை அடிப்படையாக கொண்ட இந்த ஆய்வில் இந்தியாவில் சுமார் 45,000 பேரிடம் சர்வே எடுக்கப்பட்டது. இதில் 64 சதவீதம் இந்தியர்கள் வங்கி கணக்கு பயன்படுத்துவதாக கூறியுள்ளனர். இதுபோல் ஆண்கள் 47 சதவீதம் பேரும், பெண்கள் 33 சதவீதம் பேரும் வங்கி கணக்கு பயன்படுத்துகின்றனர். நகர்ப்புறங்களில் உள்ளவர்கள் அதிகமாக பயன்படுத்துகின்றனர். அதாவது நகர்ப்புறங்களில் உள்ளவர்கள் 46 சதவீதம் பேரும், புறநகர்களில் உள்ளவர்கள் 37 சதவீதம் பேரும் வங்கி கணக்கை பயன்படுத்துகின்றனர். மற்ற நாடுகளை விட இந்தியர்களிடையேதான் வங்கி பயன்பாடு அதிகம் உள்ளது. இந்தியர்கள் 64 சதவீதத்துடன் முதல் இடத்தில் இருக்கின்றனர். இதை தொடர்ந்து நைஜீரியா (41%),,  கென்யா (31%), இந்தோனேஷியா (30%), வங்கதேசம் (19%), பாகிஸ்தான் (9%)) ஆகியவை அடுத்தடுத்த இடங்களை பிடித்துள்ளன. மொத்த வங்கி கணக்குகளில் சுமார் 21% ஜன்தன் கணக்குகளாக உள்ளன. முந்தைய ஆண்டில் இது 19 சதவீதமாக இருந்தது என ஆய்வில் கூறப்பட்டுள்ளது.

செபி நெருக்கடியை தொடர்ந்து யுனைடெட் புரூவரீசில் இருந்து வெளியேறுகிறார் மல்லையா

Tuesday October 24th, 2017 12:43:00 AM
புதுடெல்லி: விஜய் மல்லையா யுனைடெட் புரூவரிஸ் நிறுவன பொறுப்பில் இருந்து வெளியேற்றப்பட உள்ளார். இவருக்கு பதில் புதிய தலைவரை நியமிக்க செபியிடம் அனுமதி கோரப்பட்டுள்ளது. கிங்பிஷர் அதிபர் விஜய் மல்லையா, பாரத ஸ்டேட் வங்கி உள்ளிட்ட 17 வங்கிகளில் வாங்கிய கடன், வட்டியுடன் சேர்த்து ₹9,000 கோடிக்கு மேல் நிலுவையில் உள்ளது. இவர் மீது கடன் மோசடி, சட்ட விரோத பண பரிவர்த்தனை மோசடி உள்ளிட்ட பல்வேறு வழக்குகள் நிலுவையில் உள்ளன. இவரை லண்டனில் பதுங்கியுள்ள இவரை இந்தியாவுக்கு நாடு கடத்தும் முயற்சிகள் நடைபெற்று வருகின்றன.  இதற்கிடையில், பல்வேறு மோசடிகளில் தொடர்புடைய மல்லையா, பங்குச்சந்தையில் பட்டியலிடப்பட்ட நிறுவனம் எதிலும் பதவி வகிக்க கூடாது என உத்தரவு பிறப்பித்துள்ளது. இதன்படி யுனைடெட் புரூவரீஸ் பொறுப்பில் இருந்து அவர் வெளியேற வேண்டிய நிர்பந்தம் ஏற்பட்டுள்ளது. மல்லையா இந்த நிறுவனத்தின் வாழ்நாள் தலைவராக நியமிக்கப்பட்டவர்.  இருப்பினும் செபி உத்தரவை தொடர்ந்து இந்த பதவியில் நீடிக்க முடியாத நிலை இவருக்கு ஏற்பட்டுள்ளது. யுனைடெட் புரூவரீஸ் இயக்குநரான சி.ஓய்.பால் தற்காலிகமாகமாக இந்த நிறுவனத்தின் தலைவர் பொறுப்பை வகித்து வருகிறார். இவர் தலைவர் பதவியில் அமர்த்தப்படலாம் எனவும், இதற்கான அனுமதியை செபியிடம் நிறுவனம் கோரியுள்ளதாகவும் நிறுவன வட்டாரங்கள் தெரிவிக்கின்றன. ஆனால் மல்லையா மற்றும் யுனைடெட் புரூவரீஸ் தரப்பிலிருந்து அதிகாரப்பூர்வ தகவல்கள் வெளியாகவில்லை. செபி உத்தரவுப்படி மல்லையா தானாக முன்வந்து பதவி விலகலாம். அதோடு, தனக்கு பதிலாக புதிய தலைவரை அவரே பரிந்துரைக்கலாம் எனவும் நிறுவன வட்டாரங்கள் தெரிவிக்கின்றன.

பம்ப்செட் மூலப்பொருள் விலை 15 % உயர்வு: கோவை உற்பத்தியாளர்கள் அதிர்ச்சி

Tuesday October 24th, 2017 12:43:00 AM
கோவை: மோட்டார் பம்ப்செட் உற்பத்திக்கு தேவையான மூலப்பொருட்களான ஸ்டீல் ராடு விலை டன்னுக்கு 10 ஆயிரமும், ஸ்டெயின்லெஸ் ஷீட் டன்னுக்கு 20 ஆயிரமும் உயர்ந்துள்ளது. மோட்டார் பம்ப்செட் உற்பத்தி சீசன் துவங்குவதற்கு முன்பே விலை உயர்ந்துள்ளதால், கோவை உற்பத்தியாளர்கள் அதிர்ச்சியடைந்துள்ளனர். வீடு, விவசாயம், தொழிற்சாலை உள்ளிட்ட பல்வேறு பயன்பாடுகளுக்கு தேவையான மோட்டார் பம்ப்செட் நாட்டின் தேவையில் 45 சதவீதம் கோவையில் உற்பத்தியாகிறது. இதில் 3 ஆயிரம் குறு, சிறு உற்பத்தியாளர்கள் மூலம் 50 சதவீதமும், 100 நடுத்தர மற்றும் பெரிய உற்பத்தியாளர்கள் மூலம் 50 சதவீதமும் உற்பத்தியாகிறது. நவம்பர் முதல் ஜூலை வரையிலான காலம் பம்ப்செட் உற்பத்தி மற்றும் விற்பனை காலமாக உள்ளது. இக்காலத்தில் இங்கு தினசரி 100 கோடி மதிப்பிலான மோட்டார் பம்ப்செட் உற்பத்தியாகிறது.  மோட்டார் பம்ப்செட் உற்பத்திக்கு ஸ்டார்மிங், காப்பர், காஸ்ட் அயர்ன், ஸ்டீல் ராடு, ஸ்டெயின்லெஸ் ஷீட் ஆகிய மூலப்பொருள் தேவைப்படுகிறது. இவை வட மாநிலங்களில் உற்பத்தியாகிறது. இவற்றை கோவையிலுள்ள உற்பத்தியாளர்கள் வட மாநிலங்களில் உள்ள வியாபாரிகளிடம் இருந்து வரவழைக்கின்றனர்.  இந்நிலையில், ஸ்டீல் ராடு மற்றும் ஸ்டெயின்லெஸ் ஷீட் ஆகியவற்றின் விலை இம்மாதத்தில் 15 சதவீதம் அதிகரித்துள்ளது. இதனால் கோவையிலுள்ள மோட்டார் பம்ப்செட் உற்பத்தியாளர்கள் அதிர்ச்சி அடைந்துள்ளனர். இது குறித்து கோவை பம்ப்செட் மற்றும் உதிரிபாகங்கள் தயாரிப்பாளர்கள் சங்கம் (கோப்மா) தலைவர் மணிராஜ் கூறியதாவது: கோவையிலுள்ள குறு, சிறு பம்ப்செட் உற்பத்தியாளர்கள் தங்களுக்கு தேவையான மூலப்பொருட்களை வட மாநிலங்களில் உள்ள வியாபாரிகளிடம் ஆர்டர் கொடுத்து வாங்குவது வழக்கம். ஸ்டீல் ராடு ஒரு டன் கடந்த மாதம் 70 ஆயிரமாக இருந்தது. இம்மாதத்தில் 80,000 ஆக உள்ளது. ஸ்டெயின்லெஸ் ஸ்டீல் ஷீட் ஒரு டன் கடந்த மாதம் 1.20 லட்சமாக இருந்தது. இந்த மாதம் 1.40 லட்சமாக உள்ளது. ஸ்டீல் ராடு டன்னுக்கு 10 ஆயிரமும், ஸ்டெயின்லெஸ் ஷீட் டன்னுக்கு 20 ஆயிரமும் அதிகரித்துள்ளது.  மோட்டார் பம்ப்செட் உற்பத்தி சீசன் அடுத்த மாதம் தான் துவங்குகிறது. அதற்கு முன்பே 15 சதவீதம் உயர்ந்துள்ளது. சீசன் நேரத்தில் மேலும் உயர வாய்ப்புள்ளது. தற்போதைய மூலப்பொருள் விலை உயர்வால் மோட்டார் பம்ப்செட் உற்பத்தி செலவு 15 சதவீதம் அதிகரிக்கும் நிலை ஏற்பட்டுள்ளது.  மத்திய, மாநில அரசுகள் மோட்டார் பம்ப்செட் மூலப்பொருள் பதுக்கலை தடுக்க வேண்டும், இவற்றின் விலையை ஆண்டிற்கு ஒருமுறை உயர்த்தும் வகையில் நடவடிக்கை எடுக்க வேண்டும். கோவையில் மோட்டார் பம்ப்செட் மூலப்பொருள் கிடங்கு ஏற்படுத்தி, உற்பத்தியாளர்களுக்கு வினியோகிக்க நடவடிக்கை எடுக்க வேண்டும். கோவையின் பாரம்பரிய மோட்டார் பம்ப்செட் உற்பத்தி தொழிலை பாதுகாக்க வேண்டும் என்றார்.

குமரி மாவட்டத்தில் சிப்பி மீன் சீசன் தொடக்கம்

Tuesday October 24th, 2017 12:43:00 AM
குளச்சல் : குமரி மாவட்டத்தில் சிப்பி மீன் சீசன் தொடங்கியுள்ளது. குமரி மாவட்டத்தில் விசைப்படகு மூலம் கணவாய், இறால்,புல்லன்,கேரை,சுறா,கிளி மீன்கள்,நாக்கண்டம் போன்றவை பிடிக்கப்படுகிறது. இவை தவிர கட்டுமரம், பைபர் வள்ளங்களில் சாளை, நெத்திலி, சூரை, அயிரை போன்ற மீன்கள் பிடிக்கப்படுகிறது.  இவற்றுள் இறால்,கணவாய், கேரை, சுறா ஆகிய மீன்களுக்கு வெளிநாடுகளில் அதிக மவுசு உள்ளதால் விசைப்படகு மீனவர்கள் இம்மீன்களை ஆழ்கடல் பகுதி வரை சென்று பிடித்து வருகின்றனர். இந்த மீன் வகைகளுக்கு அடுத்தப்படியாக குமரி மாவட்டத்தில்  கடல் பாறைகளிலிருந்து தோடு எனப்படும் சிப்பி மீன்கள் எடுக்கப்படுகிறது. கடல் பாறை அடிப்பகுதியில் ஒட்டியிருக்கும் இந்த சிப்பிகளை மூச்சு பயிற்சி பெற்ற மீனவர்கள் பாறை அடிப்பகுதி வரை மூழ்கி சென்று எடுத்து வருகின்றனர். சிப்பி மீன்கள் குமரி மாவட்டத்தில் குளச்சல், குறும்பனை, கடியப்பட்டணம், இனயம் ஆகிய கடற்கரை கிராமங்களில் எடுக்கப்படுகிறது. நவம்பர், டிசம்பர் மாதங்கள்தான் சிப்பி மீன்களின் சீசன் ஆகும்.  தற்போது குளச்சலை தவிர பிற கடற்கரை கிராமங்களில் சிப்பி மீன் சீசன் துவங்கிவுள்ளது. நேற்று கடியப்பட்டணம், இனயம் ஆகிய கிராமங்களில் எடுக்கப்பட்ட ஏராளமான சிப்பி மீன்கள் குளச்சல் மீன் சந்தைக்கு விற்பனைக்கு வந்தன.100 எண்ணம் கொண்ட சிப்பி மீன்கள் 300 முதல் 400 வரை விலை போனது. இதனால் சிப்பி மீன் எடுக்கும் மீனவர்கள் மகிழ்ச்சியடைந்தனர். கேரளாவில் அதிக மவுசுசிப்பி மீன்களுக்கு கடந்த சில வருடங்களாக கேரள மாநிலத்தில் நல்ல மவுசு ஏற்பட்டுள்ளது. மீன் சந்தை,ஓட்டல்கள் மற்றும் மதுபான பார்களிலும் இதற்கு நல்ல வரவேற்பு உள்ளது.இதனால்  சிப்பி மீன்களை வாங்கி செல்வதற்கு கேரள வியாபாரிகள்  குமரி மாவட்டத்தில் முகாமிட்டுள்ளனர்.

மக்காச்சோளம் விலை டன்னுக்கு 1,000 உயர்வு

Tuesday October 24th, 2017 12:43:00 AM
பரமத்திவேலூர்: பரமத்திவேலூர் தாலுகாவிற்கு உட்பட்ட சோழசிராமணியில் மக்காச்சோளம் விலை டன்னுக்கு 1000 அதிகரித்ததால், விவசாயிகள் மகிழ்ச்சி அடைந்தனர்.  இங்கிருந்து தமிழகம் மட்டுமின்றி ஆந்திரா, கேரளா, கர்நாடகா, உத்தரபிரதேசம் உள்ளிட்ட பல்வேறு மாநிலங்களுக்கும் மக்காச்சோளம் அனுப்பி வைக்கப்படுகிறது. ஒழுங்குமுறை விற்பனை கூடத்தில் கடந்த வாரம் நடந்த ஏலத்தில் ஒரு டன் மக்காச்சோளம் 30 ஆயிரத்திற்கு விற்பனையானது. இந்த வாரம் விலை உயர்ந்து டன் 31 ஆயிரத்திற்கு விற்பனையானது.

அன்னாசி கிலோ 31க்கு கொள்முதல்

Tuesday October 24th, 2017 12:43:00 AM
குலசேகரம்: தமிழகத்தில் அதிகமாக அன்னாசி உற்பத்தியாகும் பகுதியாக கன்னியாகுமரி மாவட்டம் திகழ்கிறது.  கடந்த சில மாதங்களுக்கு முன்பு முதல் தர அன்னாசி பழம் கிலோ 40 ஆக இருந்த நிலையில், தற்போது கேரளா, குமரி  மாவட்டத்தில் அன்னாசி பழ விளைச்சல் அதிகரித்துள்ளதால் அதன் விலையில் நிலையற்ற தன்மை ஏற்பட்டுள்ளது. சில வாரங்களுக்கு முன்பு, முதல் தர அன்னாசி கிலோ ஒன்று 28 என்று இருந்த நிலையில், கடந்த 4 நாட்களாக  முதல் தர அன்னாசி 31க்கும், 2ம்தர அன்னாசி கிலோ 20க்கும் கொள்முதல் செய்யப்பட்டு வருகிறது. புதிய வரவான பச்சை அன்னாசி கிலோ 26க்கு கொள்முதல் செய்யப்பட்டு வருகிறது.

கொப்பரை விலை தொடந்து ஏறுமுகம்

Tuesday October 24th, 2017 12:43:00 AM
பரமத்தி: கரூர் மாவட்டம் க.பரமத்தி ஒன்றியத்தில் 15க்கும் மேற்பட்ட ஊர்களில் தென்னை சாகுபடி செய்யப்படுகிறது கொப்பரை தேங்காய்களை அருகில் உள்ள சாலைபுதூர் ஒழுங்கு முறை விற்பனை கூடத்தில் திங்கட்கிழமைகளில் நடைபெறும் ஏலத்திற்கு கொண்டு விற்று வருகின்றனர்.  நேற்று நடந்த ஏலத்தில் 272  கொப்பரை தேங்காய் மூட்டைகள் ஏலம் விடப்பட்டது. இதில் முதல் ரகம்  ஒரு கிலோ 113க்கு ஏலம் போனது. கடந்த வாரத்தை விட இந்தவாரம் அதிக விலைக்கு ஏலம் போனதால் தென்னை விவசாயிகள் மகிழ்ச்சி அடைந்துள்ளனர்.

முட்டை விலை 405 காசாக உயர்வு

Tuesday October 24th, 2017 12:43:00 AM
நாமக்கல்: நாமக்கல்லில், தேசிய முட்டை ஒருங்கிணைப்பு குழுவின் விலை நிர்ணய குழு கூட்டம் நேற்று நடைபெற்றது. இதில், முட்டை விலையில் மேலும் 6 காசுகள் உயர்த்தி பண்ணை கொள்முதல் விலை 405 காசாக நிர்ணயம் செய்யப்பட்டது. கடந்த 10 நாளில் முட்டை விலை 18 காசு வரை அதிகரித்துள்ளது. மற்ற மண்டலங்களில் முட்டை விலை விபரம் (காசுகளில்்): ஐதராபாத் 395, விஜயவாடா 394, மும்பை 435, மைசூர் 415, பெங்களூரு 415, கொல்கத்தா 432, டெல்லி 410 காசுகள்.

தங்கம் விலை ரூ.200 குறைவு

Tuesday October 24th, 2017 12:01:00 AM
புதுடெல்லி: சர்வதேச சந்தையில் ஏற்பட்டுள்ள மாற்றம் மற்றும் உள்ளூர் நகை வியாபாரிகள், வர்த்தகர்கள் தங்கம் வாங்க ஆர்வம் காட்டாதது, பண்டிகை கால நிறைவு உள்ளிட்ட காரணங்களால் நேற்று தலைநகர் டெல்லியில் அதன் விலை ரூ.200 குறைந்து, 10 கிராம் ரூ.30,450க்கு விற்கப்பட்டது. எனினும் ஆபரண தங்கத்தின் விலை எவ்வித மாற்றமுமின்றி 8 கிராம் ரூ.24,700க்கு விற்கப்பட்டது. ஆனால் தொழில் நிறுவனங்கள் மற்றும் நாணய தயாரிப்பாளர்கள் வெள்ளி உலோகம் மீது ஆர்வம் காட்டியதால், வெள்ளி விலை ரூ.50 உயர்ந்து, கிலோ ரூ.40,900க்கு விற்கப்பட்டது. வாரச்சந்தையிலும் இதன் விலை ரூ.835 அதிகரித்து, கிலோ ரூ.40,710க்கு விற்பனையானது.

டாலருக்கு எதிரான இந்திய ரூபாயின் மதிப்பு 6 காசுகள் சரிவு

Monday October 23rd, 2017 10:54:00 AM
மும்பை: இன்றைய வர்த்தகநேர துவக்கத்தில் அந்நிய செலாவணி சந்தையில், அமெரிக்க டாலருக்கு எதிரான இந்திய ரூபாயின் மதிப்பு 6 காசுகள் சரிந்து ரூ.65.10 காசுகளாக உள்ளது. வங்கிகள் மற்றும் இறக்குமதியாளர்களிடையே அமெரிக்க டாலரின் தேவை உயர்ந்துள்ளது, உலகளவில் மற்ற நாணயங்களுக்கு எதிரான டாலரின் பலவீனம் மற்றும் உள்நாட்டு பங்குச்சந்தையில் காணப்படும் உயர்வு போன்ற காரணங்களால் இந்திய ரூபாயின் மதிப்பில் சரிவு காணப்படுவதாக அந்நிய செலாவணி விநியோகஸ்தர் தெரிவித்துள்ளார். கடந்த வர்த்தகத்தில் டாலருக்கு எதிரான இந்திய ரூபாயின் மதிப்பு 2 காசுகள் குறைந்து ரூ.65.04 காசுகளாக இருந்தது குறிப்பிடத்தக்கது.

தொடர் மழையால் விளைச்சல் பாதிப்பு காய்கறிகள் விலை 50% அதிகரிப்பு

Monday October 23rd, 2017 12:12:00 AM
சேலம்: தமிழகத்தில் பெய்து வரும் தொடர் மழையால் காய்கறிகளின் விளைச்சல் பாதிக்கப்பட்டு விலை 40 முதல் 50 சதவீதம் அதிகரித்துள்ளது. தமிழகம் முழுவதும் பரவலாக அனைத்து வகையான காய்கறிகள் சாகுபடி செய்யப்படுகின்றன. தமிழகத்தில் அறுவடை செய்யப்படும் காய்கறிகள் ஆந்திரா, கேரளாவுக்கு  30 சதவீதம் அனுப்பப்படுகிறது. இந்நிலையில், கடந்த ஒன்றரை மாதமாக தமிழகத்தில் பரவலாக மழை பெய்து வருகிறது. இம்மழையால் பெரும்பாலான இடங்களில் பயிர்கள் வெள்ளத்தில் மூழ்கியது. இதன் காரணமாக காய்கறிகளின் விளைச்சல் பாதித்து, மார்க்கெட்டுக்கு வழக்கமாக வரவேண்டிய காய்கறிகளின் வரத்து 40 சதவீதம் குறைந்துள்ளது. கடந்த மாதத்தைவிட, நடப்பு மாதத்தில் காய்கறிகளின் விலை அதிகரித்துள்ளது. இந்த விலை உயர்வு பொதுமக்களிடையே கடும் அதிர்ச்சியை ஏற்படுத்தியுள்ளது.இதுகுறித்து சேலம் காய்கறி மார்க்கெட்டை சேர்ந்த மொத்த வியாபாரிகள் கூறியதாவது:தமிழகத்தில் ஊட்டியில் இருந்து கேரட், முட்டைகோஸ், இஞ்சி, உருளைகிழங்கும், பெங்களூரில் இருந்து பீன்ஸ், முள்ளங்கி, காலிபிளவர், பீட்ரூட், நூல்கோல், பச்சைப்பட்டாணி உள்ளிட்ட காய்கறிகளும், காங்கேயம், தாராபுரம், பெருந்துறை, ஈரோடு உள்ளிட்ட பகுதியில் இருந்து தேங்காயும், பாலக்கோடு, ராயக்கோட்டை, மேச்சேரி, ஆத்தூர் உள்ளிட்ட பகுதிகளில் இருந்து தக்காளியும் இதைதவிர பல்வேறு மாவட்டங்களில் கத்திரிக்காய், புடலங்காய், பீர்க்கங்காய், பாகற்காய், அவரைக்காய் விற்பனைக்கு வருகிறது.தமிழகத்தில் கடந்த ஒன்றரை மாதமாக பெய்து வரும் மழையால், காய்கறிகள் சாகுபடி செய்யப்பட்டுள்ள பயிர்கள் தண்ணீர் மூழ்கியது. இதன் காரணமாக காய்கறிகளின் விளைச்சல் பாதிக்கப்பட்டு, வழக்கமாக வரவேண்டிய காய்கறிகள் வரத்து சரிந்துள்ளது. இதன் காரணமாக கடந்த மாதத்தை விட, நடப்பு மாதத்தில் காய்கறிகளின் விலை 40 முதல் 50 சதவீதம் உயர்ந்துள்ளது. அடுத்த வாரத்தில் முகூர்த்தங்கள் உள்ளன. அப்போது மேலும் காய்கறிகளின் தேவை அதிகரிக்கவுள்ளது. இதனால் காய்கறிகளின் விலை மேலும் உயர வாய்ப்புள்ளது. இவ்வாறு வியாபாரிகள் கூறினர்.

கொங்கணாபுரம் சந்தையில் 2 கோடிக்கு ஆடு விற்பனை

Monday October 23rd, 2017 12:12:00 AM
இடைப்பாடி: சேலம் மாவட்டம் இடைப்பாடி அருகே கொங்கணாபுரத்தில், வாரந்தோறும் சனிக்கிழமைகளில் கூடும் சந்தையில் ஆடு, கோழி, காய்கறிகள் மற்றும் பழங்களை விற்பனைக்காக கொண்டு வந்து குவிப்பர். குறிப்பாக ஆடு விற்பனை களை கட்டும். புரட்டாசி மாதம் விரதம் மேற்கொண்டு வந்தவர்கள் அசைவத்தை தவிர்த்து வந்ததால், கடந்த சில வாரங்களாக சந்தையில் ஆடு விற்பனை டல் அடித்தது. இந்நிலையில், தீபாவளி பண்டிகையுடன் புரட்டாசி மாத விரதம் முடிவுக்கு வந்ததால், இந்த வார சந்தையில் ஆடு விற்பனை மீண்டும் சூடுபிடித்தது.  கொங்கணாபுரம், இடைப்பாடி மற்றும் சுற்றுப்புற பகுதியில் இருந்து மொத்தம் 4500 ஆடு மற்றும் கோழிகளை விற்பனைக்காக கொண்டு வந்திருந்தனர். 10 கிலோ எடை கொண்ட ஒரு ஆடு 4100 முதல் 4500 வரையிலும், 20 கிலோ ஆடு 8200 முதல் 8900 வரையிலும், வளர்ப்பு குட்டி ஒன்று 2100 முதல் 2700 வரை விற்பனையானது. 10 மணிக்குள் அனைத்து ஆடுகளும் விற்று தீர்ந்தது. இதன்மூலம் நேற்று ஒரேநாளில் 2 கோடிக்கு வர்த்தகம் நடைபெற்றது. ஆடுகளை வாங்கிய வியாபாரிகள் அதனை வேன், லாரிகளில் ஏற்றிச்சென்றனர். இதேபோல், சந்தையில் காய்கறி மற்றும் பழங்கள் விற்பனையும் சுறுசுறுப்பாக நடைபெற்றது.

தீபாவளிக்கு பின் ஜவுளி வர்த்தகம் சீராகவில்லை துணி உற்பத்தியில் தாமதம்

Monday October 23rd, 2017 12:12:00 AM
கோவை: தீபாவளிக்கு பிறகு விசைத்தறி ஜவுளி வர்த்தகம் சீராகாததால், கோவை, திருப்பூர் மாவட்டத்தில் விசைத்தறி துணி உற்பத்தி துவங்குவதில் தாமதம் ஏற்பட்டுள்ளது. இதனால் விசைத்தறிகள், நூற்பாலைகளில் உற்பத்தி தள்ளிப்போகிறது. கோவை திருப்பூர் மாவட்டத்தில் ஆயிரத்திற்கும் மேற்பட்ட விசைத்தறி ஜவுளி உற்பத்தியாளர்கள் உள்ளனர். இவர்கள் இம்மாவட்டத்தில் உள்ள 20 ஆயிரம் எண்ணிக்கையிலான கூலிக்கு நெசவு செய்யும் விசைத்தறி உரிமையாளர்களிடம் பாவு நூல் வழங்கி,  துணி நெய்ய செய்து, அதை பெற்று கூலி வழங்கி வருகின்றனர். இவ்வாறு உற்பத்தியாகும் துணியை வட மாநிலங்களுக்கு விற்கின்றனர். வட மாநில வியாபாரிகள் கோவை, திருப்பூரில் முகாமிட்டு விசைத்தறி துணியை கொள்முதல் செய்து வட மாநிலங்களுக்கு அனுப்பி வருகின்றனர். தீபாவளி வர்த்தகத்தை முன்னிட்டு தீபாவளிக்கு 3 நாட்களுக்கு முன்பு வரை உற்பத்தியான துணிகள் பெரும்பாலானவை விற்பனையாகின. அதற்கு பின்னர் வழக்கமான ஜவுளி வர்த்தகத்திற்கு தேவையான துணி உற்பத்தி தீபாவளிக்கு பின்னர் துவங்கும். ஆனால், தீபாவளி முடிந்து 4 நாட்களாகியும் துவங்கவில்லை. இதனால், விசைத்தறி துணி உற்பத்திக்கு தேவையான பாவுநூல் உற்பத்தி துவங்குவதும் தாமதமாகியுள்ளது. இதனால் விசைத்தறிகளுக்கு பாவுநூல் கிடைப்பதும் தள்ளிப்போகிறது. விசைத்தறிகள் இயங்குவதும் பாதிக்கப்பட்டுள்ளது.இது குறித்து விசைத்தறி ஜவுளி உற்பத்தியாளர்கள் கூறியதாவது: கோவை, திருப்பூர் மாவட்டத்தில் உற்பத்தியாகும் துணிகள், வட மாநிலங்களில் உள்ள சாயப்பட்டறைகளில் ப்ளீச்சிங், டையிங் மேற்கொண்ட பின்னரே, ஆயத்த ஆடை தயாரிப்பிற்கு செல்வது வழக்கம். தற்பொழுது வட மாநிலங்களில் உள்ள சாயப்பட்டறைகள் தீபாவளி விடுமுறையால் பணிகள் துவங்காததால், வர்த்தகர்கள் துணி கொள்முதல் செய்வதை தள்ளிப்போட்டுள்ளனர். இதனால் விசைத்தறி ஜவுளி வர்த்தகம் சீராகவில்லை. விசைத்தறி ஜவுளி வர்த்தகம் இயல்பு நிலைக்கு திரும்ப 2 வாரம் ஆகும் நிலை ஏற்பட்டுள்ளது. இவ்வாறு விசைத்தறி ஜவுளி உற்பத்தியாளர்கள் கூறினர்.

வெளியூர் வரத்து அதிகரிப்பால் திருவையாறில் வெற்றிலை விலை வீழ்ச்சி

Monday October 23rd, 2017 12:12:00 AM
திருவையாறு: திருவையாறில் வெற்றிலை விலை வீழ்ச்சி அடைந்துள்ளதால் கொடிக்கால் விவசாயிகள் வேதனை அடைந்துள்ளனர்.தஞ்சை மாவட்டம் திருவையாறு தாலுகா, வளப்பக்குடி, நடுப்படுகை, திருவையாறு, கீழதிருப்பூந்துருத்தி, மேலதிருப்பூந்துருத்தி, புதுதெரு, சின்னகண்டியூர், கல்யாணபுரம், உப்புகாச்சிபேட்டை, காருகுடி, ராயம்பேட்டை, தில்லைஸ்தானம், பனையூர், ஆச்சனூர், கடுவெளி உட்பட 25 கிராமங்களில் வெற்றிலை கொடிக்கால் விவசாயம் 1000 ஏக்கரில் நடைபெற்று வருகிறது. இங்கு கற்பூரம், கத்தி கற்பூரம், வெள்ளை கொடி, பச்சை கொடி, காப்பி கொடி ரக வெற்றிலை பயிரிடப்படுகிறது. இங்கு பயிரிடப்படும் வெற்றிலைகள் தஞ்சை, நாகை, மன்னார்குடி, மாயவரம், திருத்துறைப்பூண்டி உள்ளிட்ட பகுதிகளுக்கு அனுப்பி வைக்கப்படுகிறது.  இந்நிலையில் எந்த ஆண்டும் இல்லாத அளவிற்கு இந்த வருடம் திருவையாறு பகுதியில் வெற்றிலை விலை வீழ்ச்சி அடைந்துள்ளது. வெற்றிலை கவுளி ரூ.20 வீதம் 25கவுளி (ஒரு முட்டி) ரூ.500க்கு விற்கிறது. ஆனால் கடந்த ஆண்டு இதே வெற்றிலை கவுளி ரூ.100 வீதம் 25 கவுளி ரூ.2,500க்கு விற்பனையானது. இதுகுறித்து விவசாயி பொன்னாவரை கோபால் கூறுகையில், திருவையாறு தாலுகா பகுதியில் சுமார் 1000 ஏக்கரில் வெற்றிலை கொடிக்கால் விவசாயம் நடந்துவருகிறது. கடந்த சில ஆண்டுகளாக மழை பொய்த்து விட்டதாலும், காவிரியில் தண்ணீர் வராததாலும் ஆயில் மோட்டார் மற்றும் மின்மோட்டார்களை பயன்படுத்தி வெற்றிலை விவசாயம் செய்து வருகிறோம். கடந்த ஆண்டு கவுளி ரூ.100 என்று விற்பனை ஆன வெற்றிலை, இந்த ஆண்டு ரூ.20க்கு விற்பனை ஆகிறது.  கரூர் மாவட்டம் மோகனூர், ராசிபுரம், லாலாப்பேட்டை, திருச்சி மாவட்டம் முசிறி, தொட்டியம் உள்ளிட்ட பகுதிகளில் பயிரிடப்படும் வெற்றிலைகள் திருச்சி மார்க்கெட்டுக்கு கொண்டு வரப்பட்டு, அங்கிருந்து திருவையாறு மார்க்கெட்டுக்கு அதிகம் வருகிறது.  திருவையாறு பகுதியில் 21 நாட்களுக்கு ஒருமுறை மட்டுமே வெற்றிலை கிள்ளப்படுகிறது. ஆனால் கரூர், திருச்சி மாவட்ட பகுதிகளில் 12 நாட்களுக்கு ஒருமுறை வெற்றி கிள்ளப்படுவதால் அங்கிருந்து அதிகம் வரத்து உள்ளது. இதனால் வெற்றிலை விலை வீழ்ச்சி அடைந்துள்ளது. எனவே தமிழக அரசு வெற்றிலை விலை ஒரே சீராக விற்பனை நடைபெற நடவடிக்கை எடுக்க வேண்டும் என்றார்.

பெரிய டிவிக்குதான் டிமாண்ட்

Monday October 23rd, 2017 12:12:00 AM
வீடுகளில் பொழுது போக்குகளுக்கு மிக முக்கிய அம்சமாக டிவி திகழ்கிறது. இந்த பண்டிகை சீசனிலும் டிவி விற்பனை சுமார் 10 சதவீதம் உயர்ந்திருக்கிறது. இவற்றில் பெரிய நகரங்களில் உள்ள வாடிக்கையாளர்கள் 40 அங்குலத்துக்கு மேல் உள்ள டிவிக்களையே வாங்கியிருக்கின்றனர். முதல் முறையாக சிறிய டிவிக்களை விட பெரிய டிவிக்கள் விற்பனை அதிகரித்துள்ளது. பண்டிகை சீசனில் பணப்புழக்கம் இருந்தாலும் ஒட்டு மொத்த விற்பனையில் 50 சதவீதம் தவணை முறையிலேயே வாடிக்கையாளர்கள் வாங்கியுள்ளனர் என வீட்டு உபயோக பொருள் நிறுவனங்கள் மற்றும் டீலர்கள் தரப்பில் கூறப்படுகிறது.


சிறுநீரகத்தை விற்க சென்ற விசைத்தறி தொழிலாளி மீட்பு

Tuesday October 24th, 2017 12:42:00 PM
எர்ணாகுளம்: சிறுநீரகத்தை விற்க கேரளா சென்ற விசைத்தறி தொழிலாளி ரவி மீட்கப்பட்டார். எர்ணாகுளம் மருத்துவமனையில் இருந்து ரவியை கேரள போலீசார் மீட்டனர். ரவியை ஈரோடு அழைத்துவர தனிப்படை போலீஸ் கேரளாவுக்கு விரைந்தது. வாங்கிய கடனை கட்டுவதற்காக சிறுநீரகத்தை விற்க ரவி முயற்சி செய்துள்ளார். சிறுநீரகம் விற்க ரவியை இடைத்தரகர் ஒருவர் கேரளா அழைத்துச் சென்றார். கணவர் ரவியை மீட்டுத் தரக்கோரி மனைவி சம்பூர்ணம், ஆட்சியரிடம் மனு அளித்திருந்தார்.

ஆபத்தான நிலையில் உள்ள நடைமேம்பாலங்களை சீரமைக்க சச்சின் டெண்டுல்கர் ரூ. 2 கோடி ரூபாய் நிதி உதவி

Tuesday October 24th, 2017 12:19:00 PM
மும்பை : மும்பையில் ஆபத்தான நிலையில் உள்ள நடைமேம்பாலங்களை சீரமைக்க கிரிக்கெட் வீரரும், மாநிலங்களவை உறுப்பினருமான சச்சின் டெண்டுல்கர் ரூ. 2 கோடி ரூபாய் நிதி அளித்துள்ளார். இதுகுறித்து மும்பை ஆட்சியருக்கு  அவர் எழுதிய கடிதத்தில், சமீபத்தில் மும்பை எல்பின்ஸ்டோன் நடைமேம்பால நெரிசலில் 25 அப்பாவிகள் உயிரிழநததை சுட்டி காட்டியுள்ளார். பொறுப்பான குடிமகன் என்ற முறையில் இதுபோன்ற அசம்பாவித சம்பவம் மீண்டும் நடைபெறக்கூடாது. எனவே, நடைப் மேம்பாலங்களை சீரமைக்க  நாடாளுமன்ற உறுப்பினர் நிதியில் இருந்து வடக்கு ரயில்வே, மத்திய ரயில்வேக்கு தலா ரூ.1 கோடி நிதி அளிப்பதாக அவர் குறிப்பிட்டுள்ளார். மகாராஷ்ட்ரா மாநிலத்தில் கடந்த மாதம் மும்பை  எல்பின்ஸ்டோன் நடைமேம்பாலக் கூட்ட  நெரிசலில் சிக்கி 25 பேர் உயிரிழந்துள்ளது குறிப்பிடத்தக்கது.

காஷ்மீர் பிரச்சனைக்கு முடிவுகட்ட மத்திய அரசு முடிவு - ராஜ்நாத் சிங்!

Tuesday October 24th, 2017 12:06:00 PM
டெல்லி : காஷ்மீர் பிரச்சனைக்கு பேச்சுவார்த்தை நடத்த சிறப்பு பிரதிநிதி நியமிக்கப்பட்டதன் மூலம் காஷ்மீர் கொள்கையில் தோல்வி அடைந்ததை மத்திய அரசு ஓப்புக்கொண்டுள்ளதாக எதிர் கட்சிகள் விமர்சித்துள்ளனர்.  டெல்லியில் நேற்று செய்தியாளர்களை சந்தித்த மத்திய  உள்துறை அமைச்சர் ராஜ்நாத் சிங், காஷ்மீர் பிரச்சனைகள் தொடர்பாக ஆரம்பக்கட்ட பேச்சுவார்த்தை நடத்த மத்திய அரசு திட்டமிட்டுள்ளதாக கூறினார்.இதற்கான சிறப்பு அதிகாரியாக மத்திய உளவுத்துறையின் முன்னாள் இயக்குனர் தினேஸ்வர் சர்மா நியமிக்கப்பட்டுள்ளதாகவும் அறிவித்தார். தினேஸ்வர் சர்மா விரும்பும் யாருடன் அவர் பேச்சுவார்த்தை நடத்த அதிகாரம் அளிக்கப்பட்டுள்ளதாக கூறிய ராஜ்நாத் சிங், காஷ்மீர் இளைஞர்களுக்கு முன்னுரிமை அளிக்க முடிவு செய்யப்பட்டுள்ளதாக அவர் தெரிவித்தார். காஷ்மீர் விவகாரத்தில் மோடி அரசில் ஏற்பட்டுள்ள அதிரடி மாற்றத்தை எடுத்துக் காட்டுவதாக எதிர் காட்சிகள் கூறியுள்ளனர். மத்திய அரசின் நடவடிக்கையை வரவேற்ப்பதாக கம்யூனிஸ்ட் கட்சிகள் தெரிவித்திருப்பது குறிப்பிடத்தக்கது. 

ரூபாய் நோட்டு மதிப்பு இழப்பை அறிவித்த மோடி அரசை கண்டித்து நவம்பர் 8ல் ஆர்ப்பாட்டம்

Tuesday October 24th, 2017 12:03:00 PM
டெல்லி: ரூபாய் நோட்டு மதிப்பு இழப்பை அறிவித்த மோடி அரசை கண்டித்து நவம்பர் 8ல் ஆர்ப்பாட்டத்தில் ஈடுபட உள்ளனர். காங்கிரஸ், திரிணாமுல் காங்கிரஸ், ஐக்கிய ஜனதாதளம்(சரத்யாதவ்) கூட்டாக அறிவித்துள்ளனர்.

லக்னோ-ஆக்ரா விரைவு சாலையில் தரையிறங்கிய இந்திய விமானப்படை போர் விமானங்கள்

Tuesday October 24th, 2017 12:03:00 PM
லக்னோ: லக்னோ - ஆக்ரா விரைவு சாலையில் இந்திய விமானப்படையை சேர்ந்த போர் விமானங்கள் தரையிறக்கம் செய்யும் நிகழ்ச்சி நடைபெற்றது. இயற்கை பேரிடர் உட்பட அவசரக் காலங்களில் சாலைகளில் விமானங்களை தரையிறக்கிப் பயன்படுத்த வசதியாக உத்தரப் பிரதேசத்தில் நடைபெற்ற ஒத்திகை நிகழ்ச்சியில் 20 போர் விமானங்கள் பங்கேற்றன. வெள்ளம், பூகம்பம் உட்பட இயற்கை சீற்றம் ஏற்படும்போது, மக்களுக்கு விரைவாக நிவாரணப் பொருட்களை கொண்டு சேர்க்கவும், பாதிக்கப்பட்ட பகுதியில் இருந்து மக்களை வெளியேற்றவும் விமானப்படை விமானங்கள் பயன்படுத்தப்படுகின்றன. ஆனால், குறிப்பிட்ட நகரங்களில் மட்டுமே விமான நிலையங்கள் உள்ளன. அங்கிருந்து மற்ற பகுதிகளுக்கு செல்ல வேறு வாகனங்களை பயன்படுத்த வேண்டிய சூழ்நிலை உள்ளது. இதனால், அவசரக் காலங்களில் கூடுதல் தாமதம் ஏற்படுகிறது.எனவே பாதிக்கப்பட்ட பகுதிகளுக்கு விமானப் படை விமானங்கள் உடனடியாக சென்றடையும் வகையில், தேசிய நெடுஞ்சாலைகளைப் பயன்படுத்த விமானப் படை திட்டமிட்டு வருகிறது. இதுதொடர்பாக விமானப் படை வீரர்களுக்கு சிறப்பு பயிற்சியும் அளிக்கப்பட்டு வருகிறது. இந்நிலையில் உத்தரப் பிரதேச மாநிலம், உன்னாவ் மாவட்டத்தில் லக்னோ - ஆக்ரா விரைவு சாலையில் இன்று விமானப்படை போர் விமானங்களை தரையிறக்கி ஒத்திகை நடத்தப்பட்டது. இந்த நிகழ்ச்சியில் ஏஎன் -32, சுகோய் 30, மிரேஜ் 2000, ஜாகுவார் உள்ளிட்ட 20 விமானங்கள் பங்கேற்றன. இந்த ஒத்திகை நிகழ்ச்சியை ஏரளாமான பொதுமக்கள் கண்டு களித்தனர்.

நாடு முழுவதும் 83,000 கி.மீ. தூர நெடுஞ்சாலைகளை மேம்படுத்த மத்திய அரசு திட்டம்

Tuesday October 24th, 2017 11:43:00 AM
டெல்லி: நாடு முழுவதும் 83,000 கி.மீ. தூர நெடுஞ்சாலைகளை மேம்படுத்தும் திட்டத்திற்கு மத்திய அமைச்சரவை இன்று ஒப்புதல் வழங்கியுள்ளது. நாட்டின் பொருளாதாரத்தை மேம்படுத்தும் வகையில் நாடு முழுவதும் 83,000 கி.மீ. தூர நெடுஞ்சாலைகளை மேம்படுத்த முடிவு செய்துள்ள மத்திய அரசு, சுமார் 7 லட்சம் கோடி ரூபாய் மதிப்பில் திட்டத்தை நிறைவேற்ற முடிவு செய்துள்ளது. நாட்டின் எல்லைகள், சர்வதேச எல்லைகளை இணைக்கும் பகுதிகள், துறைமுகம் மற்றும் பொருளாதார வழித்தடங்களில் உள்ள 24,800 கி.மீ. தூர சாலைகளை மேம்படுத்துவதுடன், தற்போது நடைபெற்று வரும் 10,000 கி.மீ. தூர தேசிய நெடுஞ்சாலை பணிகளையும் 2022 ஆம் ஆண்டுக்குள் முடிக்க மத்திய அரசு திட்டமிட்டுள்ளது. அதேபோல் வடகிழக்கு மாநிலங்களில் நெடுஞ்சாலை அமைத்து வரும் 48,000 கி.மீ. தூர சாலைகளை விரைந்து மேம்படுத்தவும் மத்திய அரசு பரிசீலித்து வருகிறது. சரக்கு போக்குவரத்து செலவை குறைத்து பொருளாதாரத்தை மேம்படுத்த திட்டமிட்டுள்ள மத்திய அரசு, இதற்காக 7 லட்சம் கோடி ரூபாய் திட்டத்தை வகுத்துள்ளது குறிப்பிடத்தக்கது.

ஐதராபாத்தில் பெண் ஒருவருக்கு அரிவாள் வெட்டு: குற்றவாளி கைது

Tuesday October 24th, 2017 11:05:00 AM
ஐதராபாத்: ஐதராபாத்தில் நண்பர் அரிவாளால் வெட்டியதில் பெண் ஒருவர் படுகாயமடைந்துள்ளார். இதனையடுத்து படுகாயமடைந்த பெண் மருத்துவமனையில் சிகிச்சைக்காக அனுமதிக்கப்பட்டுள்ளார். மேலும் குற்றவாளி கைது செய்யப்பட்டு, நீதிமன்ற காவலுக்கு அனுப்பி வைக்கப்பட்டார்.

லக்னோ-ஆக்ரா விரைவுநெடுஞ்சாலையில் போர் விமானங்கள் தரையிறக்கம்

Tuesday October 24th, 2017 11:01:00 AM
லக்னோ: உன்னோ அருகே லக்னோ-ஆக்ரா விரைவுநெடுஞ்சாலையில் இந்திய விமானப்படையினர் போர் விமானங்களை தரையிறக்கம் செய்து சோதனை நடைபெற்று வருகிறது. அவசர காலங்களில் நெடுஞ்சாலைகளில் போர் விமானங்களை தரையிறக்கம் செய்வது குறித்து சோதனை நடைபெற்று வருகிறது. சோதனையின் முதல் கட்டமாக 16 இந்திய விமானப்படையினர் போர் விமானங்கள் தரையிறக்கம் செய்யப்பட்டது.

புதுச்சேரியில் தொடக்க பள்ளி மாணவர்களுக்கு பிஸ்கட் வழங்கும் திட்டம்

Tuesday October 24th, 2017 10:51:00 AM
புதுச்சேரி: தொடக்க பள்ளி மாணவர்களுக்கு பிஸ்கட் வழங்கும் திட்டத்தை முதல்வர் தொடங்கி வைத்தார். ஐயங்குட்டிபாளையம் பள்ளியில் பிஸ்கட் வழங்கும் திட்டத்தை முதல்வர் நாராயணசாமி தொடங்கிவைத்தார்.

தீபாவளியன்று நாட்டிலேயே அதிகம் மாசுபட்ட நகரம் பிவாண்டி: மாசுக் கட்டுப்பாட்டு வாரியம்

Tuesday October 24th, 2017 10:49:00 AM
டெல்லி: தீபாவளி பண்டிகை அன்று நாட்டிலேயே அதிகம் மாசுபட்ட நகரம் என்ற பெயரை ராஜஸ்தான் மாநிலத்தின் பிவாண்டி பெற்றுள்ளது. தீபாவளி பண்டிகையன்று பட்டாசுகள் வெடிப்பதால் காற்று மாசு அதிகரித்து வருகிறது. இதனால் இந்த ஆண்டு டெல்லியில் பட்டாசு வெடிப்பதற்கு தடை விதிக்கப்பட்டது. எனினும், நாட்டின் மற்ற பகுதிகளில் வழக்கத்துக்கு மாறாக பட்டாசுகள் அதிகமாக வெடிக்கப்பட்டன.இந்நிலையில், தீபாவளி பண்டிகை நாளில் நாட்டின் பல்வேறு நகரங்களில் காற்றின் தரத்தை மத்திய மாசுக் கட்டுப்பாட்டு வாரியம் தற்போது கண்டறிந்துள்ளது. இதில் அதிகபட்சமாக ஒரு கியூபிக் மீட்டர் காற்றில் 425 மைக்ரோ கிராம் மாசுக்களுடன் ராஜஸ்தான் மாநிலத்தின் ஆல்வர் மாவட்டத்தை சேர்ந்த பிவாண்டி முதலிடம் பிடித்தது. பிவாண்டியில் தொழிற்சாலைகள் அதிகம் உள்ளதால் நச்சுப்புகைகள் அதிகமாக வெளியேறுகின்றன. இந்நிலையில் தீபாவளி நாளில் பட்டாசுகள் வெடித்ததால் ஏற்பட்ட புகை தீவிரப்படுத்தியுள்ளது. மிகவும் மாசுபட்ட நகரங்கள் பட்டியலில் இரண்டாமிடத்தை மேற்குவங்க மாநிலத்தின் கொல்கத்தாவும் மூன்றாம் இடத்தை உத்தரபிரதேச மாநிலத்தின் ஆக்ராவும் பிடித்துள்ளன.

லக்னோ- ஆக்ரா நெடுஞ்சாலையில் இந்திய விமானப் படை விமானங்கள் இறங்கின

Tuesday October 24th, 2017 10:46:00 AM
லக்னோ: லக்னோ- ஆக்ரா நெடுஞ்சாலையில் இந்திய விமானப் படை விமானங்கள் இறங்கின. 20 விமானங்கள் நெடுஞ்சாலையில் தரை இறங்குகின்றன. அவசர  காலத்தில் தேசிய நெடுஞ்சாலையை போர் விமானங்கள் பயன்படுத்த ஒத்திகை பார்க்கப்பட்டது.

திருப்பதி கபாலீஸ்வரர் கோயில் வனப்பகுதியில் சிறுத்தை குட்டி சிக்கியது

Tuesday October 24th, 2017 10:20:00 AM
திருப்பதி: திருப்பதியில் கபாலீஸ்வரர் கோயில் வனப்பகுதியில் சுற்றித் திரிந்த சிறுத்தைக் குட்டி சிக்கியது. குட்டி சிக்கிய நிலையில் தப்பியோடிய தாய் சிறுத்தை சிக்கவில்லை. இதனால் பக்தர்கள் கவனத்துடன் இருக்க வேண்டும் என வனத்துறையினர் எச்சரிக்கை விடுத்துள்ளனர்.

இடைத்தரகர் சுகேஷை சுதந்திரமாக உலவவிட்ட விவகாரத்தில் 2 காவலர்கள் சிறையில் அடைப்பு

Tuesday October 24th, 2017 09:37:00 AM
டெல்லி: இடைத்தரகர் சுகேஷை சுதந்திரமாக உலவவிட்ட விவகாரத்தில் 2 காவலர்கள் சிறையில் அடைக்கப்பட்டனர். சுகேஷ் விவகாரத்தில் 5 காவலர்கள் பணி நீக்கம் செய்யப்பட்டனர். இரட்டை இலை சின்னம் பெற லஞ்சம் கொடுக்க முயற்சித்த வழக்கில் சுகேஷ் கைது செய்யப்பட்டார் என்பது குறிப்பிடத்தக்கது.

டெல்லி கம்லா மார்க்கெட்டில் பயங்கர தீ விபத்து: 100 கடைகள் சேதம்

Tuesday October 24th, 2017 08:57:00 AM
புதுடெல்லி: டெல்லியில் உள்ள கம்லா மார்க்கெட்டில் நேற்று இரவு பயங்கர தீ விபத்து ஏற்பட்டது. இந்த தீ விபத்தில் 100 கடைகள் எரிந்து சேதமடைந்துள்ளன. இதனையடுத்து தீயணைப்பு வாகனங்களுடன் சம்பவ இடத்திற்கு விரைந்து சென்ற வீரர்கள் தீயை அணைதனர். இந்த தீ விபத்தில் எந்த வித உயிரிழந்போ, காயமோ யாருக்கும் ஏற்படவில்லை என்று தகவல் வெளியாகியுள்ளது.

கச்சத்தீவு அருகே ராமேஸ்வரம் மீனவர்கள் மீது இலங்கை கடற்படையினர் தாக்குதல்

Tuesday October 24th, 2017 08:03:00 AM
ராமேஸ்வரம்: கச்சத்தீவு அருகே மீன்பிடித்துக் கொண்டிருந்த ராமேஸ்வரம் மீனவர்கள் மீது இலங்கை கடற்படையினர் தாக்குதல் நடத்தினர். 10க்கும் மேற்பட்ட விசைப்படகுகள் மீது தாக்குதல் நடத்திய இலங்கை கடற்படையினர், மீன்பிடி வலைகளையும் அறுத்தனர். தாக்குதலால் பாதிக்கப்பட்ட மீனவர்கள் ரூ.30,000 வரை நஷ்டத்துடன் கரைக்கு திரும்பினர்.

இன்று பெங்களூரு செல்கிறார் குடியரசுத் தலைவர்

Tuesday October 24th, 2017 07:47:00 AM
பெங்களூரு: கர்நாடக மாநில சட்டசபையின் 60வது ஆண்டு விழாவில் பங்கேற்க குடியரசுத் தலைவர் ராம்நாத் கோவிந்த் இன்று பெங்களூரு செல்கிறார். நாளை, கர்நாடக மாநில சட்டசபையின் 60வது ஆண்டு விழாவில் பங்கேற்கும் அவர், இரு அவைகளை சேர்ந்த உறுப்பினர்களிடையே உரையாற்ற உள்ளார்.

திருப்பதி அருகே செம்மரம் வெட்ட முயன்ற 2 தமிழர்கள் கைது

Tuesday October 24th, 2017 07:36:00 AM
திருப்பதி: திருப்பதி அருகே மங்களம் பகுதியில் செம்மரம் வெட்ட முயன்றதாக தமிழகத்தைச் சேர்ந்த 2 பேர் கைது செய்யப்பட்டுள்ளனர். திருவண்ணாமலை மாவட்டத்தைச் சேர்ந்த 2 பேரை கைது செய்த ஆந்திர போலீசார் விசாரணை நடத்தி வருகின்றனர்.

பஞ்சாப்பில் பயங்கர தீ விபத்து: தீயை அணைக்க முயற்சியில் வீரர்கள்

Tuesday October 24th, 2017 07:28:00 AM
பஞ்சாப்: பஞ்சாப் மாநிலம் லூதியானாவில் ஷிங்கர் திரையரங்கம் அருகே உள்ள கட்டடத்தில் பயங்கர தீ விபத்து ஏற்பட்டுள்ளது. இதனையடுத்து 12 தீயணைப்பு வாகனங்களுடன் சம்பவ இடத்திற்கு விரைந்து சென்ற வீரர்கள் தீயை அணைக்க முயன்று வருகின்றனர்.

இரட்டை இலை விவகாரத்தில் கைதான சுகேஷை சுதந்திரமாக சுற்றவிட்ட 7 டெல்லி போலீசார் டிஸ்மிஸ்: ஊழல் குற்றச்சாட்டும் பதிவு

Tuesday October 24th, 2017 06:09:00 AM
புதுடெல்லி: பெங்களூருவில் சுகேஷ் சுதந்திரமாக சுற்றித் திரிந்த விவகாரத்தில்  7 டெல்லி போலீஸ்காரர்கள் டிஸ்மிஸ் செய்யப்பட்டனர்.இரட்டை இலை சின்னத்தை சசிகலா தலைமையிலான அதிமுக அம்மா அணிக்கு பெற்றுத் தருவதற்காக தேர்தல் ஆணையத்திற்கு ₹50 கோடி லஞ்சம் கொடுக்க இடைத்தரகராக செயல்பட்டவர் சுகேஷ் சந்திரசேகர். இவரை டெல்லி போலீசார் கடந்த ஏப்ரல் மாதம் கைது செய்தனர். அவர் கொடுத்த தகவல் அடிப்படையில் அதிமுக அம்மா அணி துணை பொதுச் செயலாளர் டி.டி.வி.தினகரன் கைதானார். மும்பை, கோவை, பெங்களூருவில் உள்ள மோசடி வழக்குகள் தொடர்பாக சுகேஷை ஆஜர்படுத்த அக்டோபர் 9 முதல் 16ம் தேதி வரை டெல்லி நீதிமன்றம் அனுமதி அளித்திருந்தது. அதையடுத்து, டெல்லி போலீஸ் சப்-இன்ஸ்பெக்டர் ராஜேஷ் தலைமையில் ஏட்டு ஜீவன், ஜார்ஜ், காவலர்கள் நிதின் குமார், கேசவ்குமார், தர்மேந்தர், புஷ்பேந்தர் ஆகிய 7 பேரும் சுகேஷை பாதுகாப்புடன் கடந்த 9ம் தேதி பெங்களூரு அழைத்து வந்தனர். 9,10 ஆகிய தேதிகளில் சுகேஷ் பெங்களூருவில் இருந்தார். அந்த 2 நாட்களும் அவர் பெங்களூருவில் சுதந்திரமாக சுற்றித் திரிந்தது பின்னர் வெட்டவெளிச்சமானது. வருமான வரித்துறையினர் இதை அம்பலப்படுத்தினர்.இதுதொடர்பாக டெல்லி போலீஸ் கமிஷனர் அமுல்ய பட்நாயக் விசாரித்து 7 காவலர்களையும் சஸ்பெண்ட் செய்து கடந்த 19ம் தேதி உத்தரவிட்டார். அதை தொடர்ந்து துறைரீதியிலான விசாரணை நடந்தது. இந்த விசாரணை முடிவில் 7 போலீசாரும் டிஸ்மிஸ் செய்யப்பட்டனர். இதுகுறித்து டெல்லி காவல்துறை தலைமை செய்தித்தொடர்பாளர் தீபேந்திர பதக் கூறுகையில்,  ‘‘7 பேரிடமும் நடத்திய விசாரணையில், அவர்கள் கடமை தவறியது நிரூபணமானது. எனவே, அவர்களை டிஸ்மிஸ் செய்து உத்தரவிட்டு உள்ளோம். அவர்கள் மீது ஊழல் குற்றச்சாட்டு வழக்கும் பதிவு செய்யப்பட்டு உள்ளது’’, என தெரிவித்தார்.

அடுத்த மாதம் நடக்கும் உ.பி. உள்ளாட்சி தேர்தலில் சாதிப்பாரா முதல்வர் யோகி?: ஆட்சியேற்ற பிறகு முதல் சவால்

Tuesday October 24th, 2017 12:43:00 AM
லக்னோ: உத்தரப் பிரதேச முதல்வர் யோகி ஆதித்யநாத்துக்கு முதல் சவாலாக அடுத்த மாதம் உள்ளாட்சி தேர்தல் நடக்க உள்ளது. இது பாஜ.வின் பலத்தை நிரூபிக்கும் தேர்தலாகவும் அமைந்துள்ளது.உத்தரப் பிரதேச சட்டப்பேரவைக்கு இந்தாண்டு தொடக்கத்தில் நடந்த தேர்தலில் பாஜ அமோக வெற்றி பெற்றது. இந்துத்துவா வாதியான யோகியை முதல்வராக்கியது. அம்மாநிலத்தில் ஆக்சிஜன் தட்டுப்பாட்டால் அரசு மருத்துவமனையில் 70க்கும் மேற்பட்ட குழந்தைகள் பலியான சம்பவம் பெரும் விமர்சனத்தை ஏற்படுத்தியது. இந்நிலையில், அம்மாநிலத்தில் அடுத்த மாதம் உள்ளாட்சித் தேர்தல் நடக்க உள்ளது. இதற்கான அறிவிப்பு இம்மாத இறுதியில் வெளியாக உள்ளது. உள்ளாட்சி தேர்தல், முதல்வர் யோகியின் முதல் சவாலாக கருதப்படுகிறது. அவரது தலைமையில் நேரடியாக சந்திக்கும் இத்தேர்தலில் பாஜவுக்கு வெற்றித் தேடித் தருவாரா என்பது பெரும் எதிர்பார்ப்பை ஏற்படுத்தி இருக்கிறது. உ.பியில் கடந்த மக்களவை தேர்தலிலும், சட்டப்பேரவை தேர்தலிலும் பாஜ அமோக வெற்றி பெற்றுள்ளது. எனவே, அக்கட்சியின் மீதான மக்களின் நம்பிக்கை இன்னும் குறையாமல் இருக்கிறதா என்பதை சோதிக்கும் தேர்தலாகும் உள்ளாட்சி தேர்தல் அமைந்துள்ளது. இதில், சமாஜ்வாடி, காங்கிரஸ், பகுஜன் சமாஜ் கட்சிகள் தனித்தனியாக போட்டியிடுகின்றன. எனவே, 2019 மக்களவை தேர்தலுக்கு ஒரு முன்னோட்டாக உபி உள்ளாட்சித் தேர்தல் அமையும் என அரசியல் நிபுணர்கள் கூறுகின்றனர்.


புதிய கிரகங்களாக உருவாகும் வால் நட்சத்திரங்கள்: நாசா விஞ்ஞானிகள் கண்டுபிடிப்பு

Tuesday October 24th, 2017 12:16:00 PM
வாஷிங்டன்: ஹவாய் தீவில் சக்தி வாய்ந்த அதிநவீன டெலஸ் கோப்புகளை அமெரிக்காவின் நாசா விண்வெளி மையம் நிறுவியுள்ளது. இதன் மூலம் விண்வெளியில் உலாவரும் புதிய கிரகங்கள், கோடிக்கணக்கான நட்சத்திரங்கள் மற்றும் வால் நட்சத்திரங்கள் கண்டுபிடிக்கப்பட்டு வருகின்றது. இந்த நிலையில் வால் நட்சத்திரங்களின் உடைந்த நீள் வட்டவளையங்கள் ஒன்றிணைந்து புதிய கிரகங்களாக உருவாகியுள்ளதை சமீபத்தில் நாசா விஞ்ஞானிகள் கண்டுபிடித்துள்ளனர். இவை பூமியை போன்று பல மடங்கு அளவு கொண்டவை என விண்வெளி ஆய்வு விஞ்ஞானி ஜான்ஸ் கோப்கின்ஸ் தெரிவித்துள்ளார்.நீள்வட்ட வளையங்கள் அதிக அளவிலான கார்பன் உள்ளிட்ட பல்வேறு மூலக் கூறுகளால் ஆனது என்றும் அவர் கூறியுள்ளார். இந்த புதிய கிரகங்கள் சூரிய மண்டலத்தில் இருந்து 3 மடங்கு தொலைவில் இருப்பது நாசா நிறுவிய டெலஸ் கோப்புகள் மூலம் கண்டுபிடிக்கப்பட்டுள்ளது.

இலங்கை கடற்படையால் கைது செய்யப்பட்ட தமிழக மீனவர்கள் 16 பேருக்கு காவல் நீட்டிப்பு

Tuesday October 24th, 2017 11:41:00 AM
கொழும்பு : இலங்கை கடற்படையால் கைது செய்யப்பட்ட தமிழக மீனவர்கள் 16 பேருக்கு நவம்பர் 7-ம் தேதி வரை காவல் நீட்டிக்கப்பட்டுள்ளது. ராமேஸ்வரம் மண்டபம் பகுதி மீனவர்களை யாழ்ப்பாணம் சிறையிலடைக்க ஊர்க்காவல்துறை நீதிமன்றம் உத்தரவிட்டுள்ளது. எல்லைத்தாண்டி மீன்பிடித்ததாக ஆகஸ்ட் மற்றும் செப்டம்பரில் 16 மீனவர்கள் இலங்கை கடற்படையால் கைதாகினர். 

ரூ.50 கோடிக்கு விற்கப்பட்ட மீசை, தாடியுடன் கூடிய மோனலிசா ஓவியம்

Tuesday October 24th, 2017 11:31:00 AM
பாரிஸ்: பிரான்ஸ் தலைநகர் பாரிஸில் மோனலிசா ஓவியத்தின் மாதிரி ஒன்றிற்கு மீசை தாடி வரைந்து அதை 50 கோடிக்கு மார்ஷல் டுச்சாம்ப் ஓவியர் விற்பனை செய்துள்ள சம்பவம் அனைவரையும் வியப்பில் ஆழ்த்தியுள்ளது. உலகில் மிகவும் புகழ்பெற்ற ஓவியங்களில் ஒன்று மோனலிசா ஓவியம். லியானார்டோ டாவின்சி வரைந்த இந்த ஓவியம் இன்றளவும் உலகில் மாஸ்டர் பீஸ் ஓவியங்களில் ஒன்றாக இருக்கிறது. இந்த நிலையில் பிரான்சின் பாரிஸை சேர்ந்த மார்ஷல் டுச்சாம்ப் என்ற ஓவியர் இதே மோனலிசா ஓவியத்தை அப்படியே அச்சு அசலாக வரைந்துள்ளார். ஆனால் மோனாலிசா ஓவியத்தில் சில மாறுதல் செய்துள்ளார். அதில் மீசையும், தாடியும் வரைந்து இருக்கிறார். இதன்காரணமாக இந்த ஓவியம் மிகவும் வித்தியாசமாக தெரிந்திருக்கிறது. அவர் வரைந்த இந்த ஓவியத்தை பிரான்ஸின் ஓவியக் கண்காட்சியில் வைத்திருக்கிறார். இந்த ஓவியத்திற்கு விலையாக இந்திய மதிப்பில் 40 கோடி நிர்ணயம் செய்து இருந்திருக்கிறார். இந்த நிலையில் இந்த ஓவியம் ஒரே நாளில் உலக அளவில் வைரல் ஆனது. நிறைய பேர் இந்த ஓவியத்தை வாங்க முயற்சித்தனர். இதையடுத்து இறுதியில் ரூ.50 கோடிக்கு இந்த ஓவியம் விற்கப்பட்டது.

பிரேசிலில் 245 பேர் ஒரே நேரத்தில் பாலத்தில் ஊஞ்சலாடி கின்னஸ் சாதனை

Tuesday October 24th, 2017 10:22:00 AM
பிரேசிலியா: பிரேசில் நாட்டின் ஹோர்டோலண்டியா பகுதியில் உள்ள 30 அடி உயரமான பாலத்தில் இருந்து 245 பேர் ஒரே நேரத்தில் ஊஞ்சலாடி சாதனை படைத்தனர். இப்போட்டியில் சாகச விரும்பிகள் பலர் ஆர்வத்துடன் கலந்து கொண்டனர். 245 பேர் இணைந்து பாலத்தில் ஊஞ்சல் ஆடி கின்னஸ் சாதனைப் படைத்தனர். பாலத்தில் இருந்து ஒரே நேரத்தில் கீழே குதித்தனர். 245 பேரும் பாலத்தில் ஊஞ்சல் ஆடுவதை பார்த்த பார்வையாளர்கள் மகிழ்ச்சியில் ஆரவாரம் செய்தனர்.சாகசப்போட்டி முடிந்தவுடன் சிலர் பாலத்தில் அடியில் உள்ள நீருக்குள் குதித்தனர். மீதி பேர் பாலத்திற்கு மேலே ஏறினர்.  கின்னஸ் சாதனைப்புத்தகத்தில் இடம்பெறுவதற்காக நடத்தப்பட்டதாக இந்த சாகசப்போட்டியின் ஒருங்கிணைப்பாளர்கள் தெரிவித்தனர்.

அமெரிக்காவில் காணாமல் போன 3 வயது இந்திய சிறுமி சடலமாக மீட்பு? இந்தியாவில் தத்தெடுக்கப்பட்டவர்

Tuesday October 24th, 2017 12:04:00 AM
ஹூஸ்டன்: அமெரிக்காவில் கால்வாயில் இருந்து இந்திய சிறுமியின் சடலம் ஒன்றை போலீசார் மீட்டுள்ளனர். இது 3வயது இந்திய சிறுமியாக இருக்கலாம் என போலீசார் சந்தேகம் அடைந்துள்ளனர். அமெரிக்காவில் வசித்து வருபவர் வெஸ்லே மேத்யூ. இவர் கடந்த இரண்டு ஆண்டுகளுக்கு முன்னர் இந்தியாவில் உள்ள காப்பகத்தில் இருந்து பெண் குழந்தை ஒன்றை தத்தெடுத்தார். அந்த குழந்தைக்கு ஷெரின் மேத்யூ என பெயர் வைத்துள்ளார். தற்போது 3 வயதாகும் ஷெரீனை கடந்த 7ம் தேதி சனிக்கிழமை அதிகாலை 3 மணி முதல் காணவில்லை. கடந்த 6ம் தேதி இரவு ஷெரீன் குடிப்பதற்காக பாலை காய்ச்சி மேத்யூ கொடுத்துள்ளார். ஆனால், ஷெரீன் அந்த பாலை முழுவதுமாக குடிக்கவில்லை என தெரிகிறது. இதனால் கோபமடைந்த மேத்யூ, ஷெரீனை வீட்டிற்கு அருகே உள்ள மரத்தின் அருகில் நிற்குமாறு கூறி தண்டனை கொடுத்துள்ளார். சுமார் 15 நிமிடங்களுக்குப் பிறகு சென்று பார்த்தப்போது ஷெரீனை காணவில்லை. ஷெரீனை அவர் பல இடங்களிலுமை் தேடியுள்ளார். எனினும் சிறுமி கிடைக்கவில்லை. இதுகுறித்து அவர் ரிச்சட்சன் போலீசுக்கு தகவல் தெரிவித்துள்ளார். குழந்தை காணாமல் சென்று பல மணி நேரம் கழித்து புகார் செய்ததால் மேத்யூவை போலீசார் கைது செய்தனர். பின்னர்  பிணைத்தொகை செலுத்தி ஜாமீனில் வெளியே வந்தார். சிறுமியை போலீசார் தீவிரமாக தேடி வந்தனர். இந்நிலையில் வீட்டில் இருந்து அரை மைல் தூரத்தில் உள்ள சிறிய கால்வாயில் இருந்து 3 வயது குழந்தையின் சடலத்தை போலீசார் மீட்டுள்ளனர். இது காணாமல் சென்ற ஷெரீனாக இருக்கலாம் என போலீசார் தெரிவித்துள்ளனர். இன்னும் பிரேத பரிசோதனை செய்யப்படவில்லை. இறந்த குழந்தை யார் என்பதும் அடையாளம் காணப்படவில்லை. பிரேத பரிசோதனைக்கு பின்னரே குழந்தை இறப்பிற்கான காரணம் மற்றும் குழந்தை யார் என அடையாளம் காணப்படும் என போலீசார் தெரிவித்துள்ளனர்.

வங்கதேசத்தில் 15 மேம்பாட்டு திட்டம் சுஷ்மா தொடங்கினார்: இந்தியா உதவியில் நிறைவேறுகிறது

Tuesday October 24th, 2017 12:03:00 AM
தாகா: வெளியுறவு அமைச்சர் சுஷ்மா சுவராஜ் வங்கதேசத்துக்கு  சுற்றுப்பயணம் சென்றுள்ளார். 2014ம் ஆண்டு அவர் அமைச்சராக பொறுப்பேற்ற பிறகு 2வது முறையாக வங்கதேசம் சென்றுள்ளார். தனது பயணத்தின் கடைசி நாளான நேற்று, தலைநகர் தாகாவில் பரிதரா என்ற இடத்தில் புதிதாக கட்டப்பட்டுள்ள இந்திய தூதரக கட்டிடத்தை அவர் திறந்து வைத்தார். ஏற்கனவே, குல்சான் பகுதியில் இந்திய தூதரகம் இயங்கி வந்தது. இந்த நிகழ்ச்சியின்போது, வங்கதேசத்தில் இந்தியா நிதியுதவி மூலம் செயல்படுத்தப்படும் 15 மேம்பாட்டு திட்டங்களையும் சுஷ்மா தொடங்கி வைத்தார்.

3வது முறையாக பிரதமரானார் ஜப்பான் தேர்தலில் அபே மீண்டும் வெற்றி: மோடி வாழ்த்து

Tuesday October 24th, 2017 12:03:00 AM
டோக்கியோ: ஜப்பானில் நடந்து முடிந்த தேர்தலில் பிரதமர் சின்சோ அபே மீண்டும் வெற்றி பெற்றுள்ளார். அவருக்கு பிரதமர் நரேந்திர மோடி வாழ்த்து தெரிவித்துள்ளார். ஜப்பானில் கடந்த 2006ம் ஆண்டு நடந்த பொதுத் தேர்தலில் விடுதலை ஜனநாயக கட்சி சார்பில் போட்டியிட்ட பிரதமர் சின்சோ அபே ஆட்சியை பிடித்தார். பின்னர், 2012ம் ஆண்டு தேர்தலிலும் அவர் வென்றார். ஆனால், மக்கள் எதிர்பார்த்த அளவுக்கு, நாட்டின் பொருளாதாரத்தை மேம்படுத்துவதற்காக அவர் அளித்த வாக்குறுதிகளை நிறைவேற்ற முடியவில்லை. அவர் மீது ஊழல் குற்றச்சாட்டுகளும் எழுந்தன. அவர் அறிமுகப்படுத்திய தீவிரவாத எதிர்ப்பு சட்டம் கடும் விமர்சனத்துக்கு உள்ளானது. இதனால், அவருக்கு மக்களிடையே செல்வாக்கு குறைந்தது. சொந்த கட்சிக்குள்ளும் அபேவுக்கு எதிர்ப்பு கிளம்பியது.இந்நிலையில், ஜப்பானின் எதிர்க்கட்சியான ஜனநாயக கட்சியின் தலைவர்கள் பிரிந்து தனித்தனி கட்சியை தொடங்கினர். இது அபேவுக்கு சாதகமானது. வலுவான எதிர்க்கட்சி இல்லாத நிலையில், அவருக்கு இருந்த மக்கள் ஆதரவு கடந்த மாதம் 50 சதவீதமாக அதிகரித்தது. இந்த சாதகமான சூழ்நிலையை பயன்படுத்தி, அபே முன்கூட்டியே தேர்தலை அறிவித்தார். அதன்படி அங்கு நேற்று முன்தினம் தேர்தல் நடைபெற்றது. இதில், விடுதலை ஜனநாயக கட்சி வெற்றி வெற்றது. அபே 3வது முறையாக மீண்டும் பிரதமராக தேர்வு செய்யப்பட்டுள்ளார். தனது வெற்றி பற்றி அபே கூறுகையில், “எந்த சூழ்நிலையிலும் நாட்டின் வளமை மற்றும் அமைதியை பாதுகாப்பேன். வடகொரியாவின் ஏவுகணை, அணுசக்தி மற்றும் கடத்தல் பிரச்னைகளை சமாளிக்கும் வகையில், தீர்க்கமான மற்றும் வலுவான செயல்பாட்டை தொடருவேன், வடகொரியா தனது கொள்கைளை மாற்றிக்கொள்ளும் வகையில் அழுத்தம் கொடுக்கப்படும்” என்றார். தேர்தலில் வெற்றி பெற்ற அபேவுக்கு, பிரதமர் மோடி வாழ்த்து தெரிவித்துள்ளார். தனது டிவிட்டரில் மோடி வெளியிட்ட தகவலில், “எனது நெருங்கிய நண்பர் அபே வெற்றியால் இந்தியா -ஜப்பான் உறவு மேலும் வலுவடையும் என எதிர்பார்க்கிறேன்” என்றார்.

வடகொரியாவின் அச்சுறுத்தலை எதிர்கொள்ளும் வாக்குறுதியே தேர்தல் வெற்றிக்கு காரணம் : ஷின்ஸோ அபே

Monday October 23rd, 2017 05:55:00 PM
டோக்கியோ: ஜப்பான் நாடாளுமன்றத் தேர்தலில் போட்டியிட்ட ஷின்ஸோ அபேயின் சுதந்திர ஜனநாயக கட்சி தலைமையிலான கூட்டணி, 312 இடங்களை பெற்று மீண்டும் ஆட்சியமைக்க உள்ளது. ஜப்பான் பிரதிநிதிகள் சபைக்கான தேர்தல் நேற்று நடைபெற்றது. மொத்தமுள்ள 465 இடங்களுக்கு 1200 வேட்பாளர்கள் போட்டியிட்டனர். ஜப்பானின் பல பகுதிகளில் சூறைக்காற்றுடன் கூடிய மழை கொட்டி வரும் நிலையிலும் வாக்குப் பதிவு நடைபெற்றது. பிரதிநிதிகள் சபைக்கான தேர்தலில் மொத்தமுள்ள 465 இடங்களில் ஷின்ஸோ அபேயின் கூட்டணி 312 இடங்களில் வெற்றி பெற்றுள்ளது. டோக்கியோவில் செய்தியாளர்களை சந்தித்த அவர், ஜப்பான் பல்வேறு சவால்களை எதிர்கொண்டுள்ளதாக கூறினார். மேலும் பேசிய அவர் வடகொரியாவின் அச்சுறுத்தலை எதிர்கொள்ளும் வாக்குறுதி தான் இந்த தேர்தலில் தங்களது வெற்றிக்கு முக்கிய பங்கு வகித்திருக்கும் என நம்புவதாக தெரிவித்தார். அடுத்ததாக குழந்தை பிறப்பு விகிதம் குறைந்துள்ளதும் முக்கிய பிரச்சனை. இதனை இப்போதே தீர்க்கவில்லை என்றால், எதிர்காலத்தில் இன்னும் மோசமடைய வாய்ப்பு உள்ளது என்றார். மூன்றில் இரண்டு பங்கு இடம் கிடைத்துள்ளது என்பதால் சுதந்திர ஜனநாயக கட்சி தலைமையிலான ஆட்சி அமைக்கும் என்றும், ஷின்ஸோ அபே மீண்டும் பிரதமராவது உறுதி என்றும் அரசியல் நோக்கர்கள் தெரிவித்துள்ளனர். இருப்பினும் அதிகாரப்பூர்வமான அறிவிப்பு விரைவில் வெளியிடப்படும் என எதிர்பார்க்கப்படுகிறது.

சிரியா நாட்டில் 116 பேரை கொன்று குவித்த ஐ.எஸ். தீவிரவாதிகள்

Monday October 23rd, 2017 05:40:00 PM
டமாஸ்கஸ்: சிரியா நாட்டின் கிழக்கே ஐ.எஸ். தீவிரவாதிகளின் பிடியில் இருக்கும் சில பகுதிகளை கைப்பற்ற அந்நாட்டின் அரசுப் படைகள் உச்சகட்ட தாக்குதலில் ஈடுபட்டு வருகின்றது. அவர்களுக்கு துணையாக அமெரிக்கா மற்றும் ரஷியா நாட்டின் போர் விமானங்களும் வான்வழி தாக்குதலை நடத்துகின்றது.யூப்ரட்ட்எஸ் ஆற்றுப்பகுதியில் டெய்ர்-அல்-ஸோர் மாகாணத்தில் உள்ள முக்கிய நகரமான அல்-மயாடின் நகரை ஐ.எஸ். தீவிரவாதிகள் பிடியில் இருந்து அரசுப் படைகள் கடந்த மாதம் மீட்டது. இங்கிருந்து சுமார் 10 கிலோ மீட்டர் தூரத்தில் உள்ள அல்-ஓமர் பெட்ரோல் வயலை அமெரிக்க படைகள் துணையுடன் சிரியா ராணுவம் கைப்பற்றியுள்ளது. நாட்டின் மிகப்பெரிய மற்றும் மிக முக்கியமான இந்த பெட்ரோல் வயலில் நாள் ஒன்றுக்கு ஒரு முறை 75,000 பீப்பாய்கள் எண்ணெய் உற்பத்தி செய்யும் திறன் கொண்டது என்பது குறிப்பிடத்தக்கது.சிரியாவின் மிகப்பெரிய அல்-ஓமர் பெட்ரோல் வயலை அரசுப் படைகள் கைப்பற்றியுள்ளது ஐ.எஸ். தீவிரவாதிகளுக்கு எதிரான உச்சகட்டப் போரின் முக்கிய திருப்புமுனையாக கருதப்படுகிறது. இந்நிலையில், சிரியாவில் நடைபெற்ற போரின்போது கடந்த 20 நாட்களில் பொதுமக்களில் 116 பேரை அரசின் உளவாளிகள் என சந்தேகித்து ஐ.எஸ். தீவிரவாதிகள் கொன்று குவித்ததாக அங்கு போர் நிலைமைகளை பார்வையிட்டுவரும் பிரிட்டன் நாட்டு மனித உரிமை கண்காணிப்பகத்தின் தலைவர் ரமி அப்தெல் ரஹ்மான் இன்று தெரிவித்துள்ளார்.

வின்ஸ்டன் சர்ச்சில் வரைந்த கடைசி ஓவியம் ஏலத்திற்கு வருகிறது

Monday October 23rd, 2017 05:05:00 PM
லண்டன்: பிரிட்டனின் முன்னாள் பிரதமர் வின்ஸ்டன் சர்ச்சில் வரைந்த கடைசி ஓவியம் 68 லட்சம் ரூபாய்க்கு ஏலம் போகும் என்று கணக்கிடப்பட்டுள்ளது. 1965-ம் ஆண்டு தாம் மரணம் அடைவதற்கு முன்னதாக வின்ஸ்டன் சர்ச்சில் ஓவியம் ஒன்றை வரைந்துள்ளார். கோல்ட் ஃபிஷ் பூல் என்று பெயரிடப்பட்ட அந்த ஓவியம் சர்ச்சிலின் பாதுகாவலர் சார்ஜென்ட் எட்மண்ட் முர்ரேவிடம் கடந்த 15 ஆண்டுகளாக உள்ளது. வின்ஸ்டன் சர்ச்சில் ஓவியம் வரைவதற்கு சார்ஜென்ட்  வண்ணப்பூச்சு தூரிகை தயாரிக்க உதவுவார் என்று கூறப்படுகிறது. மிகவும் சிறப்பு பெற்ற இந்த ஓவியத்தை தற்போது ஏலமிட பாதுகாவலர் முடிவு செய்துள்ளார். இதுவரை வின்ஸ்டன் சர்ச்சில் 544 ஓவியங்களை நிறைவு செய்துள்ளதாக கூறப்படுகிறது. உலகில் மிகவும் சிறப்பான இடத்தைப் சித்தரிக்கும் வகையில் கோல்ட் ஃபிஷ் பூல் ஓவியம் வரையப்பட்டுள்ளதாக சார்ஜென்ட் எட்மண்ட் தெரிவித்துள்ளார். வின்ஸ்டன் சர்ச்சில் வரைந்த கடைசி ஓவியத்தை வாங்க கடும் போட்டி நிலவும் என்பதால் 68 லட்சம் ரூபாய்க்கு ஏலம் போகும் என்று எதிர்பார்க்கப்படுகிறது. நவம்பர் 21-ம் தேதி இங்கிலாந்தில் ஏலம் நடைபெற உள்ளது.

உலகின் முதல் 3.டி பிரிண்ட் பாலம் நெதர்லாந்தில் திறப்பு

Monday October 23rd, 2017 03:54:00 PM
ஆம்ஸ்டர்டாம்: 3.டி பிரிண்டர் தொழில் நுட்பத்தை பயன்படுத்தி பல பொருட்கள் உருவாக்கப்பட்டு வருகிறது. இந்த நிலையில் தற்போது நெதர்லாந்தில் 3.டி பிரிண்டிங் தொழில்நுட்பம் மூலம் பாலம் உருவாக்கப்பட்டுள்ளது. அது ஸ்மார்ட் என்ற இடத்தில் திறந்து வைக்கப்பட்டுள்ளது. 800 அடுக்குகளால் ஆன பொருட்களால் இந்த பாலம் உருவாக்கப்பட்டுள்ளது. இதன் மொத்த நீளம் 8 மீட்டர் ஆகும். மேலும் இந்த பாலம் 40 லாரிகளை ஒரே நேரத்தில் தாங்கும் அளவு வலிமை வாய்ந்தது என கூறப்பட்டுள்ளது.இப்பாலத்தின் வாழ்நாள் கான்கிரீட்டில் கட்டப்பட்ட பாலத்தை போன்று அதிகம் என தெரிவிக்கப்பட்டுள்ளது. இதனை உருவாக்க 3 மாத காலம் ஆனதாகவும், இதற்கு சாதாரண பாலத்தை உருவாக்கும் செலவில் பாதிதான் ஆனது என்றும் நெதர்லாந்து என்ஜினீயர்கள் குழு தெரிவித்துள்ளது.

அமெரிக்காவில் காணாமல் போன இந்தியச் சிறுமியின் உடல் கண்டெடுப்பு

Monday October 23rd, 2017 02:43:00 PM
வாஷிங்டன்: அமெரிக்காவின் டெக்சாஸ் மாகாணத்தில் காணாமல் போன இந்தியச் சிறுமியின் உடல் கண்டெடுக்கப்பட்டுள்ளது. டெக்ஸாஸ் மாகாணத்தில் உள்ள ரிச்சர்ட்சன் சிட்டி என்ற இடத்தைச் சேர்ந்த வெஸ்லி மாத்யூஸ் என்பவர் இந்தியாவில் இருந்து ஷெரின் மாத்யூஸ் என்ற 3 வயது சிறுமியை தத்தெடுத்துச் சென்றார். இந்நிலையில் அந்த சிறுமி காணாமல் போனதாக கூறப்படுகிறது. இதுகுறித்து தகவல் அளித்த வெஸ்லி மாத்யூஸ், ஷெரின் பால் குடிக்க மறுத்ததால் தாம் கோபமடைந்ததாகவும், அதற்கு தண்டனையாக அதிகாலை 3 மணியளவில் ஷெரினை வீட்டை விட்டு வெளியேற்றி அருகில் உள்ள மரத்தின் அருகே நிற்க வைத்ததாக கூறியுள்ளார். மேலும் சிறிது நேரம் கழித்துச் சென்று பார்த்தபோது ஷெரினை காணவில்லை என்று அவர் தெரிவித்துள்ளார்.இதுகுறித்து போலீசாரிடம் அவர் அளித்த புகாரின் பேரில் டல்லாஸ் நகர போலீஸார் குழந்தையைத் தேடும் பணியில் ஈடுபட்டனர். 15 நாள்களுக்குப் பிறகு, ரிச்சர்ட்ஸன் என்ற பகுதியில் உள்ள சுரங்கப்பாதையின் அடிப்பகுதியிலிருந்து சிறுமியின் உடல் கிடைத்துள்ளதாக போலீஸார் தெரிவித்துள்ளனர். மேத்யூஸ் கைது செய்யப்பட்டு, பிணையில் விடுவிக்கப்பட்டுள்ளார். இதனை தொடர்ந்து மீட்கப்பட்ட உடல் ஷெரினின் உடல் தானா என்பதை உறுதி செய்துகொள்வதற்கான நடவடிக்கைகள் மேற்கொள்ளப்பட்டு வருகிறது.

உலகம் முழுவதும் 110 கோடி பேர் கண் பார்வை இன்றி அவதி: ஆய்வில் தகவல்

Monday October 23rd, 2017 02:40:00 PM
வாஷிங்டன்: உலக வங்கியின் ‘வளர்ச்சி திட்டங்களை கண்டறிதல்’ என்ற அமைப்பு சமீபத்தில் சர்வதேச நாடுகளில் ஆய்வு மேற்கொண்டபோது, அதில் 110 கோடி பேர் கண் பார்வை இன்றி அவதிப்படுவதும் அடையாளம் இன்றி தவிப்பதும் கண்டறியப்பட்டுள்ளது. இதற்கு காரணம் உலக மக்களில் பெரும்பாலானோருக்கு சுகாதாரம் மற்றும் கல்வி அறிவு இல்லாததே என கண்டறியப்பட்டுள்ளது. ஆப்பிரிக்கா மற்றும் ஆசியா கண்டங்களில் கண் பார்வையற்றவர்கள் அதிகம் உள்ளதாக கூறப்பட்டுள்ளது. மேலும் பார்வையற்றவர்களில் மூன்றில் ஒரு பங்கு பேர் குழந்தைகள் ஆவர். இங்குள்ள பெரும்பாலான நாடுகளில் வறுமை, வன்முறை, ஆயுத கலாசாரம் மற்றும் வளர்ச்சியின்மை நிலவுவதால் குழந்தைகளுக்கும், கர்ப்பிணிகளுக்கும் போதுமான ஊட்டச்சத்து கிடைப்பதில்லை. அதனால் குழந்தைகளும், பெரியவர்களும் பார்வை இழப்பதாக ஆய்வில் கூறப்பட்டுள்ளது. சீனா உள்ளிட்ட பல நாடுகளில், குழந்தைகளின் பிறப்பை பதிவு செய்யாத காரணத்தால் குழந்தைகளின் உடல்நலம் குறித்த முழு தகவலும் அறிய முடிவதில்லை என உலக வங்கி தெரிவித்துள்ளது.

ஜப்பானை மிரட்டும் லேன் புயல்: கனமழையால் மக்களின் இயல்பு வாழ்க்கை பாதிப்பு!

Monday October 23rd, 2017 01:05:00 PM
டோக்கியோ: ஜப்பானை மிரட்டும் அதிவேக லேன் புயல் இன்று கரையை கடக்கும் என்று எதிர்பார்க்கப்படுகிறது. ஜப்பானின் முக்கிய தீவுகளில் லேன் புயல் நெருங்கும் நிலையில் மேற்கு மற்றும் மத்திய ஜப்பானில் பலத்த காற்றுடன் கனமழை பெய்து வருகிறது. இதனையடுத்து பல்வேறு இடங்களில் கனமழையால் வெள்ளபெருக்கு ஏற்பட்டுள்ளது. மணிக்கு 160 கி.மீ. வேகத்தில் மத்திய ஜப்பானின் பசிபிக் கடலோரத்தில் கரையை கடந்து டோக்கியோவை நோக்கி புயல் செல்லும் என்று தெரிவிக்கப்பட்டுள்ளது. புயல் காரணமாக புல்லட் ரயில் உள்ளிட்ட ரயில் சேவைகள் நிறுத்தப்பட்டுள்ளது. மேலும் ஜப்பானின் பல்வேறு தீவுகளுக்கும் படகு போக்குவரத்துக்களும் நிறுத்தப்பட்டுள்ளன. புயலை அடுத்து பொதுமக்கள் பாதுகாப்புடன் இருக்குமாறு எச்சரிக்கை விடுக்கப்பட்டுள்ளது. இந்த அதிவேக புயலால் மேற்கு மற்றும் மத்திய ஜப்பான் பிரதேசங்களில் மண்சரிவு, கடல் சீற்றம் போன்ற இயற்கை சீற்றங்கள் நிகழலாம் என்ற அறிவிப்பை தனது நாட்டு மக்களுக்கு ஜப்பான் அரசு தெரிவித்துள்ளது. இந்நிலையில் புயல், கன மழைக்கு மத்தியில் பிரதமர் பதவிக்கான தேர்தல், நேற்று நடந்து முடிந்தது. கடந்த இரண்டு பொதுத் தேர்தல்களை விட குறைவான ஓட்டுகளே பதிவாகியுள்ளதாக தகவல் வெளியாகியுள்ளது.

நைஜீரியாவில் தற்கொலைப் படையினர் தாக்குதல்: 13 பேர் பலி

Monday October 23rd, 2017 07:31:00 AM
அபுஜா: நைஜீரியா நாட்டில் போகோ ஹாரம் தீவிரவாதிகள் நடத்திய தற்கொலைப்படை தாக்குதலில் 13 பேர் உயிரிழந்துள்ளனர். நைஜீரியா நாட்டில் போகோ ஹாரம் தீவிரவாதிகள் பொதுமக்களை குறி வைத்து தொடர்ச்சியாக பல்வேறு தாக்குதல்களை நடத்தி வருவது குறிப்பிடத்தக்கது. இந்நிலையில், நைஜீரியா நாட்டின் மாய்துகுரி நகரில் போகோ ஹாரம் தீவிரவாதிகள் சிலர் தற்கொலைப் படை தாக்குதல் நடத்தினர். இந்த கொடூர தாக்குதலில் அப்பாவி பொதுமக்கள் 13 பேர் பரிதாபமாக உயிரிழந்துள்ளனர் என்றும், 5 பேர் படுகாயமடைந்துள்ளனர் என்றும் தகவல் வெளியாகியுள்ளது.

ஆயுதம் தாங்கிய ஆளில்லா விமானம்: இந்தியா கோரிக்கையை பரிசீலிக்கிறது அமெரிக்கா

Monday October 23rd, 2017 01:22:00 AM
வாஷிங்டன்: ஆயுதம் தாங்கிய ஆளில்லா விமானங்களை இந்தியாவுக்கு விற்பது குறித்து அமெரிக்கா பரிசீலித்து வருவதாக அதிபர் டிரம்ப் நிர்வாகம் தகவல் தெரிவித்துள்ளது. இந்திய விமானப்படையை நவீனமயமாக்கி வலுப்படுத்த மத்திய அரசு பல்வேறு நடவடிக்கைகளை எடுத்து வருகிறது. அதன் ஒரு பகுதியாக, ஆயுதம் தாங்கிய ‘பிரிடேட்டர் சி அவென்சர்’ ரக ஆளில்லா விமானங்களை அமெரிக்காவிடம் இருந்து வாங்க முடிவு செய்யப்பட்டது. ரூ.52,000 கோடி செலவில் 80 முதல் 100 ஆளில்லா விமானங்களை வழங்க அமெரிக்க அரசிடம் கடந்தாண்டு கோரிக்கை விடுக்கப்பட்டது.இது தொடர்பாக, கடந்த ஜூன் மாதம் அமெரிக்கா சென்றபோது அதிபர் டொனால்ட் டிரம்பிடம் பிரதமர் மோடி பேசினார். அந்த சந்திப்பின் போது, இந்தியாவுக்கு 22 கார்டியன் ரக ஆளில்லா உளவு விமானங்களை விற்க அமெரிக்கா சம்மதித்தது. இந்த விமானங்கள் இந்திய பெருங்கடலில் நமது விமானப்படையின் கண்காணிப்பை மேலும் வலுப்படுத்தும்.இந்நிலையில், இந்தியாவுக்கு ஆயுதம் தாங்கிய ஆளில்லா விமானங்கள் விற்கப்படுமா? என்பது குறித்து டிரம்ப் நிர்வாகத்தின் உயர் அதிகாரி ஒருவர் நேற்று அளித்த பேட்டியில், ‘‘இந்தியாவின் கோரிக்கை குறித்து பரிசீலிக்கப்பட்டு வருகிறது. இந்தியா உடனான எங்களின் ஒத்துழைப்பையும், உறவையும் பலப்படுத்த தொடர்ந்து நடவடிக்கை எடுத்து வருகிறோம். ராணுவத்தில் புதிய தொழில்நுட்பத்தை புகுத்தி நவீனமாக்கும் இந்தியாவின் நடவடிக்கைக்கு உதவும் வகையில் அடுத்த பத்தாண்டுகளில் பல நூறு கோடி மதிப்பிலான ஆயுதங்கள் வழங்கப்படும்’’ என்றார்.அமெரிக்காவின் முன்னாள் அதிபர் பராக் ஒபாமா ஆட்சிக் காலத்தில் இந்தியாவை முக்கிய ராணுவ ஒத்துழைப்பு நாடாக அங்கீகரித்தது. தற்போது டிரம்ப் ஆட்சியிலும் இந்தியா, அமெரிக்கா இடையேயான பாதுகாப்பு ஒத்துழைப்பு தொடர்ந்து வலுவடைந்து வருகிறது. எனவே, ஆயுதம் தாங்கிய ஆளில்லா விமானங்கள் வழங்கப்படும் பட்சத்தில் இந்திய விமானப்படையின் பலம் மேலும் அதிகரிக்கும் என எதிர்பார்க்கப்படுகிறது.

2 நாள் பயணமாக வங்கதேசம் சென்றார் சுஷ்மா

Monday October 23rd, 2017 01:07:00 AM
தாகா: இந்தியா, வங்கதேசம் நாடுகளுக்கு இடையே உறவை வலுப்படுத்துவது தொடர்பாக கூட்டு ஆலோசனை கூட்டம் வங்கதேச தலைநகர் தாகாவில் நடக்கிறது. இதில்  பங்கேற்க வெளியுறவு அமைச்சர் சுஷ்மா சுவராஜ் 2 நாள் பயணமாக நேற்று தாகா சென்றார். சிறப்பு விமானத்தில் சென்ற அவரை, வங்கதேச வெளியுறவு அமைச்சர் மமூத் அலி வரவேற்றார். அந்நாட்டு பிரதமர் ஷேக் ஹசீனா, முக்கிய எதிர்க்கட்சி தலைவர் ராஷன் இர்ஷாத் ஆகியோரை சுஷ்மா தனித்தனியாக சந்தித்து பேசினார்.

மலேசியாவில் நிலச்சரிவு: 11 தொழிலாளர்கள் பலி

Monday October 23rd, 2017 01:06:00 AM
கோலாலம்பூர்: மலேசியாவில் கட்டுமான இடத்தில் ஏற்பட்ட திடீர் நிலச்சரிவில் சிக்கி 11 தொழிலாளர்கள் பலியாகினர். மலேசியாவின் பினாங்க் மாநிலம் ஜார்ஜ்டவுனின் புறநகர் பகுதியான தான்ஜங் பங்காவில் 49 மாடிகள் கொண்ட 2 கட்டிடம் கட்டும் பணி நடக்கிறது. இது மலைப் பிரதேசம். 2வது மாடி கட்டப்பட்டு வரும் நிலையில், நேற்று முன்தினம் அங்கு திடீரென நிலச்சரிவு ஏற்பட்டது. இதில், கட்டுமான தொழிலாளர்கள் புதைந்தனர். உடனடியாக மீட்புப்பணிகள் மேற்கொள்ளப்பட்டன. இதுவரை 7 பேரின் சடலங்கள் மீட்கப்பட்டுள்ளன. 11 தொழிலாளர்கள் இறந்திருப்பது உறுதியாகி உள்ளது. இவர்கள் பாகிஸ்தான், வங்கதேசம், மியான்மர், இந்தோனேஷியாவை சேர்ந்தவர்கள். கட்டிட சூப்பர்வைசரான மலேசியாவைச் சேர்ந்தவரை காணவில்லை. தொடர்ந்து மீட்பு பணிகள் நடக்கின்றன. நிலச்சரிவுக்கான காரணம் குறித்து தீவிர விசாரணை நடத்தப்படுகிறது. தற்காலிகமாக, கட்டுமான பணிகள் நிறுத்தப்பட்டுள்ளன.

ஜப்பான் தேர்தலில் அபேக்கு மீண்டும் வெற்றி வாய்ப்பு

Monday October 23rd, 2017 01:05:00 AM
டோக்கியோ: ஜப்பானில் பிரதமர் அபே முன்கூட்டியே நாடாளுமன்ற தேர்தலை அறிவித்தார். அதன்படி அங்கு நேற்று தேர்தல் நடந்தது. காலை 7 மணிக்கே வாக்குப்பதிவு தொடங்கியது. ஜப்பானை சூறாவளி நெருங்குவதால் அங்கு பெரும்பாலான பகுதிகளில் கனமழை பெய்தது. அதை பொருட்படுத்தாமல் மக்கள் வாக்களித்தனர். தேர்தலுக்கு முந்தைய கருத்துக் கணிப்புகளும், மொத்தமுள்ள 465 இடங்களில், அபேயின் கட்சி 300 இடங்களில் வெற்றி பெறும் என தெரிவித்தது. தேர்தல் நேற்று இரவு 8 மணிக்கு முடிந்தது. அதன்பின் தேர்தலுக்கு பிந்தைய கருத்துக் கணிப்பு முடிவுகள் வெளியி்டப்பட்டன. அதில் அபே ஜனநாயக விடுதலை கட்சி 300 இடங்களுக்கு மேல் வெற்றி பெறும் என தெரிவித்துள்ளது. வெற்றி கிடைத்தால், நீண்ட காலம் ஆட்சியில் இருக்கும் பிரதமர் என்ற பெருமை அபேக்கு கிடைக்கும்.

வங்கதேச பிரதமர் ஷேக் ஹசீனாவுடன் சுஷ்மா சுவராஐ் சந்திப்பு

Sunday October 22nd, 2017 07:24:00 PM
டாக்கா: வங்கதேச பிரதமர் ஷேக் ஹசீனாவை இந்திய வெளியுறவுத்துறை அமைச்சர் சுஷ்மா சுவராஐ் சந்தித்து பேசியுள்ளார். இருநாட்டு உறவுகளை வலுப்படுத்துவது குறித்து ஹசீனாவுடன் சுஷ்மா சுவராஐ் பேசியுள்ளார்.


ஆட்சிக்கு எதிராக வாக்களித்த ஓ.பி.எஸ் உள்பட 12 பேரின் எம்.எல்.ஏ பதவி பறிபோகும்: டி.டி.வி பேட்டி

Tuesday October 24th, 2017 01:07:00 PM
சென்னை: அதிமுக 46-வது ஆண்டு விழாவை ராமநாதபுரத்தில் கொண்டாடுமாறு சசிகலா கூறியிருந்தார் என்று டி.டி.வி தினகரன் சென்னையில் பேட்டி அளித்துள்ளார். எம்.ஜி.ஆர் வாழ்ந்த இடத்தில அதிமுக விழா கொண்டாடியது மகிழ்ச்சி அளிக்கிறது என்றும் அவர் கூறினார். ஆட்சிக்கு எதிராக வாக்களித்த ஓ.பி.எஸ் உள்பட 12 பேரின் எம்.எல்.ஏ பதவி பறிபோகும் என்று அவர் கூறினார்.

பணமதிப்பு ரத்து நடவடிக்கை விவகாரம் : நவம்பர் 8-ம் தேதி கருப்பு தினமாக அனுசரிக்க திமுக முடிவு

Tuesday October 24th, 2017 01:04:00 PM
சென்னை: பணமதிப்பு ரத்து நடவடிக்கை எடுத்த மத்திய பா.ஜ.க. அரசைக் கண்டித்து நவம்பர் 8-ம் தேதி கருப்பு தினமாக அனுசரிக்க திமுக முடிவு செய்துள்ளது. திமுக தொண்டர்கள் கருப்புச் சட்டை அணிந்து கருப்பு தின ஆர்ப்பாட்டத்தில் பங்கேற்க மு.க.ஸ்டாலின் அழைப்பு விடுத்துள்ளார். திமுக மாவட்டச் செயலாளர்கள் தலைமையில் நிர்வாகிகள், தொண்டர்கள் பங்கேற்க வேண்டும். ஒரே கருத்துடைய கட்சிகள் அனைத்தும் கண்டன ஆர்ப்பாட்டத்துக்கு ஆதரவு தெரிவிக்கும் என மு.க.ஸ்டாலின் தெரிவித்துள்ளார். பணமதிப்பு நடவடிக்கையால் பாதிக்கப்பட்ட வணிகர்கள், விவசாயிகள், திரைத்துறையினரும் பங்கேற்க வேண்டும் என ஸ்டாலின் வலியுறுத்தியுள்ளார்.

விழுப்புரம் ஆட்சியர் அலுவலகம் எதிரே தேமுதிக தலைவர் விஜயகாந்த் தலைமையில் ஆர்ப்பாட்டம்

Tuesday October 24th, 2017 12:39:00 PM
விழுப்புரம்: விழுப்புரம் ஆட்சியர் அலுவலகம் எதிரே தேமுதிக தலைவர் விஜயகாந்த் தலைமையில் கண்டன ஆர்ப்பாட்டம் நடைபெற்று வருகிறது. கரும்பு நிலுவை தொகை, வறட்சி நிவாரணம் வழங்க கோரி தேமுதிகவினர் ஆர்ப்படர்டத்தில் ஈடுபட்டுள்ளனர்.

நடிகர் விஷால் அலுவலகத்தில் நடந்த வருமான வரி சோதனையில் உள்நோக்கம்: துரைமுருகன்

Tuesday October 24th, 2017 12:29:00 PM
சென்னை: சென்னையில் நடிகர் விஷால் அலுவலகத்தில் நடந்த வருமான வரித் துறை சோதனையில் உள்நோக்கம் உள்ளது என்று துரைமுருகன் கூறியுள்ளார். எமர்ஜென்சி காலகட்டத்தில் கூட இது போன்ற சர்வாதிகார போக்கு நடைபெறவில்லை என்றும் திமுக முதன்மைச் செயலாளர் துரைமுருகன் கூறியுள்ளார்.

என்.எல்.சி.யின் பங்குகளை விற்க பாமக கண்டனம்

Tuesday October 24th, 2017 10:40:00 AM
சென்னை: என்.எல்.சி.யின் 15% பங்குகளை தனியாருக்கு விற்கக் கூடாது என்று மத்திய அரசுக்கு பாமக கண்டனம் தெரிவித்துள்ளது. என்.எல்.சி நிறுவன பங்குகளில் 89.32% பங்குகள் மத்திய அரசிடம் உள்ளன. என்.எல்.சி பங்குகளை அந்த நிறுவனத்துக்கு நிலம் தந்த குடும்பத்துக்கு  இலவசமாக தரவேண்டும்  தமிழகத்தின் அடையாளமாக திகழும் என்.எல்.சி பங்குகளை விற்பது கண்டிக்கத்தக்கது என்றும் ராமதாஸ் கூறியுள்ளார்.

ஜெயலலிதா சொத்து யாருக்கு?: ஜெ.தீபா மனுவை பரிசீலிப்பதாக அரசு உத்தரவாதம்

Tuesday October 24th, 2017 01:03:00 AM
சென்னை: ஜெயலலிதாவின் சொத்துக்களுக்கு நாங்களே வாரிசு என்று அறிவிக்கக்கோரி ஜெ.தீபா தொடர்ந்த வழக்கில் அவரது கோரிக்கை மனுவை 4 வாரங்களுக்குள் பரிசீலிப்பதாக தமிழக அரசு சார்பில் உயர் நீதிமன்றத்தில் உத்தரவாதம் கொடுத்ததையடுத்து வழக்கு முடித்துவைக்கப்பட்டது.ஜெயலலிதாவின் போயஸ் கார்டன் இல்லத்தை ஜெயலலிதாவின் நினைவிடமாக அரசு அறிவித்தது. இதற்கு சம்மதம் தெரிவிக்காத தீபா தான் மற்றும் தனது சகோதரர் தீபக் ஆகியோர் விருப்பத்தை கேட்காமல் அரசு போயஸ் கார்டன் இல்லத்தை நினைவு இல்லமாக அறிவித்துள்ளது என்று குரல் எழுப்பினர். இந்நிலையில், ஜெயலலிதாவின் வாரிசு நாங்கள்தான், அவரின் சொத்தும் எங்களுக்கே உரிமையானது என்று தீபாவும், விவேக்கும் வெளிப்படையாக பேசி வருகிறார்கள். இதையடுத்து, ஜெ.தீபா உயர் நீதிமன்றத்தில் ஒரு மனு தாக்கல் செய்துள்ளார். அந்த மனுவில், “ முன்னாள் முதல்வர் ஜெயலலிதாவின் தாயான எனது பாட்டி சந்தியா பல்வேறு சொத்துக்களை வாங்கினார். அதில் போயஸ்கார்டனும் ஒன்று. எனது பாட்டி உயிருடன் இருந்தபோது போயஸ் கார்டன் இல்லத்தின் எனது அத்தை ஜெயலலிதாவும், எனது தந்தை ஜெயக்குமாரும் அவருடன் இருந்தனர். எனது அத்தை ஜெயலலிதா தனது பெயரில் சென்னை, கோடநாடு, ஐதராபாத், பெங்களூரு உள்ளிட்ட இடங்களில் பல்வேறு சொத்துக்களை வாங்கியுள்ளார்.ஆனால், அவரது மரணத்திற்கு முன்பு இந்த சொத்துக்கள் தொடர்பாக உயில் எழுதி வைக்கவில்லை. இருந்தபோதிலும் அவருக்கு நானும் எனது சகோதரரும்தான் சட்டபூர்வ வாரிசு. அதனால், போயஸ் கார்டன் இல்லத்தை அரசு கையகப்படுத்தக்கூடாது என்று முதல்வர் எடப்பாடி பழனிசாமிக்கும் தலைமைச் செயலாளர் உள்ளிட்ட அதிகாரிகளுக்கும் கடந்த ஆகஸ்ட் 22ம் தேதி கடிதம் எழுதினேன்.ஆனால் எனது கோரிக்கை மீது எந்த நடவடிக்கையும் எடுக்கப்படவில்லை. அதேநேரத்தில் சட்டபூர்வமாக எங்களுக்கு சொந்தமான போயஸ் கார்டன் இல்லத்தை தமிழக அரசு நினைவில்லமாக மாற்றுவதற்கான பணிகளை தொடங்கியுள்ளனர். இது சட்டவிரோதமானது.எனவே, ஜெயலலிதாவின் உண்மையான சட்டபூர்வ வாரிசு நாங்கள் என்றும், அவரது சொத்துக்களுக்கான உரிமையை எங்களுக்கு மட்டுமே தரவேண்டும் என்றும் உத்தரவிட வேண்டும். மேலும், போயஸ் கார்டன் இல்லத்தை ஜெயலலிதாவின் நினைவிடமாக மாற்றும் நடவடிக்கையை நிறுத்துமாறும் உத்தரவிட வேண்டும்.இவ்வாறு மனுவில் கூறப்பட்டுள்ளது.இந்த மனு நீதிபதி ரவிச்சந்திரபாபு முன்னிலையில் நேற்று விசாரணைக்கு வந்தது. அப்போது, அட்வகேட் ஜெனரல் விஜய நாராயண் ஆஜராகி, தீபாவின் மனுவை 4 வாரங்களுக்குள் பரிசீலித்து உத்தரவு பிறப்பிப்பதாக தெரிவித்தார். தமிழக அரசின் இந்த உத்தரவாதத்தை ஏற்றுக்கொண்ட நீதிபதி வழக்கை முடித்துவைத்து உத்தரவிட்டார்.

மீன்வளத்துறை அமைச்சர் என்பதை மறந்து சூப்பர் முதல்வராக ஜெயக்குமார் நினைப்பதால்தான் மீனவர்கள் மீது கொடூர தாக்குதல் நடந்துள்ளது: மு.க.ஸ்டாலின் கண்டனம்

Tuesday October 24th, 2017 01:03:00 AM
சென்னை: சென்னை அண்ணா அறிவாலயத்தில் திமுக செயல் தலைவரும் எதிர்க்கட்சி தலைவருமான மு.க.ஸ்டாலின் நிருபர்களுக்கு அளித்த பேட்டி வருமாறு:மோடி எங்கள் பக்கம் தான் இருக்கிறார், இரட்டை இலை சின்னம் எங்களுக்குதான் கிடைக்கும் என அமைச்சர்கள் இப்போதே சொல்வதைப் பார்த்தால் ஆர்.கே.நகர் இடைத் தேர்தல் நியாயமாக நடக்குமா?திமுக சார்பில் ஆர்.கே.நகர் இடைத் தேர்தலில் போட்டியிட்ட வேட்பாளர் இது தொடர்பாக சம்பந்தப்பட்ட அதிகாரிகளிடம் புகார் மனு கொடுத்திருக்கிறார். தேவைப்படுமானால் அதற்காக நீதிமன்றத்தை நாடவும் நாங்கள் தயாராக இருக்கிறோம். ஆர்.கே.நகர் வாக்காளர் பட்டியலில் ஏறக்குறைய 45,000 போலி வாக்காளர்கள் இணைக்கப் பட்டுள்ளனர். திமுக அமைப்புச் செயலாளர் ஆர்.எஸ்.பாரதி திமுக வழக்கறிஞர் அணி அமைப்பாளர் கிரிராஜன் ஆகியோர் புகார் மனு அளித்திருக்கிறார்கள். டபுள் என்ட்ரி ஆகியுள்ள வாக்காளர்களின் பெயர்கள் பட்டியலில் இருந்து நிச்சயமாக நீக்கப்படும் என்று தேர்தல் ஆணையர் ராஜேஷ் லகானி உறுதியளித்துள்ளார். அப்படி நீக்கவில்லை என்றால் அதற்காக நீதிமன்றத்தை நாடவும் நாங்கள் தயாராக இருக்கி றோம்.நெல்லையில், கந்துவட்டி கொடுமை காரணமாக ஒரே குடும்பத்தை சேர்ந்த 4 பேர் தற்கொலை செய்து கொண்டு இருக்கிறார்களே?நெல்லையில் கடையநல்லூர் பகுதியில் கந்துவட்டி கொடுமையால் ஒரு குடும்பம் தற்கொலை செய்து கொண்டிருப்பது மிகுந்த வருத்தத்தை ஏற்படுத்துகிறது. இந்தக் கொடுமைக்குக் காரணமான கந்துவட்டி நபர்களை கண்டுபிடித்து அவர்கள் மீது இந்த அரசு உடனடியாக உரிய நடவடிக்கை எடுக்க வேண்டும் என்று கேட்டுக் கொள்கி றேன்.அமைச்சர் ஜெயகுமாருக்கு எதிராக மீனவர்கள் ஆர்ப்பாட்டம் நடத்திக் கொண்டிருக்கிறார்களே?தான் ஒரு மீன்வளத்துறை அமைச்சர் என்பதை மறந்து ஜெயகுமார் ஒரு சூப்பர் முதல்வராக செயல்பட்டுக் கொண்டிருக்கிறார். எனவே, மீன்வளத்துறையில் உள்ள பிரச்னைகள் பற்றி சிந்திப்பதற்கு அவருக்கு நேரமில்லை. அதனால் தான் மீனவர்கள் போராடும் நிலை வந்துள்ளது. அப்படி ஜனநாயக முறையில் போராடிய மீனவ சமுதாயத்தினை சேர்ந்த பெரியோர்களை யும், தாய்மார்களையும் காவல்துறையை விட்டு கொடூரமாக தடியடி நடத்தி, அதனால் பல பேர் கடுமையாக பாதிக்கப்பட்டு மருத்துவமனையில் அனுமதிக்கப்பட்டு இருப்பதாக செய்திகள் வந்திருக்கின்றன. இது வன்மையாக கண்டிக்கத்தக்கது. அரசு உடனே இதில் தலையி ட்டு, மீனவர்களுக்கு உரிய பரிகாரம் செய்ய வேண்டும்.பேரறிவாளனுக்கு பரோலை நீட்டிக்க வேண்டும் என்று கோரிக்கை எழுந்துள்ளதே?பேரறிவாளனின் தந்தை மருத்துவமனையில் அனுமதிக்கப்பட்டுள்ள நிலையில், அவரது உடல் நலனைப் பொறுத்து அவரது பரோலை நீட்டிக்க வேண்டும் என்று ஏற்கனவே எதிர்க் கட்சித் தலைவர் என்ற முறையில் திமுக சார்பில் நான் இந்த அரசுக்கு கோரிக்கை வைத்திருக்கிறேன். தற்போது அவரது பரோல் முடியவுள்ள நிலையில், அதனை நீட்டிக்க வேண்டும் என்று திமுக சார்பில் கேட்டுக் கொள்கிறேன்.இவ்வாறு கூறினார்.

கேரள முதல்வருடன் திருமாவளவன் சந்திப்பு

Tuesday October 24th, 2017 01:03:00 AM
சென்னை:  கேரளா மாநிலம் திருவனந்தபுரத்தில் உள்ள தலைமை செயலகத்தில் அம்மாநில முதல்வர் பினராய் விஜயனை விடுதலை சிறுத்தைகள் கட்சி தலைவர் திருமாவளவன் நேற்று சந்தித்து தாழ்த்தப்பட்டோர் கோயில்களில் அர்ச்சகர்களாக நியமிக்கப்பட்டதற்கு வாழ்த்துக்களை தெரிவித்துகொண்டார்.பின்னர் கோரிக்கை மனு ஒன்றையும் அளித்தார். அதில் கூறியிருப்பதாவது:தலித்துகளை அர்ச்சகர்களாக நியமிக்கும் முடிவை எடுத்த கேரள அரசுக்கு விசிக சார்பில் வாழ்த்துக்களை தெரிவித்துகொள்கிறோம். இந்திய சமூக நீதி வரலாற்றில் ஒரு முக்கியமான நகர்வாக இது இருக்கிறது.  தமிழ் நாட்டில் இன்னும் ஒரு தலித்துகள் கூட அர்ச்சகராக நியமிக்கப்படவில்லை. இவ்வாறு அதில் கூறப்பட்டுள்ளது.

அரசு கொறடா உத்தரவுக்கு எதிராக செயல்பட்ட ஓபிஎஸ்., பாண்டியராஜனை பதவியிலிருந்து நீக்க வேண்டும்: உயர் நீதிமன்றத்தில் திமுக எம்எல்ஏ மனு தாக்கல்

Tuesday October 24th, 2017 01:02:00 AM
சென்னை: அரசுக்கு எதிராக நம்பிக்கை வாக்கெடுப்பில் வாக்களித்த ஓ.பன்னீர்செல்வத்துக்கு துணை முதல்வர் பதவியும், பாண்டியராஜனுக்கு அமைச்சர் பதவியும் வழங்கியது சட்டவிரோதம். அதனால் அவர்களை பதவியிலிருந்து நீக்க வேண்டும் எனக்கோரி திமுக எம்எல்ஏ கு.பிச்சாண்டி உயர் நீதிமன்றத்தில் தனியாக வழக்கு தொடர்ந்துள்ளார்.திமுக எம்எல்ஏவும் முன்னாள் அமைச்சருமான கு.பிச்சாண்டி உயர் நீதிமன்றத்தில் தாக்கல் செய்துள்ள மனுவில் கூறியிருப்பதாவது:ஜெயலலிதாவின் மரணத்திற்குப் பிறகு முதல்வராக ஓ.பன்னீர் செல்வம் பதவியேற்றார். பின்னர் எடப்பாடி பழனிசாமி முதல்வராக நியமிக்கப்பட்டார். இதனால், ஓ.பன்னீர்செல்வம் தனி அணியாக பிரிந்து சென்றார். இந்நிலையில், சட்டப் பேரவையில் எடப்பாடி பழனிச்சாமி தனது பெரும்பான்மையை நிரூபிக்க வேண்டும் என்று ஆளுநர் உத்தரவிட்டார்.இதையடுத்து, கடந்த பிப்ரவரி 18ம் தேதி பெரும்பான்மையை நிரூபிக்க பேரவைக் கூட்டம் நடந்தது. அப்போது, திமுக உள்ளிட்ட எதிர்கட்சிகள் நம்பிக்கை வாக்கெடுப்பை ரகசிய வாக்கெடுப்பாக நடத்த வேண்டும் என்று கோரிக்கை வைத்தனர். அதற்கு பேரவைத் தலைவர் ஒப்புக்கொள்ளவில்லை. இதனால் ஏற்பட்ட கூச்சல் குழப்பத்தால் திமுக உறுப்பினர்கள் வலுக்கட்டாயமாக பேரவையிலிருந்து வெளியேற்றப்பட்டனர். பின்னர் வாக்கெடுப்பு நடத்தப்பட்டு எடப்பாடி பழனிச்சாமி அரசு தப்பித்தது.வாக்கெடுப்பின்போது அதிமுகவிலிருந்து பிரிந்து சென்ற ஓ.பன்னீர்செல்வம், மாபா.பாண்டியராஜன் உள்ளிட்ட 11 எம்எல்ஏக்கள் அரசுக்கு எதிராக வாக்களித்தனர். அரசு கொறடாவின் உத்தரவுக்கு எதிராக அவர்கள் அரசுக்கு எதிராக வாக்களித்தனர். எனவே, அவர்கள் அரசியலமைப்பு சட்டத்தின் பத்தாவது செட்யூல்டு பத்தி 2(1)(பி)ன் கீழ் பேரவை உறுப்பினர் பதவியிலிருந்து தகுதி இழப்பு செய்யப்பட வேண்டும். ஆனால், அதற்கு முரணாக அரசுக்கு எதிராக வாக்களித்த ஓ.பன்னீர்செல்வதுக்கு துணை முதல்வர் பதவியும், மா.பா.பாண்டியராஜனுக்கு அமைச்சர் பதவியும் தரப்பட்டுள்ளது. நம்பிக்கை வாக்கெடுப்பின் போது, அரசு தலைமை கொறடா ராஜேந்திரனின் உத்தரவை மீறி ஓ.பன்னீர்செல்வம், மாபா.பாண்டியராஜன் உள்ளிட்ட 11 பேர் முதல்வர் எடப்பாடி பழனிசாமிக்கு எதிராக வாக்களித்த உடனேயே, அவர்களின் உறுப்பினர் தகுதியை இழந்துவிட்டனர். அவர்களை பேரவைத் தலைவர் தனியாக ஒரு தகுதியிழப்பு செய்து உத்தரவு பிறப்பிக்க வேண்டிய அவசியமில்லை.  சட்டப் பேரவை உறுப்பினராக இருக்க தகுதியில்லாத இருவரும், எந்த தகுதியின் அடிப்படையில் அமைச்சர்களாக பதவி வகிக்கிறார்கள் என்பது குறித்து இருவரும் தன்னிலை விளக்கமளிக்க  இருவருக்கும் உத்தரவிட வேண்டும். அவர்கள் இருவரும் அமைச்சர்களாக தொடர்வது சட்டவிரோதமானது. அரசியலமைப்பு சட்டத்துக்கு எதிரானது என்பதால் நீதிமன்றம் தலையிட்டு ஓ.பன்னீர்செல்வம், மாபா பாண்டியராஜன் ஆகியோர் அமைச்சர்களாக செயல்பட தடை விதிக்க வேண்டும்.இவ்வாறு மனுவில் கூறப்பட்டுள்ளது.இந்த மனு உயர் நீதிமன்றத்தில் விரைவில் விசாரணைக்கு வருகிறது.

மெர்சல் பற்றி பேசியதால் தொலைபேசியில் மிரட்டல்: தமிழிசை பகீர் தகவல்

Tuesday October 24th, 2017 01:02:00 AM
சென்னை: மெர்சல் படம் குறித்து பேசியதால் மர்ம நபர்கள் என்னை தொலைபேசியில் மிரட்டுகின்றனர். அசிங்கமாக பேசுகின்றனர் என்று தமிழிசை கூறியுள்ளார். தமிழக பாஜ தலைவர் தமிழிசை நேற்று காலை சென்னையிலிருந்து விமானம் மூலம் திருச்சி புறப்பட்டு சென்றார். முன்னதாக அவர் சென்னை விமான நிலையத்தில் நிருபர்களுக்கு அளித்த பேட்டி: பாஜவின் பொதுக்குழு மற்றும் செயற்குழு கூட்டம் கரூரில் 2 நாள் நடக்கிறது. இந்த கூட்டத்தில் ஆர்.கே.நகர் தொகுதி இடைத்தேர்தல், உள்ளாட்சி தேர்தலை எந்த விதத்தில் எதிர்கொள்வது என்பது குறித்த முக்கிய விஷயங்கள் பற்றி விவாதிக்கப்படுகிறது. நடிகர் வடிவேலை எங்கள் கட்சியில் இழுப்பதற்கு நாங்கள் எந்த முயற்சியிலும் ஈடுபடவில்லை.  ஜிஎஸ்டி தொடர்பாக தவறான கருத்து மெர்சல் படத்தில் இருந்ததால்தான் கண்டித்தேன். சம்பந்தப்பட்ட காட்சிகளை நீக்க வேண்டும் என்று கூறினேன். இது தவிர தனிப்பட்ட முறையில் நடிகர் விஜய்க்கும் எனக்கும் எந்த பிரச்னையும் இல்லை.ஆனால் இன்று காலை எனக்கு பல்வேறு மர்ம நபர்கள் தொலைபேசியில் மிரட்டும் தொனியில் அசிங்கமாக பேசினர். இது சரியல்ல. இந்த தவறான செயலை செய்பவர்கள் உடனடியாக நிறுத்தி கொள்ள வேண்டும். கருத்து சுதந்திரம் என்று எதிர்கட்சிகள் பேசுகின்றனர். அதே கருத்து சுதந்திரம் எங்களுக்கும் உண்டு. அந்த அடிப்படையில்தான் நாங்கள் சில தவறுகளை சுட்டிக் காட்டி பேசுகிறோம் என்றார்.

பாஜவுக்கு அரசியல் அங்கீகாரம் வழங்கியது அதிமுகவா? தமிழக மக்கள் நம்ப மாட்டார்கள்: கே.பி.முனுசாமிக்கு தமிழிசை பதிலடி

Tuesday October 24th, 2017 01:02:00 AM
சென்னை: தமிழகத்தில் பாஜவுக்கு அதிமுகவுக்கு தான் அரசியல் அங்கீகாரம் வழங்கியது என்பதை இப்போதுள்ள மக்கள் நம்ப மாட்டார்கள் என்று தமிழிசை சவுந்தரராஜன் கூறியுள்ளார். இது குறித்து தமிழக பாஜ தலைவர் தமிழிசை சவுந்தரராஜன் கூறியதாவது:அதிமுகவில் மாறுப்பட்ட கருத்துக்கள் இருந்து வருகிறது. அங்கு இருக்கும் அமைச்சர்கள் தினம், தினம் ஒரு கருத்தை ெதரிவித்து வருகின்றனர். அமைச்சர் ராஜேந்திர பாலாஜி பிரதமர் மோடி இருக்கும் வரை அதிமுக அரசுக்கு கவலை இல்லை என்று கூறுகிறார். தற்போது முன்னாள் அமைச்சர் கே.பி.முனுசாமி அதிமுகவை இன்னொரு கட்சி தலைவர் காப்பாற்ற வேண்டிய அவசியல் இல்லை என்று கூறுகிறார். இதுவே அதிமுகவின் மாறுப்பட்ட கருத்துக்கு சாட்சி. பாஜவுக்கு அரசியல் அங்கீகாரம் வழங்கியதே அதிமுக தான் என்ற கருத்தை இப்போது உள்ள மக்கள் நம்ப மாட்டார்கள். மெர்சல் படத்தை ஆர்வக்கோளாறால் பாஜ தலைவர்கள் எதிர்ப்பதாக கே.பி.முனுசாமி குற்றம் சாட்டியிருக்கிறார். பாஜ தலைவர்களுக்கு ஆர்வக்கோளாறு இருப்பது உண்மை தான். ஜி.எஸ்.டி. என்பது மத்திய அரசின் திட்டம் மட்டும் இல்லை. மாநில அரசின் திட்டமும் தான். ஒவ்வொரு மாநிலத்தின் நிதி அமைச்சர்களும் கலந்து ெகாண்டு ஒப்புதல் அளித்த பின்னர் தான் ஜி.எஸ்.டி. சட்டம்  கொண்டுவரப்பட்டது. அப்படி இருக்கும் நிலையில், மெர்சல் படத்தில் வந்த ஜி.எஸ்.டி. தொடர்பான காட்சியில் முதலில் அவர்கள் தான் ஆர்வத்துடன் எதிர்ப்பு ெதரிவித்து இருக்க வேண்டும். ஆனால், அவர்கள் எதிர்ப்பு தெரிவிக்கவில்லை. அப்படியிருக்கும் போது ஜி.எஸ்.டி. தொடர்பான காட்சியை எதிர்த்த எங்களை ஆர்வக்கோளாறு என்று அவர்கள் சொல்வது வேடிக்கையாக உள்ளது.இவ்வாறு அவர் கூறினார்.

பொதுக்குழு கூட்டத்தை எதிர்த்து வெற்றிவேல் தொடர்ந்த வழக்கு இபிஎஸ்-ஒபிஎஸ் அணிகள் இணைய தேர்தல் ஆணையம் தடைவிதிக்கவில்லை

Tuesday October 24th, 2017 01:02:00 AM
சென்னை: அதிமுகவில் இரு அணிகளாக ெசயல்பட்ட ஓ.பன்னீர்செல்வம் அணியும், எடப்பாடி பழனிசாமி அணியும் கடந்த ஆகஸ்ட் மாதம் இணைந்தன. இதையடுத்து, கட்சியின் பொதுக்குழுவை செப்டம்பர் 12ம் தேதி கூட்டுவதற்காக திட்டமிடப்பட்டு அதற்கான அறிவிப்பு ஆகஸ்ட் 28ம் தேதி வெளியிடப்பட்டது. இந்த அறிவிப்பை ரத்து செய்யக் கோரியும், பொதுக்குழுவுக்கு தடை விதிக்கக்கோரியும் சட்டப் பேரவை உறுப்பினர் பதவியிலிருந்து தகுதி நீக்கம் செய்யப்பட்ட வெற்றிவேல் உயர் நீதிமன்றத்தில் வழக்கு தொடர்ந்தார். இந்த வழக்கை விசாரித்த உயர் நீதிமன்றம் வழக்கில் பதில் மனு தாக்கல் செய்யுமாறு முதல்வர் எடப்பாடி பழனிசாமி உள்ளிட்டோருக்கு நோட்டீஸ் அனுப்ப உத்தரவிட்டது.இதையடுத்து, இந்த வழக்கில் எடப்பாடி பழனிச்சாமி நேற்று பதில் மனு தாக்கல் செய்தார். அவர் தாக்கல் செய்த மனுவில் கூறியிருப்பதாவது:  தேர்தல் ஆணையத்தில் கட்சியின் சின்னம் மற்றும் கட்சியின் உரிமை தொடர்பான வழக்கு நிலுவையில் உள்ளது. அதனால், இந்த வழக்கில் தேர்தல் ஆணையத்தையும் எதிர் மனுதாரராக சேர்க்க வேண்டும். இரண்டு அணிகளும் இணைந்த நிலையில் நடத்தப்பட்ட பொதுக்குழுவில் மொத்தமுள்ள 2,128 பொதுக்குழு உறுப்பினர்களில் 1,828 உறுப்பினர்கள் கலந்துகொண்டனர். எனவே, ஒருமனதாக பல்வேறு தீர்மானங்கள் பொதுக்குழுவில் நிறைவேற்றப்பட்டன. பொதுக்குழு தொடர்பான அறிவிப்பு அனைத்து அதிமுக கிளை அலுவலகங்களிலும் அறிவிப்பு பலகையில் ஒட்டப்பட்டன. மேலும், அனைவருக்கும் அழைப்பிதழ் அனுப்பப்பட்டன. இரண்டு அணிகளும் ஒன்று சேரக்கூடாது என்று தேர்தல் ஆணையம் எந்த உத்தரவையும் பிறப்பிக்கவில்லை. ஆனால், மனுதாரர் பொய்யான தகவல்களுடன் இந்த வழக்கை தொடர்ந்துள்ளார்.  எனவே, அவர் மீது உரிய நடவடிக்கை எடுக்க எங்களுக்கு அதிகாரம் உள்ளது. தேர்தல் ஆணையத்தில் கட்சி தொடர்பான வழக்கு நிலுவையில் உள்ள நிலையில் மனுதாரர் வெற்றிவேல் எந்த வகையில் பாதிக்கப்பட்டுள்ளார் என்று தெரியவில்லை. அவர் எந்த கோஷ்டியில் உள்ளார் என்று மனுவில் தெரிவிக்கவில்லை. ஆணையம் முடிவு அறிவிப்பதற்கு முன்பு இதுபோன்ற சிவில் வழக்குகளை தொடர முடியாது. எனவே, இந்த வழக்கைத் தள்ளுபடி செய்ய வேண்டும் என்று கூறப்பட்டிருந்தது. இந்த மனு நீதிபதிகள் ராஜீவ் சக்தேர், என்.சதீஷ்குமார் முன்னிலையில் விசாரணைக்கு வந்தது. வழக்கை விசாரித்த நீதிபதிகள், இந்த வழக்கில் மதுசூதனன், ஓ.பன்னீர்செல்வம் உள்ளிட்டோர் தங்களது பதில் மனுவைத் தாக்கல் செய்ய வேண்டும் என்று உத்தரவிட்டு விசாரணையை நவம்பர் 30ம் தேதிக்குத் தள்ளிவைத்தனர்.

பொன்.ராதாகிருஷ்ணன், தமிழிசை குறித்து விக்கிபீடியாவில் அவதூறு: தமிழக பாஜவினர் அதிர்ச்சி

Tuesday October 24th, 2017 01:02:00 AM
சென்னை:  இணையத்தின் தகவல் களஞ்சியமான விக்கிபீடியாவில் அனைத்து விவரங்களும் இடம்பெற்றிருக்கும். உலக தலைவர்களின் விவரங்கள், அரசியல் பிரமுகர்களின் தகவல்கள், நடிகர், நடிகைகளின் தகவல்கள், பிரபலங்களின் விவரங்கள், விளையாட்டு வீரர்களின் விவரங்களை இதில் தெரிந்துகொள்ளலாம்.  இந்நிலையில் விக்கிபீடியாவின் ஆங்கில பக்கத்தில் மத்திய அமைச்சர் பொன்.ராதாகிருஷ்ணன் பெயருக்கு கீழே பொரி உருண்டை என தமிழில் பதிவிடப்பட்டுள்ளது. இது பெரும் சர்ச்சையை ஏற்படுத்தியது. ஒரு மத்திய அமைச்சரை இவ்வாறு விமர்சனம் செய்திருப்பது அரசியல் வட்டாரத்திலும், பாஜவினர் மத்தியிலும் பெரும் பரபரப்பை ஏற்படுத்தியது. அதுமட்டுமல்லாமல் தமிழக பாஜ தலைவர் தமிழிசை குறித்தும் விக்கிபீடியாவில் அவதூறு செய்யப்பட்டுள்ளது. தமிழிசை தந்தை பெயர் குமரி முத்து என்றும், தமிழிசையை டுமீழிசை சவுந்தரராஜன் என்றும் குறிப்பிட்டுள்ளனர். தமிழக பாஜ தலைவர்கள் குறித்து விமர்சனம் செய்திருப்பது பாஜவினர் மத்தியில் கடும் அதிர்ச்சியை ஏற்படுத்தியுள்ளது. இதற்கிடையில், அவதூறு பதிவிடப்பட்ட சில மணி நேரத்தில், பொரி உருண்டை’ என்ற வார்த்தையை விக்கிபீடியா நீக்கியது. இதேபோல, தமிழிசை பக்கத்திலும் அவதூறு வார்த்தைகள் நீக்கப்பட்டன.  தமிழக பாஜ தலைவர்கள் சமீப காலமாக நடிகர் விஜய் நடித்துள்ள, மெர்சல் படத்தில் ஜி.எஸ்.டி. குறித்து தவறான கருத்துக்கள் இடம்பெற்றிருப்பதாக பொன்.ராதாகிருஷ்ணன், தமிழிசை, எச்.ராஜா ஆகியோர் கடும் கண்டனம் தெரிவித்திருந்தனர். இந்த சூழ்நிலையில் விக்கிபீடியாவின் ஆங்கில இணைய தளத்தில் பொன் ராதாகிருஷ்ணன், தமிழிசை குறித்து குறிப்பிட்டுள்ளது பெரும் சர்ச்சையை கிளப்பியுள்ளது.

சென்னை மாநகராட்சி அதிகாரிகள் துணையுடன் ஆர்கே நகரில் 45 ஆயிரம் போலி வாக்காளர்கள் சேர்ப்பு: திமுக ஆதாரத்துடன் குற்றச்சாட்டு

Tuesday October 24th, 2017 01:02:00 AM
சென்னை: திமுக அமைப்பு செயலாளர் ஆர்.எஸ்.பாரதி, சட்டத்துறை செயலாளர் கிரிராஜன் மற்றும் சுதர்சனம் எம்எல்ஏ ஆகியோர் நேற்று தலைமை செயலகத்தில் தமிழக தலைமை தேர்தல் அதிகாரி ராஜேஷ் லக்கானியை சந்தித்து ஒரு மனு அளித்தனர். அந்த மனுவில், ‘‘ஆர்.கே.நகர் தொகுதியில் உள்ள சுமார் 45 ஆயிரம் போலி வாக்காளர்களை உடனே நீக்கிவிட்டு அதன் பிறகு ஆர்.கே.நகர் தொகுதியில் தேர்தல் நடத்த வேண்டும்’’ என்று ஆதாரத்துடன் கூறியிருந்தனர்.  பின்னர் ஆர்.எஸ்.பாரதி நிருபர்களுக்கு அளித்த பேட்டி: ஆர்.கே.நகர் தொகுதிக்கு வரும் டிசம்பர் 31ம்தேதிக்குள் தேர்தல் நடைபெறும் என்று தகவல் வெளியாகியுள்ளது. ஆர்.கே.நகர் தேர்தலை திமுக வரவேற்கிறது. ஆனால் இடைத்தேர்தல் நடைபெறுவதற்கு முன்னதாக ஆர்.கே.நகர் தொகுதியில், உள்ள 45 ஆயிரம் போலி வாக்காளர்களை, அதாவது இரட்டை வாக்குப்பதிவு, மரணமடைந்தவர்கள், இடம் மாறி சென்றவர்கள் ஆகியோர் பெயர்களை தற்போதுள்ள வாக்காளர் பட்டியலில் இருந்து நீக்க வேண்டும்.  ஆர்.கே.நகரில் உள்ள போலி வாக்காளர்கள் விபரத்தை தேர்தல் ஆணையத்திடமும், தமிழக தலைமை தேர்தல் அதிகாரியிடமும் சிடி ஆதாரத்துடன் கொடுத்துள்ளோம். ஏற்கனவே 17 ஆயிரம் வாக்காளர்கள் ஆர்.கே.நகரில் போலியாக உள்ளனர் என்று தேர்தல் ஆணையமே கடந்த தேர்தலின்போது ஒத்துக் கொண்டிருந்தது. ஆனால் அந்த 17 ஆயிரம் பெயர்களைகூட நீக்காமல் தேர்தல் ஆணையம் தற்போது வாக்காளர் பட்டியல் வெளியிட்டுள்ளது. அதனால் மீண்டும் அங்கு தேர்தல் நடத்தும் முன் 100% திருத்தத்துடன் பட்டியல் வெளியிட வேண்டும் என்று வலியுறுத்தியுள்ளோம். ஆர்.கே.நகரில் உள்ள வார்டு, பூத், தெரு வாரியாக உள்ள போலி வாக்காளர்கள் 45 ஆயிரம் பேரின் பெயர் பட்டியலை தற்போது தமிழக தலைமை தேர்தல் அதிகாரியிடம் கொடுத்துள்ளோம். ஆர்.கே.நகரில் தற்போதுள்ள போலி வாக்காளர் குளறுபடிகள் அனைத்திற்கும் காரணம் சென்னை மாநகராட்சி அதிகாரிகள் தான். அவர்கள் அதிமுகவினர் சொல்படி தான் நடக்கின்றனர். ஆர்.கே.நகர் தொகுதியில் மட்டும் 2லட்சத்து 61ஆயிரம் வாக்காளர்கள் உள்ளனர். இதில் 45 ஆயிரம் போலி வாக்காளர்கள் என்றால் அதில் 25 சதவீதம் பேர் இடம்பெறுகின்றனர். உச்ச நீதிமன்றத்தில் ஆதார் எண்ணை இணைப்பதற்கு தடை இருந்தாலும் தடையை நீக்க தேர்தல் ஆணையம் நடவடிக்கை எடுக்க வேண்டும்.  நாங்கள் அளித்த புகாரை பெற்றுக் கொண்ட தலைமை தேர்தல் அதிகாரி திமுக கொடுத்த ஆதாரத்தின் அடிப்படையில் ஆர்.கே.நகர் தொகுதியில் இன்னொரு முறை வாக்காளர் பட்டியலை சரிபார்ப்பதாக உறுதி அளித்துள்ளார். அவர் நடவடிக்கை எடுக்கவில்லை என்றால் நாங்கள் மேல் நடவடிக்கை எடுப்போம்.

தேர்தலில் தலைவர் யார் என்றுதான் பார்ப்பார்கள் இலையை பார்த்து மக்கள் ஓட்டுப்போட மாட்டார்கள்: டிடிவி தினகரன் அதிர்ச்சி தகவலால் பரபரப்பு

Tuesday October 24th, 2017 12:43:00 AM
சென்னை: சென்னை அடையாரில் உள்ள இல்லத்தில் நேற்று டிடிவி தினகரன் நிருபர்களுக்கு அளித்த பேட்டி:தமிழகத்தில் உள்ள அமைச்சர்கள் வயிற்று பிழைப்பிற்காக பேசுகிறார்கள் என பொன்.ராதாகிருஷ்ணன் சரியாகவே கூறியுள்ளார். ஜெயலலிதா மரணத்திற்கு சசிகலாதான் காரணம் என பொய் பிரசாரம் செய்யப்பட்டது. ஆனால், தற்போது மக்களுக்கு உண்மை தெரிந்துவிட்டது.  டிசம்பர் 8க்கு பிறகு ஜெயக்குமார் போன்ற அமைச்சர்கள் எல்லாம் சேகர் ரெட்டி பிரச்னையில் விசாரணைக்கு பிறகு என்ன பேசினார்கள் என்பது தெரியும். ஓபிஎஸ் அணியினர் தாக்கல் செய்த ஆவணத்தில் போலி கையெழுத்தும், மிரட்டி கையெழுத்துகளும் வாங்கப்பட்டு அவையே தேர்தல் ஆணையத்தில் தாக்கல் செய்யப்பட்டுள்ளது. கே.டி.ராஜேந்திரபாலாஜி கூறுவது போல மேலே இருக்கும் கடவுளின் ஆசியுடன் இரட்டை இலை கிடைக்கும் என்று சொல்லி உள்ளார். ஆனால், அவர்களின்  கைகளுக்கு இரட்டை இலை சென்றால் அது அழிந்துவிடும். யாருக்கு இரட்டை இலை சொந்தம் என மக்களுக்கு தெரியும். ஆளுங்கட்சியினர் கையில் இரட்டை இலையை சென்றாலும் இரட்டை இலை ஒன்றை மட்டும் வைத்துகொண்டு மக்கள் ஓட்டுபோட மாட்டார்கள். தலைமை யார் என்று பார்த்து தான் மக்கள் ஓட்டு போடுவார்கள். அதிமுக நிர்வாகிகளில் பலர் எங்களுடன் தலைமை கழகத்தில் விழா கொண்டாடலாம் என கூறுகின்றனர். ஆனால் அங்கு கொண்டாடுவது பெரிய விசயம் இல்லை. மேலும், எடப்பாடி அரசு காவல் துறையை வைத்துகொண்டு அச்சுறுத்தி பார்க்கிறது. மேலும், மெர்சல் படத்திற்கு பெரிய அளவிலான பெயர் வாங்கி கொடுத்ததற்கு தமிழிசை, எச்.ராஜா ஆகியோருக்கு பட குழுவினர் நன்றி தெரிவிக்க வேண்டும். இருவரும் பேசுவது கருத்து சுதந்திரம், எழுத்து சுதந்திரம் ஆகியவற்றை முடக்கும் செயல். ஆர்.கே.நகர் தேர்தலில் எங்கள் சார்பில் யார் போட்டியிடுவது என்பது குறித்து ஆட்சிமன்ற குழு முடிவெடுக்கும். நிச்சயம் என்னை தேர்ந்தெடுப்பார்கள் என்ற நம்பிக்கை உள்ளது. ஆர்.கே.நகர் இடைதேர்தலில் எப்போது தேர்தல் வந்தாலும் எங்கள் அணி தான் வெற்றி பெறும். ஆர்.கே.நகர் இடைதேர்தலில்  யாருக்கு பலம் என்பதும் புரிந்து விடும். ஆயிரத்திற்கும் மேற்பட்ட பிரமாண  பத்திரங்கள் தேர்தல் ஆணையத்தில் இருக்கின்றன. அவற்றை எப்படி 40 நாட்களில்  விசாரிக்க முடியும். எனவே நவம்பர் 10 ம் தேதிக்குள் முடிவெடுப்பது என்பது  அவசரகதியானது. இது அவசரமாக முடிவெடுக்கும் காரியம் அல்ல. இது ஒரு  மிகப்பெரிய கட்சியின் சின்னத்தை தேர்வு செய்யும் முறை என்பதால் சரியான  முடிவாக இருக்க வேண்டும்.  இவ்வாறு அவர் கூறினார்.

அரசியல் ரீதியாக பதிலளிக்க முடியாமல் தனி நபர் விமர்சனம் செய்யும் பா.ஜ தலைவர்கள்: திருமாவளவன் குற்றச்சாட்டு

Tuesday October 24th, 2017 12:43:00 AM
நாகர்கோவில் :  விடுதலை சிறுத்தைகள் கட்சி தலைவர் திருமாவளவன், நேற்று காலை கேரள முதலமைச்சர் பினராய் விஜயனை சந்திக்க சென்றார்.  இதற்காக நெல்லையில் இருந்து கார் மூலம் திருவனந்தபுரம் சென்ற அவர், வழியில் நாகர்கோவிலில் நிருபர்களை சந்தித்தார். அப்போது அவர்  கூறியதாவது :மக்கள் பிரச்னைகளுக்கு அரசியல் ரீதியாக பதில் சொல்ல முடியாத பா.ஜ. தலைவர்கள் தனி நபர் விமர்சனத்தில் ஈடுபட்டு வருவது அதிர்ச்சி  அளிக்கிறது. தமிழ்நாட்டில் யாரை பிடித்தாவது ஆட்சிக்கு வர வேண்டும் என பா.ஜ. நினைக்கிறது. அதிமுகவையும், தமிழக அரசையும் பிரதமர் மோடி தான் இயக்கி  வருகிறார் என்பதை தமிழக அமைச்சர்களே பகிரங்கமாக ஒப்புக்கொண்டுள்ளனர். இதன் மூலம் மக்களால் தேர்ந்தெடுக்கப்பட்ட ஒரு அரசு சுதந்திரமாக  செயல்படவில்லை என்பது வெட்ட வெளிச்சமாகி இருக்கிறது. ஜெயலலிதா இறப்புக்கு பிறகு பா.ஜ. மற்றும் சங்பரிவார் அமைப்புகள் கூட இஷ்டத்துக்கு பேச தொடங்கி விட்டனர். ஜி.எஸ்.டி. குறித்து பா.ஜ. மூத்த  தலைவர்கள் யஷ்வந்த் சின்கா, சுப்பிரமணியசுவாமி ஆகியோர் கருத்து தெரிவித்த போது தமிழிசை சவுந்தர்ராஜன் எதுவும் சொல்லவில்லை. மெர்சல்  படத்தில் ஜி.எஸ்.டி. குறித்து நடிகர் விஜய் கூறிய கருத்துக்களுக்கு பதில் சொல்ல இயலாமல் தனி நபர் விமர்சனம் செய்து வருகிறார். கேரளாவில் 6  தலித்துகள் உள்பட 36 பார்ப்பனர் அல்லாதவர்களை அர்ச்சகர்களாக்கிய முதல்வர் பினராய் விஜயனுக்கு நன்றி தெரிவித்துக்கொள்கிறேன். இவ்வாறு அவர் கூறினார்.

தினகரன் பேச்சுக்கு ஓபிஎஸ் கிண்டல் ‘நாங்கள் அத்தை இல்லை மாமா’

Tuesday October 24th, 2017 12:43:00 AM
விருதுநகர்: இரட்டை இலை சின்ன விவகாரத்தில், ‘அத்தைக்கு மீசை முளைக்காது’ என தினகரன் தெரிவித்ததற்கு, ‘நாங்கள் அத்தை இல்லை...  மாமா’ என ஓபிஎஸ் கிண்டல் அடித்துள்ளார்.விருதுநகர் காமராஜ் பொறியியல் கல்லூரியில், புதிய கட்டிட திறப்பு விழா நேற்று நடைபெற்றது. இதில் பங்கேற்ற துணை முதல்வர் ஓ.பன்னீர்செல்வம்  நிருபர்களிடம் கூறுகையில், ‘இரட்டை இலை சின்னம் எங்களுக்கு உறுதியாக கிடைக்கும்’ என்றார். அப்போது, ‘‘சென்னையில் டிடிவி.தினகரன்  கூறும்போது அத்தைக்கு மீசை முளைக்காது; அப்படியே முளைத்தாலும் அதை வைத்து ஒன்றும் செய்ய முடியாது என கூறியுள்ளாரே’’ என  நிருபர்கள் கேட்டதற்கு, ‘‘நாங்கள் அத்தை இல்லை... மாமா,’’ என்று ஓபிஎஸ் கிண்டலாக தெரிவித்தார். அமைச்சர் பாண்டியராஜன் மற்றும்  கட்சியினர் உடனிருந்தனர்.

மெர்சல் திரைப்படத்தில் அரசு திட்டங்கள் திரிப்பு: தமிழிசை பேட்டி

Tuesday October 24th, 2017 12:43:00 AM
கரூர்:  கரூரில் பாஜக மாநில தலைவர் தமிழிசை, நேற்று அளித்த பேட்டி: நெல்லையில் கலெக்டர் அலுவலகம் முன்பு கந்துவட்டி கொடுமையால் ஒரு குடும்பத்தினர் தீக்குளித்து இறந்துள்ளனர். இதுபோன்ற பிரச்னை வராமல்  இருக்கத்தான் முத்ரா வங்கி திட்டத்தை மத்திய அரசு கொண்டு வந்துள்ளது.  தமிழகத்தில் இதுவரை  53 லட்சம் பேர் இத்திட்டத்தில் இணைந்துள்ளனர்.   என்னிடம் சிலர் தொலைபேசியில் தொடர்பு கொண்டு அவதூறாக பேசுகின்றனர். கருத்து சுதந்திரம் எல்லோருக்கும் உண்டு. சரியான அடையாளத்துடன்  வந்து திட்டங்களை விமர்சிக்க வேண்டும்.  மெர்சல் திரைப்படம் பற்றி சர்ச்சை எழுந்துள்ளது. தணிக்கை குழுவில் பல விதிகள் உள்ளது. கலாச்சார, அரசியல், சமூகம் சார்ந்த கருத்துக்களை  திரித்து பதிவு செய்யக்கூடாது. ஆனால் அரசின் நல்ல திட்டங்கள் அப்படத்தில் அப்பட்டமாக திரித்துக் கூறப்பட்டுள்ளது. மக்களுக்கு நல்ல  கருத்துக்களை கொண்டு செல்ல வேண்டும் என்ற ஆதங்கத்தில்தான் நான் கருத்து சொன்னேன்.  நிதி ஆயோக்குழு உறுப்பினர் விவசாயத்தை மத்திய பட்டியலில் கொண்டு வர வேண்டும் என்று ஆலோசனை தான் கூறியிருக்கிறார். அதற்கு சிலர்  கடும் எதிர்ப்பு தெரிவிக்கின்றனர். ஆலோசனை கூறுவதே தவறு என கூறக்கூடாது. இது ஏற்கத்தக்கதல்ல என்றார்.

ராஜேந்திரபாலாஜி பேட்டி எங்கள் தயவு மோடிக்கு தேவையில்லை

Tuesday October 24th, 2017 12:42:00 AM
சிவகாசி: மோடிக்கு எங்கள் தயவு தேவையில்லையென அமைச்சர் ராஜேந்திரபாலாஜி கூறினார்.சிவகாசியில் எம்ஜிஆர் நூற்றாண்டு விழாவில் பங்கேற்ற அவர் நிருபர்களிடம் கூறுகையில், ‘‘தமிழக வளர்ச்சிக்காக மட்டும்தான், மத்திய அரசிடம்  பேசி வருகிறோம். இரட்டை இலையை  மீட்க அல்ல. இந்திரா காந்தி, ராஜிவ் காந்தி போல் மோடி மாபெரும் தலைவர்.  அவருக்கு எங்கள் தயவு  தேவையில்லை. ஆனால் தமிழ்நாட்டிற்கும், வளர்ச்சிக்கும் மத்திய அரசின் உதவி தேவை. விருதுநகர் மாவட்டத்தில் டெங்கு பாதிப்பு உள்ளது. ஆனால்  உயிரிழப்பு இல்லை,’’ என்றார்.முன்னதாக கடந்த 20ம் தேதி தேனி மாவட்டம், பெரியகுளத்தில் ேபசிய அமைச்சர் ராஜேந்திர பாலாஜி, ‘பிரதமர் மோடி நம்மோடு உள்ளார். நமக்கு  ஏதாவது ஒன்று என்றால் அவர் பார்த்து கொள்வார். யாரும் நம்மை மிரட்டவோ, அழிக்கவோ முடியாது’ என்று கூறியது குறிப்பிடத்தக்கது.

எம்ஜிஆர் நூற்றாண்டு விழாவில் முதல்வர் அறிவிப்பு மாநகராட்சி ஆகிறது சிவகாசி

Tuesday October 24th, 2017 12:42:00 AM
சிவகாசி: சிவகாசி மாநகராட்சியாக தரம் உயர்த்தப்படுமென, சிவகாசியில் நடந்த எம்ஜிஆர் நூற்றாண்டு விழாவில் முதல்வர் எடப்பாடி பழனிசாமி  பேசினார்.விருதுநகர் மாவட்டம், சிவகாசியில் தமிழக அரசு சார்பில் எம்ஜிஆர் நூற்றாண்டு விழா நேற்று நடந்தது. சபாநாயகர் தனபால் தலைமை வகித்தார்.  முதல்வர் எடப்பாடி பழனிசாமி, துணை முதல்வர் ஓ.பன்னீர்செல்வம், அமைச்சர்கள் ராஜேந்திரபாலாஜி, உதயகுமார், செங்கோட்டையன், திண்டுக்கல்  சீனிவாசன், மணிகண்டன், காமராஜ், செல்லூர் ராஜூ, வெல்லமண்டி நடராஜன் உள்பட அமைச்சர்கள், எம்எல்ஏக்கள், எம்பிக்கள் கலந்துகொண்டானர்.விழாவில் முதல்வர் எடப்பாடி பழனிசாமி பேசியதாவது:சிவகாசியில் அச்சுத்தொழில், தீப்பெட்டி தொழில் சிறப்பாக நடந்து வருகிறது. சிவகாசி, திருத்தங்கல் நகராட்சிகள் மற்றும் 9 பஞ்சாயத்துகளை  இணைத்து, மாநகராட்சியாக சிவகாசி தரம் உயர்த்தப்படும். வத்திராயிருப்பு தனித்தாலுகாவாக மாற்றப்படும். எம்ஜிஆர் நூற்றாண்டு விழா  கொண்டாடுவதை சிலர் விமர்சனம் செய்து வருகின்றனர். நூற்றாண்டு விழா பற்றி தெரியாமல், சிலர் பேட்டி கொடுத்து வருகின்றனர். ஆளுங்கட்சியை  பொத்தம்பொதுவாக குறை கூறி வருகின்றனர். அவர்கள் குறைகூறும் அளவிற்கு நாங்கள் ஒருநாளும் நடந்து கொள்ளவில்லை.அவர்களுக்கு பேட்டி கொடுக்க மட்டும்தான் தெரியும். மக்கள் மன்றத்தில் வந்து செயலாற்ற முடியாது. அவர்களின் பேச்சை மக்கள்  பொழுதுபோக்காகத்தான் பார்க்கின்றனர். அதிமுக புயலாலும் அசைக்க முடியாத ஆலமரம். தாங்கி பிடிக்க ஒன்றரை கோடி தொண்டர்கள் இந்த  இயக்கத்தில் உள்ளனர்.பருவநிலை காரணமாக தமிழகத்தில் டெங்கு காய்ச்சல் ஏற்பட்டுள்ளது. தமிழக அரசின் துரித நடவடிக்கை மூலம் டெங்கு காய்ச்சல்  கட்டுப்படுத்தப்பட்டுள்ளது. 140 ஆண்டுகள் இல்லாத வறட்சியை இந்த ஆட்சி எதிர்கொண்டது. கடும் வறட்சியிலும் கூட தண்ணீர் தட்டுப்பாடின்றி  வழங்கினோம். மற்ற மாநிலங்களைவிட தமிழகத்தில்தான் கல்விக்கு அதிக முக்கியத்துவம் கொடுத்து அதிகமான நிதி ஒதுக்கீடு செய்யப்படுகிறது.  ஏராளமான பள்ளிக்கூடங்கள் தரம் உயர்த்தப்பட்டுள்ளன. புதிய கல்லூரிகள் தொடங்கப்பட்டுள்ளன. அரசின் நடவடிக்கையால் அரசு பள்ளிகளில்  மாணவர்கள் சேர்க்கை அதிகரித்து வருகிறது.குட்டிக்கதை: ஒரு நாள் ஆற்றில் நண்பர்கள் பலர் குளித்து கொண்டிருந்தனர். திடீரென்று ஆற்றில் வெள்ளம் பெருக்கெடுத்து ஓடியது. பலர் அடித்து  செல்லப்பட்டனர். கரையோரம் இருந்த பொருட்களும் அடித்து செல்லப்பட்டன. இதை கண்ட மற்ற நண்பர்கள் தங்களால் முடிந்தவரை, ஆற்றில்  தத்தளித்தவர்களையும், அவர்களது உடமைகளையும் காப்பாற்றினர். நண்பர்கள் குழுவில் ஒருவன் மட்டும், தத்தளித்தவர்களை காப்பாற்றாமல்,  பொருட்களையே குறிவைத்து கொக்கி போட்டு கரைக்கு இழுத்து வந்து தனதாக்கிக் கொண்டிருந்தான். இதை பார்த்த மற்ற நண்பர்கள், இது தவறு. மற்றவர் பொருளுக்கு ஆசைப்படாதே. பேராசை பெரு நஷ்டம் என்றனர். அதை கவனிக்காமல், அவன்  கம்பளி மூட்டை போன்ற ஒரு பொருள் மிதந்து வந்ததை கண்டான். கம்பளி மூட்டையை கொக்கி போட்டு இழுக்க முடியவில்லை. ‘மூட்டையை  கொண்டு வந்து பெரிய செல்வந்தன் ஆவேன்’ என்று கூறியவாறே ஆற்றில் குதித்தான். பின்னர் நடு ஆற்றில் போராடி கொண்டிருந்தான். அப்போது கரையில் நின்ற நண்பர்கள், ‘கம்பளி மூட்டை வராவிட்டாலும் பரவாயில்லை. கரைக்கு வா’ என்றனர். அதற்கு அவன், “நான் அதை  விட்டு விட்டேன். அதுதான் என்னை விடாமல் பிடித்துக் கொண்டிருக்கிறது. இது கம்பளி மூட்டை இல்லை. கரடிக்குட்டி,’’ என்றான். இப்படித்தான்  பலர் ஆசைப்பட்டு தவறான இடத்திற்கு சென்று விட்டு, இப்போது அதை விட்டுவிட்டு வர முயன்றாலும் அவர்களால் முடியவில்லை. தவறானவர்கள்  அவர்களை பிடித்துக்கொண்டு விட மறுக்கிறார்கள். இவ்வாறு அவர் பேசினார்.